Jơnau rơcang cih Jơnau lơh nền Chính phủ dê cih wil tơl ală bơta lơh tờm is hìu bơsram dê, ờ gơ wèt tàm bơta lơh tờm is priă jền, geh: lơh tờm is bè bơta chài bơto bơsram, mờng chài lơh broă; lơh tờm is bè kơlôi sơnơng jak chài, lơh tờm is bè rơndap tap sèng mpồl lơh broă, cau lơh broă; lơh tờm is bè lơh broă bal ală lơgar; lơh tờm is bè priă jền, phan bơna, bơcri priă.

Đơs pơn dut dơ̆ pơrjum, ồng Lê Tiến Châu, Phó Thủ tướng sồr Ƀộ Bơto bơtê mờ Bơsram pơgồp bal mờ ală Ƀộ geh gơ rềng lơh sir jơnau rơcang cih Jơnau lơh nền Chính phủ dê nàng di tŭ dan jơnau đơs bơh kwang bàng tàm Chính phủ dê lài mờ ngai 20/7 do. Mờ kung pơgồp bal mờ Ƀộ Kwang àng, Ƀộ Cribơyai broă mờ lơgar ndai sền nền wơl ală tơngume bơh jơnau rơcang cih Jơnau lơh nền Chính phủ dê, ngan là ală broă gơ rềng tus lơh tờm bơta chài bơto bơsram jat gùng dà lơh tờm is uă ngan rlau jơh bè bơta chài bơto bơsram gơ wèt mờ ală gah jak chài măi mok, môn geh is; đal git loh gùng dà lơh tờm is đah hìu bơsram đại học dà lơgar mờ nă să is.