Pơrjum geh lơh tàm bơta jơh ală anih lơh broă cíñ trị gam jal mhar ngan lam lơh ală kơnòl broă pơn jăt tai rơndăp tăp sèng kwang bàng mpồl lơh broă. Bè broă do, Củ tịc Quôk hội ồng Trần Thanh Mẫn pà gĭt, tơngai 1, ală ƀộ gah, anih lơh broă neh rơndăp tăp sèng tơrmù dipal mpồl lơh broă, tơngai 2 lơh tam gơl wơl Sơnoa boh lam, lơh tam gơl wơl bàr pe adăt mờ rơndăp tăp sèng 50% ală mpồl lơh broă sră pơ àr gơnoar ătbồ càr dê.

Dơ̆ pơrjum dơ̆ 09 digơlan pơrjum tàm mờr 2 nhai, tàm tơngai do rơ̆p ai jơnau đơs làng bol dê bè tam gơl wơl Sơnoa boh lam. Is ồn bơh lồi nhai 04 tus bồ nhai 05, Anih duh broă Lơh kơnòl broă sùm Quôk hội kung rơ̆p pơrjum uă dar nàng rơndăp tăp sèng mpồl lơh broă sră pơ àr gơnoar ătbồ kâp sàh. Ală rơndăp broă lơh adăt cribơyai tàm Pơrjum dơ̆ do tam gơl uă broă krơi is, tàm hơ̆ geh ală adăt kwơmàng ngan, gơdờp uă tus lơh broă lơh gơlik phan kă bro mờ mpồl bơtiàn mpồl lơh sa kă bro.