Mờ bơta mùl gŏ is bơh ală hìu dra DK1 dê lơh broă krơi is tàm ù tiah dờng màng, bơta ơm kis lơh broă kal ke, nhơm trồ tiah dà ia càl rbŭt ờ ƀươn soh, sùm geh ală dơ̆ mìu càl rbŭt dơng lòt gan kơnhoàl ù tiah do. Tŭ geh jơnau digơlan gơ tơlik jơnau sồr uă ngan bè nùs nhơm kơ̆ dơn cíñ trị, bơta kơ̆p kờñ jơh nùs, nùs nhơm dòn song dồ nùs mờ Dà lơgar, mờ Đảng, mờ Làng bol, crăp rơcăng phi să tài gơnoar tờm dà lơgar dê. Ngan tài bơh hơ̆, jăt Đại tá ồng Trần Mạnh Chiến, Đơng lam cíñ trị Tiah 2 Ling dà lềng, đơs: broă lơh gơs nùs nhơm kơ̆ dơn cíñ trị, bơta kơ̆p kờñ jơh nùs, crăp rơcăng dờp mờ lơh sir niam kơnòl broă gơ wèt mờ kwang bàng cau ling hìu dra là broă tờm ngan, sùm sùm mờ Đảng ủy, Gah Đơng lam Tiah 2 Ling dà lềng dê sùm sền gròi.

“Bol hi gĭt nền nàng lơh geh bơta hơ̆, pal ngui bal jơh ală broă lơh dồ bă dipal ngan mờ bơta geh ngan tàm rài kis tŭ do. Tàm hơ̆, bơto bơtê tơngguh uă nùs nhơm geh kơnòl, nùs nhơm kơ̆ dơn cíñ trị, bơta kơ̆p kờñ jơh nùs là broă tờm ngan. Lơh jăt niam gơnoar broă lơh krơh, bơta kơ̆p kờñ, kơnòl bơh tơl nă kwang bàng, đảng viên dê tŭ lơh jăt kơnòl broă là broă tờm. Sền gròi trăng gàr tus bơh ngkời hìu bơnhă kwang bàng cau ling dê, lơh jăt niam broă dong kờl gơ wèt mờ ling geh grăt là broă kwơmàng, sùm sùm. Lơh niam ală tơngume đơs hơđang là broă kwơmàng ngan, lơh nền tus bơta tờm kơ̆ kơnhăp bè bồ tơngoh, lơh broă bơh tơl nă kwang bàng cau ling dê tŭ lơh jăt kơnòl broă”.

Jăt Trung tá ồng Nguyễn Trung Đức, Ƀí thư Đảng ủy, Đơng lam Cíñ trị Mpồl dềt DK1, Gah Đơng lam Tiah 2 Ling dà lềng: Tàm tơngai lơh broă pa do, ală ci ƀộ Hìu dra DK1 neh đơng lam, sồr mpồl lơh broă lơh sir niam ală broă jàu, kơnòl broă neh sồr lơh bal mờ uă cồng nha lơh geh pơnrơ, bè: Drơng sền, drơng gak, sền rơmê gĭt nền broă tềng hơđang kơlwàng trồ, tàm dà lềng, di tŭ yal mờ sờh đơng lam ală kâp in bơsong rơgeh, di ală jơnau digơlan gơlik geh, bañ lời gơtìp rơmơ̆p ndơl tàm tơl jơnau digơlan gơlik geh. Tơngguh uă bơta niam bơsram tàp, crăp rơcăng tam lơh, bơ̆t bơtàu bơta rơndăp tăp sèng ngan ngồn, pơlam tàp duh rơngòt adăt boh lam, dong kờl, dong làng bol tàm dà lềng, tàp lơh…Lơh broă broă lơh Đảng, broă lơh cíñ trị, broă lơh dong kờl bơh ngkời, măy mŏk geh lam lơh ndrờm bal, geh cồng nha. Bơta cíñ trị bồ tơngoh mpồl kơ̆ kơl jăp, dơlam is tam klăc, ring bal, mpồl lơh broă lơngăp lơngai tơl ală bơta, ờ geh cau lơi gơtìp lơh glài lơh tìs adăt boh lam. Trung tá ồng Nguyễn Trung Đức, pà gĭt: “Tài bơta kal ke, ờ ƀươn soh mờ uă kơnòl broă nisơna den tàng gơnoar broă đơng lam bơh kâp ủy, ci ƀộ dê tàm ală hìu dra DK1 là kwơmàng ngan gĭt lơh mờ pal sùm rơcăng lài gĭt geh mờ yal lài bơta gơlik geh, gĭt nền uă broă lơh đơng lam nàng bơsong niam ală jơnau digơlan gơlik geh kal ke, pa, mhar gơrềng bè tŭ geh ơhò krơi mŭt sơgràm tìs bơnah ătbồ; jơnau digơlan gơlik geh jal mhar, càl, càl rbŭt dờng, dong kờl rềs àr gal cau…”. 

Ală hìu dra DK1 lơh pôs đông rah rài tàm ală tiah dà lềng đah Jum dà lơgar dê den tàng tìp ờ dồ êt kal ke. Ờ mìng kal ke bè trồ tiah ờ ƀươn soh lơm mờ gam tìp ờ dồ êt kal ke tàm broă lam lơh jăt ală sră nggal, jơnau sồr…ngan là broă rơcăng ală bơta ai pơrjum dờng in. Mơya, Đảng ủy, Đơng lam Mpồl dềt DK1 neh đòm jăt bơceh lơh uă broă lơh lam lơh geh cồng nha pơrjum dờng. Đại úy ồng Bùi Thanh Hưng, Ƀí thư Ci ƀộ, Đơng lam Cíñ trị hìu dra DK1/9, yal: “Ci ƀộ añ lơh pôs đồng tàm hìu dra tềng dà lềng ngài, sùm geh bơta sền gròi sồr lơh bơh Đảng ủy đơng lam mpồl dềt dê, bơh Đảng ƀộ Tiah dê. Tàm tơngai lơh broă pa do, Ci ƀộ bol hi neh lơh sir jak ngan kơnòl broă. Bơta hơ̆ tơnggŏ bơh cồng nha lơh sir kơnòl broă cíñ trị mpồl lơh broă dê, bơta tam klăc kơ̆ kơl jăp bơh ală mpồl đảng, bơta dờng pràn jơh nùs pơnđơl bơh tơl nă đảng viên mờ làng bol dê. Cồng nha lơh geh bơh pơrjum dờng Cíñ ƀộ ală hìu dra dê là bơta dòn kơnờm nàng kwang bàng cau ling ală hìu dra DK1 tơngguh tai jơh nùs kơ̆ dơn ơm kơ̆ tàm tiah nhàr dà lềng dà lơgar dê, tiah bềng càl rbŭt dờng, sền gàr kơ̆ kơnhăp tiah dà lềng đah Jum dà lơgar dê”.

Bal mờ ală broă lơh rơcăng mờ bơyai lơh pơrjum dờng, anih duh broă đơng lam đảng, ci ƀộ ală hìu dra neh sùm lơh niam broă lơh cíñ trị, bồ tơngoh, broă dong kờl, gàr bơta tam klăc, ring bal uă; sền dờng màng broă lơh đơng lam lơh sir niam kơnòl broă cíñ trị gơ jăt bal mờ lơh pràn ală srơh tàm pơrlòng. Yờ tơngguh nùs nhơm kơrhia lài rơcăng ngăc, crăp rơcăng tam lơh uă, bơsong di tŭ jơh ală jơnau digơlan gơlik geh tàm dà lềng. Kwang bàng cau ling tàm ală hìu dra rơcăng lài, jơh nùs, geh ală broă lơh tam dră geh cồng nha ală jơnau jòi kai, broă lơh dră aniai, lơh gơbàn sơrlồng sơrlàng dơlam is bơh ală mpồl gơjrañ kwềng, ală cau sơmờm tŭ tơngai cíñ trị, sơ il nùs nàng sền gàr bơta tờm bồ tơngoh, bơta pal jăt cíñ trị, gùng dà Đảng dê, sền gàr rài ătbồ.

Dơ̆ sơnrờp geh tus bal Pơrjum dờng Ci ƀộ tàm hìu dra, đảng viên ồng Phạm Quang Dũng, Ci ƀộ Hìu dra DK1/10, pà gĭt: “Bulah neh tus bal pơrjum dờng ci ƀộ tàm ù gờl uă dơ̆, mơya tŭ tus bal pơrjum dờng dơ̆ sơnrờp tàm hìu dra, bulah tìp ờ dồ êt kal ke, siơ̆u siar bè tơl bơta; mơya tơl nă đảng viên neh lơh niam broă lơh rơcăng, ci ƀộ bơyai lơh di bơta rơndăp tăp sèng, broă pơlam lơh bal mờ nùs nhơm ki ngàm ngan dờng màng ngan kung bè tàm ù gờl sơl”.

Ngài ù gờl, mờ bơta mŭt gŏ is lơh broă kal ke, ờ ƀươn soh, geh uă kơnòl broă kwơmàng, ală kâp ủy, ci ƀộ hìu dra DK1 pal rơcăng lài gĭt geh, yal lài broă gơlik geh, gĭt nền uă broă lơh đơng lam bơsong jơnau digơlan gơlik geh kal ke, pa, mhar gơrềng mơya mờ bơta jơh nùs uă bơh kâp ủy, đơng lam ală hìu dra dê, bal mờ bơta tơrgùm bal pràn, dồ nùs bal bơh tơl nă kwang bàng, đảng viên, ală kâp ủy, mpồl đảng dê neh lơh niam tơl broă lơh rơcăng mờ bơyai lơh Pơrjum dờng Ci ƀộ tơngai lơh broă bơh nam 2025- 2027. Ală cồng nha lơh geh tàm tơngai lơh broă pa do mờ cồng nha lơh geh bơh pơrjum dờng ală ci ƀộ hìu dra dê là cơng tàng đơs nền ai pràn jak, pràn tam lơh bơh ală mpồl Đảng Hìu dra DK1 dê đơs is mờ Tiah 2 Ling dà lềng dê đơs bal. Hơ̆ kung là bơta đơs nền bal mờ bơta pin dờn bơh Đảng, Dà lơgar mờ Làng bol dê gơ wèt mờ mpồl cau sền gàr gơnoar tờm ù tiah dờng màng king crŭ tàm tiah dà lềng đah Jum dà lơgar dê.