Pơrjum dờng neh ring bal Jơnau lơh nền tàm pơrjum, sền gĭt 13 broă jàu, 05 kơnòl broă tam gơl pràn; 07 broă lơh, Ală jơnau neh lơh nền tờm lơh jat tàm tơngai lơh broă bơh nam 2026-2031. Dùl bơta pa geh gơtha pơlam gùng dà bơh tơngai lơh broă do dê là Pơrjum dờng sền gĭt lam lơh srơh “Rơnàng kơnòm să Việt Nam lam lơh tàm rài pa”, lơh geh bơta gơn kơnờm lơh kah wơl pràn kơl dang nùs nhơm lam lài, bơceh lơh mờ bơta kơ̆p kờñ tă pơgồp bơh ơruh pơnu dê. Pơrjum dờng kung sền gĭt lam lơh broă lơh “Bơtàu tơnguh tơl làm ơruh pơnu Việt Nam” tàm bơsram sră, bơtàu tơnguh bồ tơngoh jak; bơtàu tơnguh, pơlam tàp să jan; bơtàu tơnguh rài kis niam chài nùs nhơm.

Mờ nùs nhơm “Khin cha lơh pràn is- Lam lài bơceh lơh- Kơ̆p kờñ tă pơgồp- Lơh tờm rài tơnơ̆ do”, Pơrjum dờng hòi jà jơh ală kấp bộ đoàn, jơh gùt mpồl đoàn viên, ơruh pơnu Việt Nam tàm lơgar mờ lơgar ndai gĭt loh gơnoar broă, kơnòl; lơh jat niam pràn kơl dang nùs nhơm kờñ gơboh dà lơgar, bơta kơ̆p kờñ bơtàu tơnguh, nùs nhơm sền dờng màng jơi bơtiàn, bơta kwơ niam chài cau Việt Nam dê, nùs nhơm jơh nùs jơh tồr bơh rơnàng kơnòm să dê nàng mhar lam lơh mơ tơn ală tơngume neh geh Pơrjum dờng ring bal, lơh geh nùs nhơm rcang lài ai dùl tơngai lơh broă pa mờ ală cồng nha pa.