Ală broă geh sền sơwì, lơh nền tàm pơrjum do drơng broă lơh rơndăp tăp sèng, tơrmù mpồl lơh broă, lơh geh jơnau kờñ uă ngan bơh Dà lơgar dê tàm rài pa. Do là broă gam dờp geh bơta ring bal, kờñ uă ngan bơh kwang bàng, đảng viên mờ Làng bol dê, kung là lơh geh bơnàng jă bè broă lơh rơndăp broă kwang bàng tàm Pơrjum dờng dơ̆ 14 bơh Đảng dê; tĕ khà cau ala mat Quôk hội khoă 16 mờ Mpồl duh broă Làng bol ală kấp tơngai lơh broă bơh nam 2026-2031.

Bơdìh hơ̆, Quôk hội sền sơwì, lơh nền, di tŭ tă bơsong kal ke, kòl yan bè kơrnoat boh lam, broă lơh, lơh geh bơta tam gơl pràn nàng lơh sir phan bơna bơt bơtàu, ngui niam priă jền, lơh geh ù tiah bơtàu tơnguh pa, nàng kờñ lơh tus geh ală jơnau kờñ Pơrjum dờng dơ̆ 13 bơh Đảng dê neh ai. Kung tàm pơrjum, Quôk hội rơ̆p sền sơwì, ring bal 4 rơndăp broă lơh Adat; Adat Rơndăp broă Cíñ phủ (tam gơl); Adat rơndăp broă gơnoar atbồ ală tiah (tam gơl); Adat tam gơl, bơtơl bàr pe bơta bơh Adat Rơndăp broă Quôk hội; Adat Ai lơh jat sră nggal gơrềng tus adat boh lam (tam gơl). Pơrjum do kờp dŭ lơh broă tàm 6 ngai nggùl, bơh ngai 12 tus ngai 19/02/2025.