Đơs tàm Pơrjum, ồng Trần Thanh Mẫn, Chủ tịch Quốc hội đơs là, broă yal Rơndap ù tiah bal Càr lơgar Hà Nội broă rơndap lơh 100 nam ờ mìng yal dùl sră rơndap ù tiah, mờ gam pơyua jơnau đơs bè bơta lơh ngan lơh broă, ai tơnggŏ loh bơta pơnđơl pràn chính trị ƀòn dờng dê tàm broă ai Jơnau lơh nền tàm pơrjum dờng dơ̆ XIV Đảng dê, Jơnau lơh nền tàm pơrjum dờng Đảng ƀộ ƀòn dờng dơ̆ 18 lơh jat ngan ngồn tàm rài kis, di mờ jơnau sồr lơh bơh ồng Tô Lâm, Tổng Bí thư, Chủ tịch lơgar dê “Hà Nội đơs là lơh, lơh mhar, lơh di, lơh geh cồng nha mờ lơh tus gùng tus dà”.

Chủ tịch Quốc hội sồr, Chính phủ, ală ƀộ, gah broă lơh dà lơgar mờ ală anih lơh broă geh gơ rềng pơn jat tai pơgồp bal jơh nùs mờ Hà Nội tàm tŭ lam lơh jat ală gùng dà, broă lơh krơi is; di tŭ pơlam, tă bơsong ală bơta gơ kòl bè gùng dà, broă lơh, gàr bơta ring bal tàm broă lam lơh jat. Tơl gùng dà, broă lơh neh geh Quốc hội ai lơh jat pal geh lam lơh ring bal, geh cồng nha, lơh jat ngan ngồn tàm rài kis; tơl bơnah priă jền geh jàu pal geh ngui di jơnau kờñ, di adat boh lam, tài bơta bơtàu tơnguh dà lơgar dê mờ bơta gơboh gơbài làng bol dê.