Trồ mho jơla, gùng ƀê tông tàm thôn Lầu Nàng, sàh Ia Lốp, càr Dăk Lăk nggồr chờ hờp săp cau dê tơm bơh bơr lòt jơng tàp pràn să jan. Tŭ trồ mang tus, ală ƀong đèng măt tơngai sơnđờm pờ àng. Mò Vi Thị Phương, làng bol thôn Lầu Nàng chờ hờp yal: bơta tam gơl do pa geh bơh rlau nggùl nhai do, bơh tŭ geh broă lơh bơ̆t bơtàu gùng đèng bơh ơruh pơnu lơh broă dong kờl is dê crăp ơn tàm gùng lòt tờm thôn dê. Broă lơh bơ̆t bơtàu lơh sir, gùng neh gơgơs tiah làng bol tàm tìp, tàp pràn să jan.

“Brờn ngan, jơh dồ ƀòn cau lơi kung brờn lơm, tài bơh geh đèng pờ àng bơdìh gùng ai ală wa ală mơi in lòt gơ in ƀươn, gŏ gơlơh sơrdah rlau mờ niam rlau. Jơh dồ ƀòn tơrgùm tê bal sền gàr nàng ai gùng in ngai sơlơ niam rlau tai”.

Gơl gùng đèng do là dùl tàm uă broă lơh bơ̆t bơtàu geh lam lơh tàm Broă lơh dờng Ơruh pơnu lơh broă dong kờl is kàl rlô bơkăng nam 2026 bơh mpồl cau bơsram dờng Klờng Đại họk Đah Jum Cần Thơ dê pơgồp bal mờ đoàn viên ơruh pơnu ƀòn lơgar lơh tàm bàr sàh: Ia Lốp mờ Ea Rốk, càr Dăk Lăk. Ală broă lơh bè lơh niam wơl hìu ơm ai hìu bơnhă gơtìp gơrềng tài bơh càl jồp càl sìng in, lơh wơl anih bơsram sră ai kơnòm bơsram rƀah in, lơh ƀlàng nhơl bơlai halà lam lơh broă lơh pơgơl sồ siă đù ai phan pà, ndrờm wèt tus ală jơnau kờñ ngan ngồn bơh làng bol tiah nhàr lơgar dê, tam gơl gĭt wă bè sền gàr tiah ơm kis, sền gàr pràn kơldang.

Bi Ngân Văn Thành, Phó Chủ tịch Anih duh broă Mặt trận Dà lơgar Việt Nam sàh, Bí thư Đoàn sàh Ia Lốp, pà gĭt, ală broă lơh bơ̆t bơtàu ndrờm geh làng bol tus bal sền gàr, ngui niam lơngăp lơngai, dong bơta kwơ bơh broă lơh dong kờl is dê geh tơn jŏ.

 “Ală bơyô đoàn viên, ơruh pơnu jơh nùs dong kờl làng bol lơh jăt ală broă, bơnah broă geh kwơ ngan ngồn, cèng wơl bơta kwơ ai làng bol mờ ƀòn lơgar in. Ală broă lơh bơ̆t bơtàu bè Pờ àng gùng ƀòn geh làng bol cih dờp mờ jờng rơ ngan, ai ală broă lơh bơ̆t bơtàu ƀlàng nhơl bơlai den cèng wơl nùs nhơm tàp pràn să jan ai đoàn viên, ơruh pơnu mờ làng bol in”.

Gơ wèt mờ ală bơyô kơnòm să, broă lơh dong kờl is gam cèng tus ală sền gŏ bềng bơta kwơ tàm tiah nhàr lơgar càr Dăk Lăk. Mờ uă cau bơsram dờng, do là dơ̆ sơnrờp jă jơng tus tiah nhàr lơgar, să tờm tơn tam tìp mờ kwang bàng cau ling gam lơh kơnòl broă mờ sền gŏ tơn rài kis gam uă kal ke bơh làng bol dê. Nguyễn Phú Qúy, là cau bơsram dờng Klờng Đại họk Đah Jum Cần Thơ, yal:

“Tŭ oh lơh broă hơ̆ den oh gŏ gơlơh là gơdan gơkờñ ngan mờ chờ ngan. Gơ wèt mờ oh là dồ nă cau kơnòm să den oh geh bơta pràn, geh bơta jơh nùs mờ bơceh lơh den oh rơ̆p tơrgùm tê bal mờ ală bơyô cau bơsram dờng nàng dong kờl tơl nă cau”.

Tơl broă lơh bơ̆t bơtàu mìng là dồ bơnah broă dềt lơm, mơya tŭ gơlik bơh jơnau kờñ bơh làng bol dê mờ geh lơh bơh nùs nhơm geh kơnòl bơh rơnàng kơnòm să dê, ală tă pơgồp hơ̆ gam lơh gơlik gơs bơta tam gơl ai ală ƀòn tiah nhàr lơgar càr Dăk Lăk in.