Đơs sơn đờm Pơrjum, Củ tịc Quốk hội ồng Trần Thanh Mẫn pà git, Dơ̆ pơrjum dơ̆ 9, Quốk hội khoă XV sơn đờm tàm ngai 05 nhai 5 (tơnơ̆ dơ̆ ơm rơlô Ngai 30 nhai 4 mờ ngai 01 nhai 5 tơn), geh lơh tàm 2 dơ̆ nàng sền swì, lơh nền bơnah broă lơh uă ngan, uă tơngu me geh bơta jal mhar, kwơ màng pa geh Dà lơgar ring bal gùng dà broă lơh tàm Pơrjum dơ̆ 11.

Kờp dŭ dơ̆ pơrjum do rơ̆p sền swì, lơh nền 45 tơngu me bè broă lơh adăt gơrềng tus broă rơndăp tăp sèng mpồl lơh broă sră nggal gơnoar ătbồ ală kấp, tơrmù di pal mpồl lơh broă; 14 mpồl tơngu me bè lơh sa mpồl bơtiàn, kes priă dà lơgar, jăt sền mờ ală bơta kwơ màng ndai. Tàm Pơrjum, Thủ tướng Cíñ phủ ồng Phạm Minh Chính đơs nền: Cíñ phủ rơ̆p lơh ngan jơh pràn, iăt mờ nền nòn lơh jăt ală jơnau đơs pơgồp bal nàng dơ̆ Pơrjum lơh geh cồng nha niam ngan rlau jơh. Ală tơngu me yal Quốk hội neh geh kơlôi sơnơng nền nòn, tàm nùs nhơm ai bơta kwơ dà lơgar, jơi bơtiàn lài jơh. Thủ tướng tơlik nùs nhơm pin dờn, mờ broă đơng lam bơh Đảng, broă ring bal bơh Cíñ phủ, broă dùl nùs bal bơh Quốk hội, bơta kờñ bal bơh Làng bol, Dơ̆ pơrjum dơ̆ 9 rơ̆p geh cồng nha niam bơnĕ; pơn jăt tai lơh gơrề jrô, uă bè bơta kwơ màng bơh dơ̆ tam gơl bơta yau gơgơs bơta pa tơmù di pal mpồl lơh broă sră nggal gơnoar ătbồ.