Pơn jat tai broă lơh Pơrjum ờ bè ờs dơ̆ 9, Quôk hội khoă 15, ngai do 15/02, ală cau ala mat cribơyai tàm jơnum bè rơndăp broă lơh Adat Rơndăp gơnoar atbồ ƀòn lơgar (tam gơl); Ală jơnau neh lơh nền bơtơl bè bơtàu tơnguh lơh sa- mpồl bơtiàn nam 2025 mờ jơnau kờñ gơguh lơh sa lơh geh 8%; Gùng dà broă lơh bơcri priă lơh rơndăp broă lơh lơh gùng rơndeh ồs Lào Cai - Hà Nội - Hải Phòng; Jơnau rcang cih Jơnau lơh nền tàm pơrjum bơh Quôk hội dê lơh tơrlòng lài bàr pe gùng dà, broă lơh krơi is, is ồn nàng lơh uă ală gùng rơndeh ồs tiah drà tàm ƀòn dờng Hà Nội mờ ƀòn dờng Hồ Chí Minh. Ală jơnau neh lơh nền lơh uă ală gùng rơndeh ồs tiah drà tàm Hà Nội mờ ƀòn dờng Hồ Chí Minh geh Ƀộ Cíñ trị ring bal, nàng lơh uă ală gùng rơndeh ồs tiah drà tus nam 2045, kờp dŭ kờp jơh jơnau kờñ priă tă lơh bơh Hà Nội dê là pơgăp 62 tơmàn dolar Mỹ mờ ƀòn dờng Hồ Chí Minh pơgăp 67 tơmàn dolar Mỹ.

Jơnau kờñ tềng đăp mat geh Hà Nội mờ ƀòn dờng Hồ Chí Minh ai tơlik là, tus nam 2035 ai lòt tê 17 gơl gùng, gơl gùng mờ kờp jơh bơta jòng pơgăp 752 kơi sồ, dờp geh bơh 35 tus 50% bơnah gùng jun pơniang năc mpồl bơtiàn dê. Tus nam 2045, dờp geh bơh 50-60% bơnah gùng jun pơndiang năc mpồl bơtiàn. Bơh bơta geh ngan lam lơh ală rơndăp broă lơh gùng rơndeh ồs tiah drà  tàm tơngai pa do, ală Cau ala mat Quôk hội đơs là, broă ai lơh jat gùng dà krơi is là kờñ pal geh ngan. Hà Nội mờ ƀòn dờng Hồ Chí Minh là ală tiah gơguh lơh sa, là tiah tờm lơh sa, geh pràn lơh gơrề uă. Broă ai lơh jat Jơnau lơh nền tàm pơrjum gùng dà krơi is nàng lơh uă ală gùng rơndeh ồs tàm Hà Nội mờ ƀòn dờng Hồ Chí Minh dong hòi tơrgùm uă ngan rlau jơh bơta pràn, lơh geh ală bơta ƀuơn ai 2 ƀòn dờng in lơh jat geh cồng nha jơnau kờñ lơh uă ală gùng rơndeh ồs tiah drà pal pa ngan, kơ̆ kơl jăp jŏ jòng.