Đơs tơn jơh pơrjum, Củ tịc Quôk hội ồng Trần Thanh Mẫn đơs là do là tềl tơngŏ kwơ màng tàm broă lơh lơh adat boh lam, geh gơtha kwơ màng drơng broă lơh rơndăp tăp sèng, tơrmù mpồl lơh broă bơh ală anih lơh broă cíñ trị dê mờ di tŭ tă bơsong kal ke, kòl yan bè gùng dà, broă lơh, lơh geh bơta tam gơl pràn nàng lơh sir ală phan bơna bơt bơtàu, ngui niam priă jền, bơceh lơh ù tiah bơtàu tơnguh pa ai ală tiah mờ jơh gùt lơgar in. Broă lơh kwang bàng kung neh geh lơh jat niam, jat di mờ jơnau cih bơh Đảng, adat boh lam Dà lơgar dê, lơh geh bơta ring bal, dồ nùs bal uă bơh ală cau ala mat Quôk hội dê.

Củ tịc Quôk hội ồng Trần Thanh Mẫn sồr Cíñ phủ pơnđơl pràn lơh ngan uă ngan rlau jơh nàng bơt bơtàu ală broă rơndăp lơh, sră nggal geh gơrềng nền nòn tơngume geh jàu tàm ală adat mờ Jơnau lơh nền tàm pơrjum bơh Quôk hội dê; ală anih lơh broă mhar kờp sền nàng tam gơl, bơtơl tơngume geh ngan tàm ală sră nggal geh gơrềng adat boh lam geh gơrềng tus rơndăp tăp sèng mpồl lơh broă kwang bàng pal bơsong mơ, geh bơta krơi is, mờ ờ gơtùi bơsong jat jơnau pal jat bal nàng ai lơh jat jat gơnăp gơnoar.