Tơnơ̆ mờ hơ̆, Quốk hội bơyai lơh tơn jơh dơ̆ pơrjum ờ bè ờs dơ̆ 9. Bàr pe Jơnau lơh nền tàm pơrjum geh Quốk hội pờ tê ring bal tàm drim ngai do (19/02), tàm hơ̆ geh: Jơnau lơh nền tàm pơrjum bơh Quốk hội bè gùng dà bơcri priă rơndăp broă lơh bơcri priă lơh gơl gùng rơndeh ồs Lào Cai - Hà Nội - Hải Phòng; Jơnau lơh nền tàm pơrjum tơrlòng lơh ờ uă gùng dà, broă lơh krơi is, is ồn nàng bơtàu tơnguh ală gùng rơndeh ồs tiah  drà tàm ƀòn dờng Hà Nội, ƀòn dờng Hồ Chí Minh; Jơnau lơh nền tàm pơrjum bè ală gùng dà, broă lơh krơi is bơcri priă lơh rơndăp broă lơh ồs đèng hạt ñân Ninh Thuận; Adăt  Ai lơh jăt sră nggal cih tơnggume kơrnoat boh lam (tam gơl); Adăt Rơndăp gơnoar atbồ ƀòn lơgar (tam gơl); Jơnau lơh nền tàm pơrjum cih bè bơsong ờ uă bơta gơrềng tus broă rơndăp tăp sèng mpồl kwang bàng mpồl lơh broă dà lơgar; Jơnau lơh nền tàm pơrjum  bơtơl broă rơndăp lơh bơtàu tơnguh lơh sa- mpồl bơtiàn nam 2025 mờ jơnau kờñ gơguh 8% rơlao hơđang; Jơnau lơh nền tàm pơrjum lơh tơrlòng lài ờ uă broă lơh nàng tă bơsong bơta gơkòl tàm lơh lơh broă jak chài, măi mok mờ tam gơl pa bơceh lơh.

Lài hơ̆, ngai 18/02, Quôk hội cribơyai, pờ tê ring bal Jơnau lơh nền tàm pơrjum bơh Quôk hội dê bè rơndăp tăp sèng wơl bơh Cíñ phủ dê, Jơnau lơh nền tàm pơrjum bơh Quôk hội dê bè rơndăp tăp sèng khà kwang bàng Cíñ phủ tơngai lơh broă Quôk hội khoă 15 (tam gơl). Jat hơ̆, rơndăp tăp sèng wơl bơh Cíñ phủ dê geh 14 Ƀộ mờ 3 anih lơh broă drờm mờ Ƀộ. Bè rơndăp tăp sèng wơl khà kwang bàng Cíñ phủ geh 25 nă geh Thủ tướng Cíñ phủ; 7 Phó Thủ tướng Cíñ phủ; 14 Ƀộ trưởng ală Ƀộ mờ 3 Kwang atbồ anih lơh broă ndrờm mờ Ƀộ . Quôk hội kung neh ring bal pồ ồng Mai Văn Chính mờ ồng Nguyễn Chí Dũng at gơnoar broă Phó Thủ tướng Cíñ phủ, 4 Ƀộ trưởng geh ring bal tàm dơ̆ do, geh: Ƀộ trưởng Ƀộ Bơt bơtàu ồng Trần Hồng Minh, Ƀộ trưởng Ƀộ Jak chài mờ Măi mok ồng Nguyễn Mạnh Hùng, Ƀộ trưởng Ƀộ Broă lơh sa suơn sre mờ Tiah ơm kis ồng Đỗ Đức Duy, Ƀộ trưởng Ƀộ Jơi bơtiàn mờ gah Pin dờn jat Yàng ồng Đào Ngọc Dung.