Gơguh tai 9 nhai bơh càr Dăk Lăk dê lơh geh 8,22%, lơyah rlau mờ broă rơndăp lơh geh ai; nàng lơh geh jơnau kờñ gơguh tai bơh 10% rlau hơđang tàm nam do, qúy 4 càr kờñ pal gơguh tai rlau 13%. Dăk Lăk gam tơrgùm tă bơsong ală bơta gơ kòl bè bơcri priă dà lơgar, ù tiah, ai mat ù, mơkung sơlơ tơnguh tai ală bơta pràn neh gơ hòi gơ jà gờñ gơ lòt mut tàm broă lơh sa, kă bro. 9 nhai nam 2026, càr Dăk Lăk neh tơrgùm tă bơsong ală bơta gơ kòl bè kơrnoat boh lam, ù tiah, ai mat ù mờ bơcri priă dà lơgar jat jơnau pal jat “6 loh”. Gơguh tai 9 nhai bơh càr dê lơh geh 8,22%; priă lơh geh tăc phan mờ lơgar ndai lơh geh rlau 2 tơmàn 300 tơlak dolar Mỹ; lòt nhơl tam gơl pràn wă pơgăp 8 tơlak 340 rơbô dơ̆ năc. Nàng lơh geh jơnau kờñ gơguh tai 2 nơm khà, qúy 4 Dăk Lăk kờñ pơn đơl pràn lơh ngan gơguh tai lơh geh rlau 13%.

Ồng Đỗ Hữu Huy, Chủ tịch Anih duh broă Làng bol càr Dăk Lăk pà gĭt, tàm 3 nhai lồi nam, càr gam pal tă dia 7 rơbô 254 tơmàn đong mờ ai 8 rơbô 702 tơmàn đong priă bơcri dà lơgar. Mơkung sồr qúy 4 pal tam gơl pràn broă đơng lam, ờ mìng tơrgùm lơh sir ală broă jàu lơm mờ pal lơh geh tai phan bơna mờ bơta kwơ ngan ngồn.