Tàm ală ngai do, tàm ală gơl gùng tàm sàh Đăk Ngọk, kơnhoàl Đăk Hà, càr Kon Tum ndrờm gơcrà bồng bi pơrhê, bal mờ bơkào. Lài mờ tŭ wă rò Satềp nam pa Ất Tỵ 2025, Đảng ƀộ sàh Đăk Ngọk neh bơyai lơh geh cồng nha Pơrjum dờng cau ala măt dơ̆ III, tơngai lơh broă bơh nam 2025 tus 2030. Do là broă lơh cíñ trị kwơ màng ờ mìng bơh 239 nă đảng viên mờ gam là nùs nhơm pin dờn, jơnau kơ̆p kờñ bơh mờr 5 rơbô nă làng bol kis tàm sàh do dê.

Ồng Lê Văn Y, kis tàm thôn Đăk Tin tơlik nùs nhơm kơ̆p kờñ bè do: “Nam 2013 là nam sơnrờp crơng gơs sàh Đăk Ngọk, làng bol gam tìp uă ngan kal ke, gùng lòt den mbè lơh gơrềng ờ niam uă ngan tus rài kis, lơh broă sa bơh làng bol dê. Bơh 10 nam bơ̆t bơtàu mờ bơtàu tơnguh bal mờ dùl mpồl kwang bàng đơng lam ring bal, tam klăc bal sàh Đăk Ngọk tŭ do neh bơtàu tơnguh pràn ngan. Tŭ do sàh neh lơh gơs 19 tàm 19 khà broă ƀòn lơgar pa mờ rài kis làng bol tŭ do den chờ hờp ngan”.

Tàm tơngai lơh broă pa do, 12 ci ƀộ mờ 239 nă đảng viên tàm sàh Đăk Ngọk sùm là mpồl lam lài tàm broă bơtàu tơnguh lơh sa mpồl bơtiàn tơnguh uă rài kis làng bol. Tus tŭ do, 4 tàm 7 thôn bơh sàh dê geh dờp ƀòn lơgar pa lam lài, 2 thôn geh dờp thôn ƀòn lơgar pa tiah jơi bơtiàn ờ gal cau. Gùt sàh tŭ do mìng gam 8 hìu rơƀah. Ồng A Xen, kòn cau Sơdàng, kis tàm ƀòn Đăk Kđem, pà git: “Lài do den ƀòn kung kal ke ngan, bơh 2 nam do den làng bol neh gơguh jăk tam gơl phan tam, phan ròng. Làng bol lơh sa mìng lơh kòi sre mờ tam kơphe. Kung kơnờm mờ broă sền gròi bơh Đảng, gơnoar atbồ tus mờ làng bol, den tàng bơh tŭ hơ̆, làng bol tŭ do neh brồ să”.

Tơngai lơh broă pa do, tàm 26 khà broă sàh Đăk Ngọk lơh gơs geh uă khà broă kwơ màng lơh geh cồng nha pơnrơ ngan bè: priă geh tơl nă làng bol geh rơlao 70 tơlăk đong, bơ̆t bơtàu sàh geh khà ƀòn lơgar pa tơnguh uă; khà hìu rơƀah gơmù mhar. Ồng Phan Tiến Dũnh, Ƀí thư Ci ƀộ mờ kung là Kwang lam bồ broă Mặt trận thôn Đăk Bình yal bè broă mờng chài bơ̆t bơtàu ƀòn lơgar pa lam lài: “Ci ƀộ đơng lam mờ jơnau lơh nền tàm pơrjum pah nhai. Mblàng yal làng bol lơh jăt tơl ală khà broă. 19 khà broă tŭ do neh lơh geh mờ bol añ neh gơs dùl ƀòn lơgar pa lam lài bồ nam 2024 geh Anih duh broă Làng bol kơnhoàl dờp. Bơh dùl thôn mìng lơh sa suơn sre, bồ tơngai lơh broă pa geh 55 tơlăk đong tàm 1 nă, tus lồi tơngai lơh broă geh mờr 80 tơlăk đong tàm 1 nă. Mờ broă lơh ngan bơh mpồl lơh broă cíñ trị ai geh bơta hờm ram gơboh gơbài làng bol in”.

Tam gơl bồ tơngoh tàm broă lơh sa bơh làng bol dê neh ai geh bơta pràn rài kis pa ai ƀòn lơgar Đăk Ngọk in. Sàh neh lơh geh 6 mpồl lơh broă mờ 2 mpồl lơh broă bal. Broă bơtàu tơnguh lơh sa mpồl neh pơgồp bal tàm broă tơnguh uă cồng nha lơh broă, bơta kwơ geh bơh 450 lồ ù lơh sre, rơlao 1 rơbô 600 lồ ù tam kơphe bal mờ git nđờ rơhiang lồ ù tam tờm chi sa plai mờ chi lơh sơnơm.

Mờ broă lơh ngan pơn jăt tai lơh pràn broă bơtàu tơnguh lơh sa mpồl bơtiàn kơl jăp, Pơrjum dờng cau ala măt Đảng ƀộ sàh Đăk Ngọk tơngai lơh broă bơh nam 2025 tus 2030 neh ai, bơ̆t bơtàu sàh geh khà ƀòn lơgar pa lam lài, priă geh tơl nă làng bol geh rơlao 78 tơlăk đong tàm 1 nam… Mò Y Sương, Phó Ƀí thư Đảng ủy, Củ tịc Anih duh broă Làng bol sàh Đăk Ngọk pà git: “Đảng ƀộ sồr ală gah, mpồl lơh broă mờ ală broă lơh, broă rơndăp lơh mùl màl nàng lơh pah nam mờ tơl tơngai. Hòi jà broă tus bal bơh gùt làng bol tàm sàh dê tàm broă bơ̆t bơtàu ƀòn lơgar pa lam lài. Bal mờ hơ̆ tơnguh uă broă lam lài bơh cau lam bồ bal mờ kơnòl bơh cau pơlam lơh jăt ală tơngu me broă lơh. Tơrgùm tàm ală kơnòl broă, gùng dà broă lơh nàng bơtàu tơnguh bè lơh sa mpồl bơtiàn, lơngăp lơngai sền gàr dà lơgar bal mờ bơ̆t bơtàu mpồl lơh broă cíñ trị tàm sàh dê. Sền gròi bè rài kis broă lơh broă sa mpồl bơtiàn, bè jơi bơtiàn jăt yàng geh ring bal mờ kơ̆p kơl jăp”.

Broă tam gơl să pràn kơl dang bơh sàh Đăk Ngọk, kơnhoàl Đăk Hà, càr Kon Tum tàm ală nam do là cơng tàng loh làng ngan bè broă đơng lam bồ di pal bơh mpồl Đảng bal mờ nùs nhơm làng bol tam klăc bal. Lơh bơnàng jă nàng lơh geh cồng nha, sàh Đăk Ngọk pin dờn chờ gờm nam pa 2025 pràn kơl dang mŭt tus jơnau kờñ bơ̆t bơtàu ƀòn lơgar pas gơs, niam bơnĕ, lam lài.