Đơng lam bồ 2 càr Dăk Nông mờ Lâm Đồng ring bal, tă lài priă nàng lơh niam wơl gùng dờng 28 gơl lòt gan Gia Nghĩa – Dăk Som – Di Linh jòng mờr 104 kơi sồ. Gơl gùng do geh kuơ dờng ngan tàm broă tơrbŏ bal gùng dờng 14 mờ gùng dờng 20, ngui geh cồng nha bơta pràn bơtàu tơnguh bơh tiah do dê. Bàr càr kung ring bal lam lơh rơndap broă lơh gơl gùng pa bơh Gia Nghĩa, càr Dăk Nông tus Bảo Lâm, càr Lâm Đồng, pơgồp bơnah tơrmù lơyah gơl gùng tus Bảo Lộc mờr 25 kơi sồ, tơrmù ƀà bơta kơn jơ̆ ai gùng dờng 28 in, mờ kung tàm tơrbŏ bal tiah tờm lơh sa mờ măi mok bauxite Tân Rai mờ Nhân Cơ – bàr rơndap broă lơh dờng bơh tiah do dê. Ală càr kung sồr lơh broă lòt sền gơl gùng rơndeh lòt mhar tơrbŏ bal ƀòn dờng Phan Thiết, càr Bình Thuận – ƀòn dờng Dà Làc, càr Lâm Đồng – ƀòn dờng Gia Nghĩa, càr Dăk Nông nàng rơ wah rơndap broă lơh bơcri priă ai gơl gùng rềp ngan rlau jơh, tềm pềr ngan rlau jơh.