Jat rơndap ù tiah lơh ală gơl gùng lòt ù gờl tơngai bơh nam 2021 tus nam 2030, broă rơndap lơh tus nam 2050, gơl gùng rơndeh lòt mhar Quảng Ngãi – Kon Tum jòng 136 kơi sồ, geh 4 bơnàng gùng, broă rơndap lơh bơcri priă lài mờ nam 2030. Tŭ do, gơnoar atbồ 2 càr Kon Tum mờ Quảng Ngãi neh pơrjum mờ ring bal dan Ƀộ Bơt bơtàu lơh gùng rơndeh lòt mhar mờ kờp jơh priă bơcri mờr 35 rbô 400 tơmàn đong, gơwèt mpồl rơndap broă lơh kuơmàng dà lơgar.

Jat jơnau dan, gùng rơndeh lòt mhar Quảng Ngãi – Kon Tum lòt gan 5 tiah là ƀòn drà dờng Đức Phổ, kơnhoàl Ba Tơ (jòng 58 kơi sồ gơ wèt ù tiah càr Quảng Ngãi) mờ 3 kơnhoàl là Kon Plông, Kon Rẫy mờ ƀòn dờng Kon Tum (jòng 78 kơi sồ gơ wèt ù tiah càr Kon Tum). Gùng rơndeh lòt mhar kờp dŭ geh 4 bơnàng gùng, rat rơndeh lòt bơceh lơh bơh 80 tus 100 kơi sồ dùl jơ. Tàm gơl gùng geh 9 anih tàm tìp, gàr gùng lòt mờ ală gơl gùng tờm, tiah tờm lơh sa, niam chài, cíñ trị ƀuơn ƀuài. Bơdìh hơ̆ tai, gơl gùng rơndeh lòt mhar kờp dŭ lơh 60 nơm rbàng hơđang gơl gùng tờm, 10 nơm rbàng ƀă gan mờ 3 nơm trồm.

Bơh jơnau dan 2 càr dê, pa do, Ƀộ Bơt bơtàu neh geh jơnau lơh nền jàu Mpồl atbồ rơndap broă lơh sồ 85 bơyai lơh lơh jơnau yal kơlôi sơnơng lài bơta gơtùi lam lơh ngan ngồn rơndap broă lơh bơcri priă lơh gùng rơndeh lòt mhar Quảng Ngãi – Kon Tum. Mpồl atbồ rơndap broă lơh sồ 85 rơcang lài lơh broă mờ ală anih lơh broă, mpồl lơh broă geh gơ rềng nàng dờp jơh ală cồng nha kơlôi sơnơng neh lơh nàng pơn jat tai kơlôi sơnơng, lơh jơnau yal dan lơh nền bơcri priă rơndap broă lơh, pleh gơtìp rơndap rơndồl, pơhì pơhà.

Ồng Đàm Phúc Tuyên – Lam bồ phó Sờh Bơt bơtàu càr Kon Tum pà git, rơndap broă lơh gùng rơndeh lòt mhar Quảng Ngãi – Kon Tum, mìng is bơnah broă ai ù lơh rơndap broă kờp dŭ priă tă lơh rlau 1 rbô 200 tơmàn đong. Bàr càr hơ pơrgon rơp tă tơl priă nàng lơh gơs broă ai ù lơh rơndap broă, jàu drơng broă lam lơh rơndap broă tàm nam 2026. Đah càr Kon Tum rơcang mờr 650 tơmàn đong ai broă ai ù lơh rơndap broă in. Ai mờng chài bơh ală rơndap broă lơh ndai, càr neh kờp dŭ lài ală kal ke nàng rơcang lài geh broă rơndap lơh lam lơh ai ù lơh rơndap broă.

Ồng Đàm Phúc Tuyên pà git, broă lơh gùng rơndeh lòt mhar Quảng Ngãi – Kon Tum ờ mìng tơrmù lơyah bơta yah ngài, chồl tơnguh kă bro mờ gam là bơta pràn chul chồl dờng ngan nàng Măng Đen lơh gơs bơta tam gơl pràn tàm bơtàu tơnguh lòt nhơl. Dilah gùng rơndeh lòt mhar geh bơcri priă gờñ rơp lơh Măng Đen gơ gơs tiah tờm lòt nhơl brê bơnơm dờng ngan bơh Tây Nguyên dê, mờ kung dong Kon Tum mờ Quảng Ngãi gơ gơs là tiah tiơng pơn rơ lơh sa bơh tiah tàm gùl lơgar mờ Tây Nguyên dê.

Bal mờ hơ̆, gùng rơndeh lòt mhar Quảng Ngãi – Kon Tum gam pơgồp bơnah lơh gơs ală gơl gùng ù gờl, gơ tàm tơrbŏ bal mờ gùng rơndeh lòt mhar tiah đah mat tơngai lik – tiah đah mat tơngai mut, tàm tơrbŏ bal mờ gùng tiah đah tô – tiah đah jum dà lơgar; dong tơrmù priă pơndiang mờ ai ală phan geh lơh bơh dơm chi, tờm chi lơh sơnơm, kau su, mắk ka, kơphe tus anih ơhò ơm tàm dà lềng Dung Quất ƀuơn ƀuài. Kuơmàng, gùng do gam drơng niam ai broă rơndap lơh bơt bơtàu mờ sền gàr dà lơgar dê, mờ càr Quảng Ngãi, Kon Tum mờ tiah Tây Nguyên, tiah kềng gah dà lềng tàm gùl lơgar kung bè tàm tơrbŏ bal tiah pe mum bơtàu tơnguh Việt Nam – Lào – Campuchia.