Jat Thứ trưởng Ƀộ Broă dơlam is mò Nguyễn Thị Hà, kấp sàh tơnơ̆ tŭ tơmut bal rơ̆p geh tơnggơs ală Anih tờm sră nggal gơnoar atbồ Dà lơgar nàng dờp mờ bơsong sră nggal gơnoar atbồ ai làng bol mờ mpồl lơh sa kă bro in. Ală sră nggal lài do gơwèt gơnăp gơnoar kấp kơnhoàl rơ̆p geh jàu tơn rê tàm kấp sàh. Broă lơh bơsong sră nggal gơnoar atbồ rơ̆p geh tơrmù di pal, koh tơrmù broă lơh tàm gùl: “Gơnoar atbồ ƀòn lơgar kấp sàh rơ̆p geh jàu uă gơnăp gơnoar rlau tai, rơndăp tăp sèng mpồl lơh broă mờ broă kông cứk, cau lơh broă Dà lơgar kung rơ̆p geh tam gơl pa, gàr niam digơlan là lơh geh jơnau sồr kơnòl broă dê. Bè ală sră nggal gơnoar atbồ lài do lơh jat tàm kấp kơnhoàl den rơ̆p bơh kấp sàh dê tơn lơh jat. Den tàng là kung pal sơlơ tơnguh tai ngui măi mok yal tơngĭt jơnau, tam gơl sồ lơh ƀuơn ngan broă lơh, sră nggal mờ tơn lơyah tơngai lơh sră nggal gơnoar atbồ drơng ai làng bol mờ mpồl lơh sa kă bro in niam rlau tai”.

Tiến sìh Nguyễn Văn Đáng, Hìu bơsram Kơlôi sơnơng Cíñ trị Dà lơgar Hồ Chí Minh đơs là: ờ rơndăp rơndăp gơnoar atbồ kấp kơnhoàl, pơgăp 2 bơnah 3 kơnòl broă bơh kấp kơnhoàl dê rơ̆p geh jàu tàm kấp ƀòn lơgar. Mờ sàh, sơnah ƀòn kung rơ̆p jàu gơnoar uă rlau tai, gơ gơs ală mpồl atbồ Dà lơgar ngan ngồn rềp mềr mờ làng bol: “Bol he pal lơh wơl nàng rơndăp wơl gơnoar broă, kơnòl broă bơh gơnoar atbồ kấp sàh dê mbè lơi? Bè bơta kwơ màng den jơh ală broă dờng kwơ màng ngan rlau jơh ai làng bol ai mpồl lơh sa kă bro in den tàng tơmù tàm kấp sàh, nàng ngan ngồn là gơnoar atbồ jat nền jơnau kờñ bơh làng bol mờ mpồl lơh sa kă bro mờ bơh hơ̆ wèt tus di gơnoar broă là rềp làng bol, drơng broă mờ drơng làng bol niam ngan rlau jơh pơndrờm mờ lài do’.

Tàm tơngai ală anih lơh broă gơnoar atbồ ƀòn lơgar gam geh rơndăp tăp sèng wơl jat gùng dà tơrmù dipal, gơtùi lơh broă mờ geh cồng nha, mpồl lơh broă kông cứk kấp sàh rơ̆p pal àñ ơnòng tai uă kơnòl broă pa, mờ mpồl broă lơh ngai sơlơ dờng mờ jơnau sồr ờs mờng lơh broă ngai sơlơ uă. Bơta do ai tơlik jơnau kờñ kwơ màng pal yờ tơnguh uă bơta pràn jak, bơta gĭt wă mờ cồng nha lơh broă bơh mpồl kwang bàng, kông cứk kấp sàh dê nàng lơh geh bơta kơ̆p kờñ bè dùl rài sră nggal gơnoar atbồ pa ngan, rềp làng bol mờ drơng broă làng bol niam rlau tai. Tiến sìh Nguyễn Đức Hà, lài do là Kwang bàng Mpồl Rơndăp broă Dà lơgar, đơs nùs nhơm he dê: “Sồr kwang bàng kấp sàh là rềp làng bol mềr mờ làng bol, bơsong tơn ală broă geh gơrềng tus mờ làng bol. Dơ̆ 2 là gĭt nđờ gùng dà broă lơh bơh Đảng, Dà lơgar ndrờm tơrgùm mù tàm ƀòn lơgar jơh lơm, den tàng kwang bàng kấp sàh pal geh bơta pràn jak uă gah, hơ̆ là oh mi lơh dùl broă mơya kung pal gĭt uă broă ndai tai, geh bè hơ̆ den hơ̆ sồng gơtùi lơh geh broă lơh”.

Kấp sàh pa pal tơl bơta pràn jak lơh jat ală kơnòl broă geh jàu, mơya kung gam gàr niam bơta rềp mềr mờ làng bol tàm ƀòn lơgar. Den tàng, ồng Hoàng Văn Cường, Cau ala mat Quôk hội khoă 15 sồr tơnguh tam pà kấp, tam pà gơnoar ai kấp sàh in jat jơnau pal jat “ƀòn lơgar lơh nền, ƀòn lơgar lơh, ƀòn lơgar kong kơnòl”: “Bol he kung pal geh broă lơh là tam pà kấp, tam là gơnoar mơya kơnòl pal lòt jat gơnăp gơnoar. Gơnăp gơnoar hơ̆ den pal pơgồp bal mờ kơnòl broă wơl tai. Bol he pal geh dùl broă lơh lòt sền, jat sền, sền sơwì nàng gàr niam là kwang bàng đah đơm ờ lơh jat ală gơnoar broă, kơnòl broă dùl bă khat dồ lơh. Tam pà kấp, tam pà gơnoar pal lơh jat niam ală jơnau sồr bơh Dà lơgar dê, mơkung nàng lơh geh di tŭ mờ jơnau kờñ bơh làng bol dê tai”.

Tàm dùl gah ndai, Phó Pơgru dờng- Tiến sìh Đinh Xuân Thảo, lài do là Kwang lam bồ Hìu bơsram Kơlôi sơnơng lơh adat boh lam bơh Quôk hội dê đơs là, tơnguh tam pà gơnoar ai kấp sàh in mơya pal geh bơta tàm tơrbŏ bal đah kấp càr mờ kấp sàh nàng gàr niam tơl broă lơh geh lơh niam mờ geh cồng nha: “Ngan ngồn tàm do là kấp càr mù tơn tàm kấp sàh mờ pal geh bơta tàm tơrbŏ bal niam, geh sùm, gàr niam là lơh bal sùm nàng kấp sàh bơsong geh broă lơh dồ bă geh cồng nha bơh bơta atbồ, sền gĭt, jat sền mờ bơto pơlam mờ dong kờl di tŭ bơh kấp càr dê. Do là broă kwơ màng kờñ pal geh ngan, kwơ màng nàng gàr niam ai bơta rcang is, kong kơnòl is mờ lơh sir niam ngan kơnòl broă atbồ bơh gơnoar atbồ kấp sàh geh lơh dờng tơnơ̆ tơmut bal”.

Đơs pơndŭt tàm pơrjum tơn jơh Pơrjum Dà lơgar 11, khoă 13, Tổng Ƀí thư ồng Tô Lâm neh đơs sùm, mờ broă lơh rơndăp tăp sèng sră nggal gơnoar atbồ pa, kấp càr rơ̆p at gơnoar broă 2 dơ̆, là kấp lơh jat tơn gùng dà broă lơh bơh Dà lơgar dê jàu, mơkung là kấp rcang lài ai lơh jat broă lơh di pal mờ bơta geh ngan bơtàu tơnguh bơh ƀòn lơgar dê, mơkung đơng lam, atbồ tơl làm tơn broă lơh bơh kấp sàh dê. Tàm tŭ hơ̆, kấp sàh geh sền gĭt là kấp tờm ngan rơndăp tăp sèng lơh jat ală broă lơh bơh Dà lơgar mờ kấp càr mơya rơ̆p sơlơ tơnguh tai pràn ngan tam pà kấp, tam pà gơnoar. Gơnoar atbồ kấp sàh kung rơ̆p geh gơnăp gơnoar ai lơh jat sră nggal geh gơrềng adat boh lam dê nàng lơh nền broă lơh jat adat boh lam tàm ală tiah mờ bơsong ală broă gơwèt gơnăp gơnoar bơh he dê. Tổng Ƀí thư kung đơs nền, gơnoar atbồ ƀòn lơgar tơnơ̆ rơndăp tăp sèng pal lơh geh jơnau sồr tơrmù di pal, geh cồng nha, rềp làng bol mờ tơl bơta pràn jak atbồ mpồl bơtiàn tàm tơngai pa tŭ do, wèt tus jơnau kờñ gơguh lơh sa mhar, bơtàu tơnguh kơ̆ kơl jăp jŏ jòng, drơng broă niam rlau tai rài kis làng bol in.