Bàr ngai tơnơ̆ tŭ ƀòn Nhin tơmŭt bal mờ thôn Nghĩa Hưng 1 mờ Nghĩa Hưng 2 gơ gơs thôn Nghĩa Hưng 2, sàh Biển Hồ, bi Siu Ayun, cau geh bơngă pin dờn bơh ƀòn dê, neh bal mờ lam bồ thôn lòt sền ală gơl gùng mờ làng bol kơ̆p kờñ gờñ geh lơh mờ bê tông. Tơnơ̆ tŭ tơmŭt bal, bơta mờ làng bol sền gròi ờ mìng là mat sơnđan pa bơh thôn dê lơm mờ là ală broă drơng broă làng bol geh bơsong mhar rlau halà ờ. Bi Siu Ayun pà gĭt, tŭ pa iăt gùng dà broă lơh tơmŭt bal mờ 2 thôn uă ngan là cau Yoan, uă cau tàm ƀòn neh geh bơta kơlôi sơnơng tài bơta krơi is bè bơhiàn, rài kis pah ngai dê.

Mơya bơh uă dơ̆ tìp mat tơm bơh bơr, mblàng yal mờ hòi jà, làng bol rơ hời wă là, broă rơndăp tăp sèng ờ lơh roh tĕ bơhiàn niam chài is bơh ƀòn dê, mờ là lơh geh ală bơta nàng ală mpồl bơtiàn in tam klăc, dong kờl bơtàu tơnguh bal. "Bè pa do là bol añ kung ờ hềt wă loh sơl, kung geh jơnau đơs bè broă gùng lòt tàm ƀòn. Lam bồ thôn tŭ do den pal geh bơta bơsram uă rlau, ngăc ngar mờ sơnam kơnòm să rlau, hòi điện là pal iăt mơ. Añ kung kơ̆p kờñ là bơh lam bồ thôn tus broă lơh lơh ai làng bol in, rềp làng bol rlau, gĭt làng bol rlau den geh dong kờl làng bol”.

Kơ̆p kơnờm làng bol rềp gơnoar atbồ, gơnoar atbồ rềp làng bol kung ai tơlik jơnau sồr pa gơwèt mờ mpồl kwang bàng tàm kấp hơ đơm. Gơwèt mờ bi Đỗ Văn Túc, lam bồ thôn Nghĩa Hưng 2, sàh Biển Hồ, tơnơ̆ 15 nam sùm lơh lam bồ thôn, tơngai lơh broă pa do uă bơta kơn jơ̆ ngan rlau jơh. Tơnơ̆ tŭ tơmŭt bal, thôn geh rlau 600 hìu bơnhă, rlau 2 rơbô 400 nă cau. Ù tiah dờng ơnàng uă rlau 3 dơ̆ pơndrờm mờ lài do. Dilah kung gam atbồ jat broă lơh yau rơ̆p kal ke ngan gĭt di tŭ nùs nhơm, bơta kơ̆p kờñ bơh làng bol dê. Den tàng, tơnơ̆ tŭ geh pồ tơl kwang bàng, Chi bộ mờ Mpồl làng bol thôn neh bơt bơtàu broă rơndăp lơh ngan ngồn ai tơl gah broă, tam pà ù tiah gơs mpồl làng bol ơm kis, jàu kwang bàng in drơng broă tơl mpồl. Kờp dŭ, pah poh, Mpồl làng bol thôn tus tơn tàm tơl tiah làng bol ơm kis pơrjum mờ làng bol, mơkung gàr niam ală mpồl tàm internet nàng dờp, bơsong jơnau yal mhar ngan rlau jơh. “Ù tiah dờng ơnàng, dà đơs mờ niam chài krơi is. Mờr tus nàng ngui măi mok sồ tàm rài kis làng bol dê, ù tiah cau Yoan bè lơi, làng bol kòn cau bè lơi, lơh bè lơi nàng drơng broă làng bol mờ lơh sir geh kơnòl broă, là ală bơta mờ añ kơlôi sơnơng ngan. Tơnơ̆ tŭ dờp geh jơnau lơh nền den añ rơ̆p lơh mờ broă rơndăp lơh do. Lài do añ mìng atbồ làng bol ơm kis dềt den añ lơh krơi, geh bơnah kung ờ lơh jơh nùs sơl. Mơya tŭ do ù tiah dờng ơnàng bè do den pal bơt bơtàu jơnau kờñ, broă rơndăp lơh ngan ngồn pơgồp bal mờ ù tiah dờng ơnàng, khà làng bol ơm kis gal”.

Bơh 40 thôn, ƀòn lài do, tơnơ̆ tŭ rơndăp tăp sèng, sàh Biển Hồ gam 23 mpồl lơh broă, gơmù 42,5%. Bal mờ broă tơrmù niam bơh sơn rờp, tiah do kung pồ tơl mpồl Bí thư Chi bộ, lam bồ thôn jat gùng dà lơh ngan ngồn bè bơta gĭt wă, bơta pràn jak mờ bơta pràn ngui măi mok tàm đơng lam mờ atbồ.

Tàm jơh gùt càr, tus ngai 2/7, Gia Lai neh lơh sir broă rơndăp tăp sèng bơh 2 rơbô 693 gơmù gam 1 rơbô 400 thôn, ƀòn, mpồl làng bol tiah drà, gơmù 1 rơbô 293 mpồl lơh broă, ndrờm mờ 48,01%. Ồng Nguyễn Thanh Vũ, Phó Lam bồ Sờh Broă dơlam is càr Gia Lai pà gĭt, tơrmù bơh sơn rờp mìng là dùl jơnau kờñ bơh broă lơh rơndăp tăp sèng lơm. Bơta kwơ màng ngan rlau jơh là tơnguh cồng nha mpồl kwang bàng kấp hơđơm in nàng gơnoar atbồ kung gam jat nền tàm ù tiah, drơng broă làng bol niam rlau tŭ broă atbồ ngai sơlơ dờng. Càr gam pơn jat tai pồ tơl mpồl kwang bàng, mơkung kờp sền, sền sơ wì mờ bơt bơtàu broă rơndăp lơh bơto bơtê, tề lam mpồl Bí thư Chi bộ, lam bồ thôn jat gùng dà lơh geh jơnau kờñ atbồ tàm kấp hơ đơm tàm tơngai pa. 

Ồng Nguyễn Thanh Vũ pà git: "Jat Jơnau lơh nền tàm pơrjum bơh Chính phủ dê sồ 185 ngai 26/5/2026, tàm hơ̆ jàu gơnăp gơnoar ai càr in pal ai lơh jat jơnau sồr bè jơnau tơl khà, tơnơ̆ hơ̆ geh broă bơto bơtê, tề lam jat gùng dà bơh Dà lơgar dê. Gơwèt mờ ală cau do, sồr pal geh bơta bơsram gĭt wă jơh kấp pe rlau hơ đang. Dơ̆ 2 tai là broă ngui măi mok yal tơngĭt jơnau. Bí thư Chi bộ là pal ngui geh sră điện tử, do là dùl bơnah bơh broă lơh tam gơl sồ dê. Gơwèt mờ mpồl do, pah nam rơ̆p geh ală broă rơndăp lơh bơto bơtê tề lam. Ngan ngồn tŭ pồ tơl mpồl kwang bàng, càr rơ̆p geh broă rơndăp lơh bơto bơtê tề lam gờñ nàng oh mi in bè ờs wơl mờ lơh broă tàm tơngai tus di pal rlau”.

Tơnơ̆ rơndăp tăp sèng thôn, ƀòn, mpồl làng bol tiah drà, càr Gia Lai neh tơrmù niam mờr nggùl tiah bơh sơn rờp tàm kấp hơ đơm dê. Mơya cồng nha bơh gùng dà broă lơh do dê ờ mìng geh kờp mờ khà mpồl lơh broă gơmù lơm mờ gam tàm broă pơn jat tai bơt bơtàu mpồl kwang bàng kấp hơ đơm tơl bơta pràn jak, tam gơl pa gùng dà broă lơh atbồ nàng drơng broă làng bol niam rlau tai.