Jat broă rơndap lơh gam geh càr bơt bơtàu, khà hìu bơsram mầm non gơmù bơh 356 gam 150 hìu bơsram; kâp 1 gơmù bơh 450 hìu bơsram gam 134 hìu bơsram; kâp 2 gơmù bơh 284 hìu bơsram gam 92 hìu bơsram. Tàm tŭ hơ̆, broă lơh tơrlòng lài kâp 1 mờ kâp 2 gơguh bơh 62 hìu bơsram gơguh tus 159 hìu bơsram. Tàm kâp 3, khà hìu bơsram kờp dŭ gơmù 10 hìu bơsram, bơh 78 gơmù gam 68 hìu bơsram. Gah bơto bơsram broă lơh - bơto bơsram sùm kung geh rơndap tap sèng bơh 24 gơmù gam 9 anih tờm, geh 5 anih tờm bơto bơsram broă lơh - bơto bơsram sùm mờ 4 hìu bơsram trung học broă lơh. Khà rơndap tap sèng do kung gơ rềng tơn tus mpồl kwang bàng, cau lơh broă gah Bơto bơsram. Kờp dŭ geh 643 nă Lam bồ hìu bơsram, 780 nă phó lam bồ hìu bơsram mờ 935 nă cau lơh broă gơ wèt mpồl kong gơ rềng. Tơnơ̆ tơmŭt bal, uă hìu bơsram rơp dờng rlau, atbồ uă anih hìu bơsram, sơnĕ hìu bơsram, sồr broă rơndap lơh mờ đơng lam lơh jat pa.

Mò Lê Thị Thanh Xuân, Kwang Lam bồ Sờh Bơto bơtê mờ Bơsram càr Dăk Lăk pà git, gah Bơto bơsram gam pơgồp bal mờ gah Broă dơlam is bơt bơtàu jơnau pal geh bal nàng pơlam ală ƀòn lơgar rơndap mpồl kwang bàng atbồ: “Mờr tus, gah Bơto bơsram kung pơgồp bal mờ gah Broă dơlam is bơt bơtàu jơnau pal geh bal nàng pơlam ală ƀòn lơgar in, nàng lam lơh broă rơndap tap sèng gơ wèt mờ mpồl kwang bàng atbồ. Poh tus den bol hi rơp lơh ngan lơh sir tơngume do. Jơnau sồr anih hìu bơsram tờm geh 1 nă lam bồ hìu bơsram, 1 nă phó lam bồ hìu bơsram, ai ală sơnĕ hìu bơsram den tơl sơnĕ geh rơndap dùl phó lam bồ hìu bơsram”.

Bơta pal sền gròi là bal mờ broă tơrmù khà hìu bơsram, broă geh ai tơlik là gàr niam broă lơh bơh ală hìu bơsram pa dê tơnơ̆ tơmut bal. Tŭ dùl hìu bơsram digơlan geh uă anih bơsram, sơnĕ hìu bơsram, broă sồr pơgru, tŭ jơ lơh broă kwang bàng atbồ dê mờ kơnòl đơng lam lơh jat rơp kal ke rlau.

Ồng Lương Nguyễn Minh Triết, Bí thư Tỉnh ủy càr Dăk Lăk sồr broă rơndap tap sèng, tơmut bal hìu bơsram ờ gŏ di lơh gơ rềng tus kơnòm bơsram. Mpồl Lơh kơnòl broă sùm Tỉnh ủy càr sền bal là ring bal mờ broă rơndap lơh bơh Anih duh broă Làng bol càr yal mờ sồr lơh sir lài mờ ngai 30/8 do. Lài mờ ngai 12/8 pal ai lơh jat jơnau pal geh săc rơ wah lam bồ hìu bơsram, phó kwang lam bồ hìu bơsram; mờ kung lơh loh broă tam pà kâp, jàu gơnoar, kơnòl bơh kwang bàng atbồ dê tàm ală hìu bơsram tơnơ̆ tơmut bal, ngan là ală hìu bơsram geh uă anih bơsram, sơnĕ hìu bơsram: ​​​​​​​“Pal lơh loh broă tam pà kâp, jàu gơnoar, kơnòl kwang atbồ, phó kwang atbồ hìu bơsram tàm ală hìu bơsram tơmut bal pa in. Lài do, kwang atbồ mìng đơng lam 1 hìu bơsram lơm gời, ai tŭ do den geh 5 anih bơsram, geh 5 sơnĕ hìu bơsram den tŭ jơ bơto bơtê tàm ală hìu bơsram rơndap bè lơi nàng bơsong bơta ờ tơl pơgru. Pơgru rơp ntrờn tàm ală sơnĕ hìu bơsram tàm dùl hìu bơsram bơh 1 sàh dê den pal rơndap bè lơi gơ in dipal, den jơnau do là pràn jak kong kơnòl, tam pà kâp, jàu gơnoar mờ pràn jak đơng lam bơh lam bồ hìu bơsram dê”.

Bè hơ̆, rơndap tap sèng wơl ală hìu bơsram tàm càr Dăk Lăk ờ mìng là tơrmù khà mpồl ătbồ. Tơnơ̆ ală khà hơ̆ là jơnau sồr rơndap wơl broă atbồ, rơndap ai pơgru mờ gàr tơl ală bơta pal geh tàm broă bơsram sră kơnòm bơsram in.