Tàm hìu măi pa ai ngui lơh broă bơh Công ty TNHH Lơh lòs Trần Hồng Quân, tiah lơh sa mờ măi mok Nhân Cơ, càr Lâm Đồng dê, ală phan pơdar sơn đờm lòt nàng lơh broă. Tơnơ̆ mờ broă lơh điện phân, trà dà geh tuh tàm hồp, lơh ngềt mờ lòt jăt gùng lơh gơs ală gơl trà sơnrờp ngan cèng măt kă bro Việt Nam dê.

Ồng Trần Hồng Quân, Kwang Lam bồ Công ty TNHH Lơh lòs Trần Hồng Quân pà git, tàm tơngai lơh broă sơnrờp bơh hìu măi geh 450 rơbô tấn tàm 1 nam, neh lơh geh niam. Mpồl lơh sa kă bro kờp dŭ tơnguh tus 300 rơbô tấn tàm 1 nam tàm quý IV nam do mờ geh lơh jơh bơta pràn tàm quý I nam 2027. Tơnơ̆ mờ ală nrang trà sơnrờp hơ̆ là broă lơh rơlao jơ̆t nam sơrlèt mờ uă kal ke bè priă, măi mok, phan lơh broă bal mờ phan bơna ù tiah. “11 nam kơ̆p gơn, tus tŭ do, Công ty Lơh lòs Trần Hồng Quân pơnyờ să yal nrang trà sơnrờp ngan lơgar Việt Nam dê. Tàm broă lơh hìu măi gơtìp uă ngan kal ke, gơkòl. Mơya, mờ broă sền gròi đơng lam bơh Đảng, Chính phủ, bal mờ broă lơh broă bal bơh gơnoar atbồ sàh dê, ală mpồl lơh broă priă jền, cau lơh broă bal, bal mờ gùt kwang bàng, cau lơh broă, bol añ neh rơhời sơrlèt nàng lơh gơs rơndăp broă lơh”.

Nrang trà sơnrờp ờ mìng ai tơngŏ dùl bơta phan pa geh lơh gơs tàm lơgar. Tŭ geh tơl bơta pràn pah nam 450 rơbô tấn, priă geh kờp dŭ di pơgăp 1 tơmàn 400 rơbô Dolar Mỹ pah nam, ndrờm mờ 36 rơbô tơmàn đong. Bal mờ 1 rơbô nă cau lơh broă tơn geh bơta ngăc ngar, jăk chài mờ atbồ, rơndăp broă lơh di gơlan geh tai bơh 3 rơbô 500 tus 4 rơbô broă lơh tàm broă ai phan geh lơh, năng lượng, pơn diang, logistics, cơ khí, broă lơh drơng ala mờ kă bro phan.

Gơwèt mờ Nhân Cơ, ală khà hơ̆ gam pờ geh dùl bơta pràn bơtàu tơnguh pa. Jơnau kờñ cau lơh broă jăk chài, hìu ơm, pơn diang, logistics, kă bro phan, broă lơh drơng ala rơ̆p gơguh jăt broă lơh dờng hìu măi dê. Sàh kung gam rơcang bă ù nàng wă ală rơndăp broă lơh sa mờ măi mok pơn jăt tai in.

Jăt ồng Phan Anh Tuấn, Bí thư Đảng ủy sàh Nhân Cơ yal, geh ờ uă cau lơh broă kơnòm să neh geh ai lòt bơsram nàng rơcang lơh broă tàm hìu măi. Ngài rơlao, sàh gam kơlôi broă rơndăp lơh Tiah lơh sa mờ măi mok Nhân Cơ 2 ơnàng tàm pơgăp 400 lồ ù; mờ rơcang bă ù lơh hìu ơm cau lơh broă, cau jăk, logistics, kă bro phan mờ ală rơndăp broă lơh gơs phan tơnơ̆ trà. “Bè jŏ jòng, gơwèt mờ Nhân Cơ den bol añ kung neh rơcang lài ală bơta pràn nàng geh bơcri priă, hòi jà bơcri priă, jà ală cau bơcri priă tus lơh ală bơta phan bơh trà. Tŭ do hìu măi pa lơh gơs trà nrang, ờ hềt lơh geh ală phan tơnơ̆ trà… Bol añ neh rơcang ai bă ù, rơndăp ù tiah lơh tiah lơh sa mờ măi mok, logistics, broă lơh drơng ala kă bro phan nàng wă lài ai broă bơtàu tơnguh tàm tơngai tus in”.

Ờ mìng lơh gơs trà nrang, hìu măi gam rơ̆p rề ơnàng tus mờ dùl mpồl lơh đah tơnơ̆ tai. Trà gơtùi lơh gơs phan nàng lơh ală gah cơ khí lơh gơs phan, phan pa, phan điện tử, gùng lòt pơn diang phan mờ năng lượng lơh geh wơl. Hơ̆ kung là gùng dà bơtàu tơnguh càr Lâm Đồng geh ai tơnơ̆ mờ tềl tơngŏ lơh geh cồng nha trà gơl sơnrờp. Ồng Y Thanh Hà Niê Kdăm, Bí thư Tỉnh ủy càr Lâm Đồng đơs nền: “Bơh ală phan trà nrang sơnrờp, ờ mìng geh bơta kwơ bè đah lơh sa mờ gam pờ geh dơ̆ niam nàng lơh gơs mpồl geh kwơ bơh broă lơh sa mờ măi mok pa dê, hòi jà ală gah cơ khí lơh gơs phan, phan lơh broă pa, lơh sa mờ măi mok dong kờl, phan điện tử, gùng lòt pơn diang phan, năng lượng lơh geh wơl mờ uă gah broă măi mok pa bơtàu tơnguh tàm càr Lâm Đồng kung bè tiah Tây Nguyên dê”.

Bơh ù pơrhê bazan tus mờ ală nrang trà gơcrà niam mờ gùng dà broă lơh ai phan kwơ geh isgơguh tai dùl mpồl broă lơh geh kwơ. Tŭ dà trà duh hòr tàm Nhân Cơ, càr Lâm Đồng pơn jăt tai geh tơrbŏ jòng mờ ală hìu măi lơh gơs phan nền nòn, bơta kwơ bơh bauxite Tây Nguyên rơ̆p ờ mìng geh kờp mờ khà phan geh is tàm ù geh lơh gơs, mờ geh kờp lơh sa mờ măi mok, broă lơh bal mờ bơta kwơ gơguh geh lơh gơs tơn tàm bă ù do dê.