Tàm hơ̆, pal sền ngăc là Jơnau lơh nền tàm pơrjum bè Broă rơndăp lơh bơtàu tơngguh lơh sa – mpồl bơtiàn, gàr niam sền gàr dà lơgar, lơngăp lơngai càr Dăk Lăk tơnggai bơh nam 2026- 2030. Jơnau lơh nền tàm pơrjum gĭt nền jơnau kờñ bơ̆t bơtàu Dăk Lăk gơgơs càr bơtàu tơngguh duh hồl bơh jơh gùt lơgar dê; là tiah tờm lơh sa tơlir, logistics, lơh sơnơm, bơto bơtê, lòt nhơl, niam chài – tàp pràn să jan mờ jak chài – măy mŏk bơh tiah Kềng gah dà lềng đah Jum tàm gùl lơgar mờ Tây Nguyên dê.

Jơnau lơh nền tàm pơrjum kung gĭt nền loh 5 pơlam gùng tam gơl pràn, geh lơh sir kơrnoăt boh lam mờ bơ̆t bơtàu rài sră pơ àr gơnoar ătbồ pa ngan; hòi tơrgùm geh cồng nha ală bơta pràn bơtàu tơngguh phan bơna bơ̆t bơtàu kwơmàng; ai jak chài – măy mŏk, tam gơl pa bơceh lơh mờ tam gơl sồ lơh bơta pràn gơn kơnờm gơguh tai; bơtàu tơngguh Tiah lơh sa đah Jum Phú Yên, tiah drà Buôn Ma Thuột mờ ală gùng kềng lơh sa gơgơs ală anih gơguh tai; chồl pràn pràn kơldang lơh sa làng bol dê lơh is, lơh sa tơlir, lơh sa sồ, lơh sa dà lềng mờ lơh sa mờ măy mŏk lơh gơlik phan niam.