Tàm dơ̆ lơh broă, ồng Tô Lâm, Tổng Bí thư, Chủ tịch lơgar đơs nền, bơ̆t bơtàu phan bơna là broă lơh kwơ màng, geh kwơ jŏ jòng mờ ai tơngŏ tơn bè broă bơtàu tơnguh, tơnguh uă bơta pràn tàm pơrlòng mờ ai geh bơnàng jă nàng ai lơgar Việt Nam gơs lơgar bơtàu tơnguh tàm nam 2045.

Ồng Tô Lâm, Tổng Bí thư, Chủ tịch lơgar jờng rơ ală cồng nha kwơ màng mờ Chính phủ, ală Bộ, gah lơh broă, ală càr, ƀòn dờng neh lơh geh tàm broă bơtàu tơnguh phan bơna ală nam do, pơgồp bal bơsong uă bơta gơkòl mờ rề ơnàng tiah bơtàu tơnguh. Mơya, bơdìh mờ ală cồng, phan bơna tŭ do kung gam ờ hềt di pal mờ jơnau kờñ gơguh bàr sồ mờ jơnau kờñ gơs lơgar geh priă uă. Ồng Tô Lâm, Tổng Bí thư, Chủ tịch lơgar ai tơngŏ uă kơnòl broă tờm mờ đơs nền, tàm gùng bơtàu tơnguh pa, phan bơna pal khin dờp dùl broă lơh dờng rơlao: ai geh dùl bơta pràn lơh sa pa, tơnguh uă cồng nha mờ lơh tờm măi mok, tơnguh bơta pràn gơdờp mờ pờ geh bơta niam bơtàu tơnguh pa ai dà lơgar in.