Đơs sơn đờm mut lơh dơ̆ tơngkah kir sơnrai, ồng Lê Minh Hưng đơs loh, dà lơgar gam mut tàm rài bơtàu tơnguh pràn kơldang ngan bơh jak chài, măi mok, tam gơl pa, bơceh lơh mờ tam gơl sồ dê, git nền do là bơta gơn kơnờm tờm nàng tơnguh cồng nha lơh broă, bơta pràn tàm pơrlòng rài lơh sa dà lơgar dê, pơgồp bơnah lam lơh jơnau kờñ gơguh lơh sa 2 nơm khà.

Jơnau lơh nền tàm pơrjum sồ 57 Bộ Chính trị dê bè tam gơl pràn bơtàu tơnguh jak chài, măi mok, tam gơl pa, bơceh lơh mờ tam gơl sồ dà lơgar neh git loh: Gàr niam gơnoar tờm dà lơgar tàm internet; sền gàr lơngăp lơngai tàm internet, lơngăp lơngai jơnau yal tơnggit, lơngăp lơngai jơnau yal bơh mpồl bal mờ cau nă să is dê là jơnau sồr geh lơh sùm, ờ gơtùi tam cah is tàm tŭ tơngai bơtàu tơnguh jak chài, măi mok, tam gơl pa, bơceh lơh mờ tam gơl sồ dà lơgar dê.