Tus tŭ do, khà ai priă bơcri dà lơgar càr dê mìng rơp pa geh 30% broă rơndap lơh, lơyah rlau khà kờp bal gùt lơgar dê. Jơh gùt càr tŭ do geh rlau 100 rơndap broă lơh kờñ pal tă bơsong kal ke, bơta gơ kòl, tàm hơ̆, 50 rơndap broă lơh gơ wèt gơnăp gơnoar bơsong bơh Anih duh broă Làng bol càr Quảng Ngãi dê. Tềng đap bơta geh ngan do, đơng lam Anih duh broă Làng bol càr Quảng Ngãi sồr ală sờh, gah broă lơh, mpồl atbồ rơndap broă lơh mờ Anih duh broă Làng bol ală sàh, sơnah ƀòn sền nền wơl tơl rơndap broă lơh, git loh jơnau bơh tài lơyài tơngai hơ pơrgon, di tŭ bơsong halà yal ală kal ke sơrlèt rlau gơnăp gơnoar. Ală mpồl atbồ rơndap broă lơh pal kĭ jơnau hơ pơrgon mờ Anih duh broă Làng bol càr Quảng Ngãi lơh gơs ai jơh 100% priă bơcri tàm nam do.