Tàm ală rơkàng wàng iar tàm thôn Đoàn Kết, sàh Tân Hội, càr Lâm Đồng, ală pang pil năng lượng măt tơngai geh tơrbŏ bal nàng dờp măt tơngai sòl. Tàm dơlam, mpồl iar geh ròng jăt broă lơh ndơ̆p; tăp tơnơ̆ mờ tŭ tơrgùm, tam cah is mờ dăp klơm ndrờm geh sền gròi nền nòn, jòi wàng ròng mờ màh QR. Do là broă lơh “Tăp iar ñhơ̆t sơnơm” bơh dùl mpồl lơh sa kă bro dê, pơgồp bal mờ năng lượng kloh, măi mok sinh học, tam gơl sồ mờ lơh sa gơlòt bal. Ồs đèng măt tơngai dong kờl tơrmù priă tă; ñhơ̆t lơh sơnơm mờ phan vi sinh geh bơtơl tàm phan sa; phan tơlik bơh broă ròng iar geh lơh gơs phơng hữu cơ. Ồng Phạm Trọng Tâm, cau tờm mpồl lơh sa kă bro pà git, gam lơh broă lơh sa loh làng, tơlir mờ ai geh bơta kwơ uă rơlao: “Bol añ ờ tăc dùl nai tăp bè ờs, mờ tăc jơh nùs nhơm pin dờn mờ măi mok, tơnguh uă bơta kwơ tăp iar dê, gàr niam bơta pràn kơl dang mpồl bơtiàn mờ tơnguh uă bơta kwơ lơh sa”.

Broă lơh tàm Tân Hội pà gŏ, bơta jăk chài mìng mùl màl lơh geh bơta kwơ tŭ cồng nha kơlôi sơnơng geh ai ngui tàm broă lơh sa, kă bro phan mờ geh drà kă bro dờp. Do kung là broă lơh jăt nùs nhơm Jơnau lơh nền tàm pơrjum sồ 57 dê geh lơh mùl màl jơh bơh ală jơnau kơlôi sơnơng tàm mùl màl càr Lâm Đồng dê tŭ tam gơl bơh broă kơlôi sơnơng is ờ uă tus mờ broă bơsong ală jơnau kờñ mùl màl bơh lơh sa dê. Mờ lơh sa suơn sre, bơdìh mờ tiah tam phan, màh sồ tiah tam mờ hìu dăp klơm, càr kung gam pal lơh gơs ală broă lơh tiah mrềt, logistics, prăp gàr, sòl pơn đàng mờ bơsong tơnơ̆ mờ tŭ tơnhào nàng tơnguh uă bơta kwơ phan geh lơh.

tàm tơngai bơh nam 2026 tus 2027, càr Lâm Đồng ai jơnau kờñ dong kờl ờ uă ngan bơh 20 kơnòl broă kơlôi sơnơng mờ tam jào broă ngui măi mok, 20 broă lơh bal kơlôi sơnơng bơtàu tơnguh, 30 mpồl lơh sa kă bro tam gơl pa măi mok mờ 300 mpồl lơh sa kă bro dềt mờ di mơ tam gơl sồ; mờ lơh gơs 3 broă lơh lơh broă bal tàm broă kơlôi sơnơng, ai măi mok lơh phan ngui tàm mùl màl nàng lơh gơs phan.

Nàng ală jơnau kờñ do lơh geh bơta kwơ mùl màl, ală broă lơh lơh broă bal bơh tàm tiah lơh broă tờm, lơh sa tus mờ lơh gơs phan mờ drà kă bro pal geh tơrbŏ bal. Ồng Nguyễn Ngọc Phúc, Phó Chủ tịch Anih duh broă Làng bol càr Lâm Đồng pà git, càr gam ai lài ngui bơta ngăc ngar kòn bơnus lơh gơs nàng tơnguh uă cồng nha lơh sa, lơh gơs mpồl geh kwơ mờ tơnguh uă bơta pràn tàm pơrlòng. “Càr Lâm Đồng geh uă bơta pràn bè lơh sa suơn sre ngui măi mok pa, lơh gơs phan geh lơh bơh broă lơh sa suơn sre, năng lượng lơh geh wơl. Bơta kwơ màng là pal git tơrbŏ bal bơta pràn gơs ală mpồl lơh broă bal mùl màl, lơh geh phan pa, măi mok pa, gùng dà broă lơh sa pa, cèng wơl ală bơta kwơ mùl màl nàng làng bol, mpồl lơh sa kă bro mờ gah lơh sa càr dê in gơguh bàr sồ, tơnguh uă khà pràn pơrlòng kấp càr dê”.

Bơh broă lơh tăp iar ñhơ̆t lơh sơnơm tàm Tân Hội tus mờ ală jơnau kơlôi sơnơng lơh gơs mpồl geh kwơ mờ tam gơl sồ, càr Lâm Đồng gam rơhời ai Jơnau lơh nền tàm pơrjum sồ 57 mŭt tàm mùl màl, ai bơta jăk chài, măi mok mờ tam gơl pa gơs bơta pràn gơguh lơh sa càr dê.