Dơ̆ lòt còp geh gơtha kwơmàng ngan tŭ geh lơh di tòm dơ̆ tơngkah kir sơnrai 50 nam lơh gĭt gơ̆p cribơyai broă mờ lơgar ndai đah Việt Nam mờ Thái Lan, pơgồp bơnah chồl pràn gĭt gơ̆p Tam klăc lơh broă bal Jŏ jòng Tơl làm Việt Nam mờ Thái Lan ngai sơlơ bơtàu tơngguh jrô ơnàng, ngan ngồn mờ geh cồng nha. Bàr nă kwang đơng lam dồ nùs ring bal pơn jăt tai tơngguh tai bơta pin dờn chính trị bơh gàr sùm tìp măt kâp dờng mờ ală kâp; lơh jăt geh cồng nha ală broă lơh broă bal kwơmàng, ngan là broă pơrjum chính phủ bal bơh Thủ tướng bàr lơgar drơng lơh bal; pơgồp bal lam lơh geh cồng nha Broă lơh lơh broă lam lơh jăt gĭt gơ̆p Tam klăc lơh broă bal Jŏ jòng tơl làm Việt Nam mờ Thái Lan tơngai bơh nam 2026- 2031 mờ ală cồng nha loh làng tàm ală broă sền gàr dà lơgar, lơngăp lơngai, lơh sa, jak chài, măy mŏk, niam chài, lòt nhơl mờ tìp măt lơh kwèng làng bol.

Bàr nă kwang đơng lam dồ nùs ring bal lơh pràn lam lơh jăt ngan ngồn Broă lơh jŏ jòng “Pe tàm tơrbŏ”, sơlơ tàm tơrbŏ tai ală drà tăc blơi, mpồl lơh sa kă bro, ƀòn lơgar mờ ală broă lơh jŏ jòng bơtàu tơngguh kơnhăp jŏ; ngui geh cồng nha Gùng kềng lơh sa đah măt tơngai Lik – Mŭt mờ Gùng kềnh lơh sa đah Jum; pờ ơnàng tàm tơrbŏ lòt rê gùng ù gờl, gùng rơndeh par mờ gùng dà lềng; hòi jà mpồl lơh sa kă bro bàr lơgar rề ơnàng bơcri priă; lơh geh cồng nha pơrjum Anih duh broă bơrlŭ bal Kă bro phan Việt Nam mờ Thái Lan, pơnđơl gờñ geh jơnau kờñ priă geh bơh kă bro phan 2 gah 25 tơmàn dolar Mỹ, wèt tus 50 tơmàn dolar Mỹ jăt gùng tàm pơnring mờ kơnhăp jŏ.