Mờ bă ù ơnàng rlau 24 rbô kơi sồ vuông mờ khà kờp làng bol mờr 4 tơlak nă, Lâm Đồng geh pơlam gùng gơgơs tiah gơguh tai bơh tiah Kềng gah dà lềng đah Jum tàm gùl lơgar mờ Tây Nguyên dê. Jăt rơndăp ù tiah, ù tiah bơtàu tơngguh geh rơndăp lơh jăt pe tiah gơn kơnờm geh dơng bơnơm, tiah dòr bơnơm tàm gùl lơgar mờ tiah kềng gah dà lềng. Tàm hơ̆, kơnhoàl ù tiah Đức Trọng, Đơn Dương, Lâm Hà mờ Di Linh geh rơndăp ù tiah bơtàu tơngguh tiah drà gơ jăt bal mờ Tiah tờm Sră pơ àr gơnoar ătbồ mờ cíñ trị càr dê ơn tàm sàh Đức Trọng. Kơnhoàl ù tiah Dà Làc geh pơlam gùng gơgơs tiah tờm niam chài, bơto bơtê, jak chài măy mŏk mờ lòt nhơl ƀòn brê bơnơm, ơm rlô pràn să ndrờm pal mờ ală lơgar.

Jăt ồng Tôn Thiện San, Kwang Lam bồ Sờh Priă jền càr Lâm Đồng dê, càr rơ̆p gơgơs 6 gùng lơh sa Đah Tô – Jum mờ Măt tơngai Lik – Mŭt, tàm tơrbŏ ală tiah gơn kơnờm bơh dơng bơnơm mù tus dà lềng. Kờp jơh jơnau kờñ priă bơcri tơngai bơh nam 2026 - 2030 digơlan rlau 1 tơlak tơmàn đong, tàm hơ̆ priă bơdìh kes priă geh tus pơgăp 80%.

“Rơndăp ù tiah càr neh gĭt nền pơlam gùng gơhòi gơ jà bơcri priă tàm ală gah, broă tờm, kwơmàng, geh tơl pràn, ƀươn tàm pơrlòng mờ geh tơl pràn lơh gơlik geh gơn kơnờm gơguh tai pa ai càr in. Hơ̆ là phan bơna logistics, bơtàu tơngguh tiah drà, lòt nhơl niam uă, broă lơh sa sươn sre ngui măy mŏk pa, lơh sa mờ măy mŏk lơh gơs phan niam, năng lượng, kă bro phan drơng broă sa priă, bơto bơtê, lơh sơnơm, niam chài, tàp pràn să jan, tam gơl sồ, jak chài măy mŏk mờ tam gơl pa bơceh lơh”.

Ồng Hồ Văn Mười, Kwang bàng Đảng Dà lơgar, Chủ tịch Anih duh broă Làng bol càr Lâm Đồng pà gĭt, broă tam gơl wơl rơndăp ù tiah geh gơtha kwơmàng ngan tơnơ̆ tŭ tơrgùm bal dùl pe càr: Lâm Đồng, Bình Thuận mờ Dăk Nông, lơh gơlik geh tơngume adăt boh lam mờ pơlam gùng jŏ jòng ai tơngai bơtàu tơngguh pa in. Chủ tịch Anih duh broă Làng bol càr Lâm Đồng đơs ngan, Lâm Đồng tŭ do là càr geh bă ù dờng ngan rlau jơh gùt lơgar, geh uă bơta ƀươn bè phan kwơ tàm ù, năng lượng lơh geh wơl, broă lơh sa sươn sre măy mŏk pa mờ lòt nhơl, tài bè hơ̆ kờñ dùl rơndăp ù tiah pa nàng lơh niam uă ngan rlau jơh bơta pràn, lơh gơlik geh gơn kơnờm gơguh tai jŏ tơngai.

“Tam gơl wơl rơndăp ù tiah dơ̆ do tơnggŏ lơh ngan jơh nùs bơh càr dê tàm tam gơl pa bồ tơngoh bơtàu tơngguh, ai làng bol mờ mpồl lơh sa kă bro lơh anih tờm, ai jak chài măy mŏk, tam gơl pa bơceh lơh, tam gơl sồ mờ gơguh tai tơlir lơh gơn kơnờm. Wèt tus jơnau kờñ bơ̆t bơtàu Lâm Đồng gơgơs tiah gơguh tai duh hồl bơh kơnhoàl ù tiah Tây Nguyên mờ đah Jum tàm gùl lơgar dê. Rơndăp ù tiah pa ờ mìng gĭt nền jơnau kờñ bơtàu tơngguh tềng đăp măt mờ gam pờ gơlik bơta wèt sền jŏ tơngai ai tơnơ̆ do in; ờ mìng jòi lơh geh cồng nha ală bơta ƀươn geh lài mờ gam bơ̆t mòn geh ală gơn kơnờm bơtàu tơngguh pa”.