Dơ̆ rềs àr gơlik geh tàm mho ngai 30 nhai 3, tŭ dùl nơm rơndeh pơndiang năc 45 cơghĕ (bơh cau măi N.V.L. 44 sơnam, ơm tàm càr Bình Phước măi) pơndiang bal 36 nă cau lòt gùng Dà Làc- ƀòn dờng Hồ Chí Minh. Tàm tŭ rơndeh gam mù koèl kơh Bảo Lộc gơwèt ù tiah ƀòn drà dềt Dà Mri, kơnhoàl Dà Oai, càr Lâm Đồng den gơ srơng tàm thòng jrô 20 thơk.

Tơnơ̆ tŭ gơlik geh rềs àr do, Kảñ sát Gùng lòt rê Kwang àng càr Lâm Đồng mờ ală mpồl lơh broă geh gơnoar neh mhar tus tiah gơtìp rềs àr lam lơh broă lơh dong kờl cau gơtìp rềs àr. Dơ̆ rềs àr lơh bi N.T.N.T (26 sơnam, ơm tàm ƀòn drà dờng Đồng Xoài, càr Bình Phước) chơ̆t, 3 nă cau ndai gơtìp sồt să kơn jơ̆ geh mpồl lơh broă geh gơnoar jun tus hìu sơnơm sơm sồt, ală cau gam wơl gơtìp sồt să dồ ết. Lài mờ tŭ gơ srơng tàm thòng jrô, rơndeh năc geh tơm tàm rơndeh dờng lòt lài hờ đăp.