Oh Võ Thị Như Ngọc, Ƀí thư Ci đoàn ơdŭ 12A1, Hìu bơsram kấp pe Lê Quí Đôn, ƀòn dờng Buôn Ma Thuột, càr Dăk Lăk là dùl tàm ală kơnòm bơsram pơn rơ jak geh mŭt Đảng tŭ pa tòm 18 sơnam. Do là bơta cih dờp di pal bè ală pơn đơl lơh ngan tàm broă bơsram sră mờ bơsram tàp bơh oh dê tàm uă nam. Oh Như Ngọc yal:“Añ gŏ he chờ hờp ngan. Do kung là tŭ tơngai niam nàng añ in bơtàu tơnguh să tờm mờ lơh gơrề uă bơta jơh nùs, bơta lơh ngan tus mờ ală bơyô gùt dar tàm hìu bơsram dê”.

Ai oh Nông Quốc An, kơnòm bơsram Hìu bơsram kấp pe Võ Nguyên Giáp, kơnhoàl Ea Kar, càr Dăk Lăk, sùm lơh ngan pơn đơl pràn, bơsram tàp să jan, lơh geh kơnòm bơsram jak tơl làm mờ jơh nùs tàm srơh Đoàn dê. Nhai 8 nam 2023, oh Nông Quốc An chờ hờp geh mut Đảng tŭ gam nggui tàm cơghĕ hìu bơsram tơn: “Tàm ală nam bơsram kấp 3, oh lơh ngan tus bal ală broă lơh bơh hìu bơsram dê. Oh chờ hờp ngan tŭ là 1 bơnah tàm mpồl Đảng dê. Nùs nhơm do oh rơ̆p pơn jat tai lơh uă tàm tơngai tus”.

Jat ồng Nguyễn Tiến Dũng, Ƀí thư Ci ƀộ, Kwang lam bồ Hìu bơsram kấp pe Võ Nguyên Giáp, geh tơnggơs nam 2021, hìu bơsram geh 27 nă đảng viên. Tơnơ̆ tŭ tơnggơs, Ci ƀộ neh sền gròi ngan tus broă lơh bơtàu tơnguh đảng viên. Ờ mìng jòi cau bơh mpồl cau kwang bàng, cau pơgru, cau lơh broă lơm mờ hìu bơsram gam sền gròi tơmŭt uă đảng viên là kơnòm bơsram jak. Nam bơsram 2023-2024, hìu bơsram tơmŭt geh 6 nă đảng viên pa là kơnòm bơsram. Nàng sền gŏ, rơwah geh mpồl cau jak, bơdìh mờ broă bơsram niam chài, ală kơnòm gam geh pơn jờng tus bal ală broă lơh sền gĭt, broă lơh mpồl bơtiàn nàng bơsram tàp bơta chài, nùs nhơm cíñ trị. Ồng Nguyễn Tiến Dũng, pà gĭt:“Gah uă ngan rlau jơh kung là mpồl duh broă Đoàn hìu bơsram dê, jat sền tàm tŭ bơsram sră, bơsram tàp, tŭ pơnđơl pràn lơh ngan, tŭ tă pơgồp dà kơl hề bơh ală kơnòm bơsram dê. Gah dơ̆ 2 là cau pơgru atbồ ơdŭ bơsram, ală cau pơgru môn bơto bơsram ală kơnờm mờ geh bơta pràn jak is tàm broă lơh đoàn, srơh ơruh pơnu. Mơkung geh cồng nha uă tàm broă bơsram sră, tàm broă bơsram tàp nàng bol añ in lơh bơta tờm tàm bơtàu tơnguh Đảng”.

 Bơh nam 2020 tus tŭ do, jơh gùt càr Dăk Lăk neh tơmut geh 368 nă đảng viên là kơnòm bơsram; mìng is nam 2024 geh 200 nă kơnòm bơsram geh tơmŭt tàm mpồl Đảng. Jat ồng Đỗ Tường Hiệp, Phó Kwang Lam bồ Sờh Bơto bơtê mờ Bơsram càr Dăk Lăk yal, cồng nha pal pơn jờng ngan do là mờng chài rơ̆ ru nàng ală hìu bơsram in pơn jat tai broă lơh tơmŭt uă Đảng viên tàm kơnòm bơsram. Broă gàr niam bơsram sră jài, tus bal ală broă lơh srơh nàng bơsram tàp nùs nhơm cíñ trị là dùl jơnau sồr uă gơwèt mờ ală kơnòm bơsram. Tàm tơngai tus, Sờh bơto bơtê mờ Bơsram rơ̆p pơn jat tai pơgồp bal mờ ală kấp ủy Đảng, hìu bơsram nàng lơh geh tai bơta ƀuơn, tiah bơsram tàp ai ală kơnòm bơsram in. Ồng Đỗ Tường Hiệp, pà gĭt:“Broă lơh bơtàu tơnguh Đảng tàm hìu bơsram geh sền gròi. Is ồn là tàm mpồl kơnòm bơsram. Ală đoàn viên jak tàm hìu bơsram kấp pe rơ̆p geh tề lam yờ tơnguh uă bơta gĭt wă bè cíñ trị, bồ tơngoh mờ geh bơta kơ̆p kờñ ngan bè broă lơh nàng tề lam mờ tơmŭt Đảng nàng ală kơnòm bơsram in geh gùng dà pơnđơl lơh ngan bơh gờñ tơnơ̆ hơ̆ tơmŭt uă cau tàm mpồl Đảng tàm rài tơnơ̆ do”.

Broă tơmŭt kơnòm bơsram mŭt tàm mpồl Đảng ờ mìng là bơta chờ hờp is lơm mờ gam là bơta đơs nền gơnoar bơh rơnàng kơnòm să càr Dăk Lăk dê tàm broă lơh bơt bơtàu mờ bơtàu tơnguh ƀòn lơgar, Dà lơgar. Ală đảng viên kơnòm să tàm sơnam rơsìh bơta niam kăc màng bơh tàm hìu bơsram rơ̆p là gar sơntìl niam, bơta kơ̆p kờñ ai bơta tàm pơdờn mờ bơtàu tơnguh Đảng tàm rài tơnơ̆ do in.