Jơnau bè dùl “cau lam bồ” đơs tơn pồ is bơh mpồl Fulro dê neh geh tŭ lơh pơnrơ ngan tàm mpồl bơtiàn ală jơi bơtiàn kis tàm Tây Nguyên là ồng Ybome (mờng sơnđan là Ja Na – 68 sơnam), kis tàm ƀòn Ring Rai, sàh Hà Bầu, kơnhoàl Đăk Đoa, càr Gia Lai. Nhai 2 nam 2001, tềng đăp mờ jơnau bơchồt bơh ồng Ksor Kơk, cau lam bồ mpồl Fulro kis tàm lơgar Mỹ đơs, uă cau jơi bơtiàn ờ gal cau gơtìp bơchồt neh tus bal lik dră lơh gơtìp tam lơh. Tơnơ̆ mờ broă do, ồng Ja Na gơtìp yă 12 nam jàm mờ bơta tìs “Lơh aniai gùng dà tam klăc bal jơi bơtiàn”.

Tàm tơngai jàm, ồng Ybome git geh ală bơta tìs. Tơnơ̆ mờ tŭ neh jơh tơngai jàm, ồng rê mờ ƀòn lơgar, tơriang lơh broă mờ sơn đờm bơ̆t bơ̆t bơtàu rài kis pa. “Tàm tŭ lik dră, tŭ do kơlôi wơl broă lơh lài do den dà măt añ gơhòr. Mùl màl là tàm ƀòn pal dờp jơh ală bơta hoàc huơr, añ pal lòt jàm. Tŭ do neh rê tàm ƀòn añ mblàng nàng làng bol in wă broă tam klăc bal là bè lơi, bơta kwơ màng là pal geh nùs nhơm tam klăc bal hơ̆ sồng jai pha jơh ală bơta”.

Gam gơwèt mờ ồng Siu Un, 59 sơnam, kis tàm thôn Tân Điệp 1, sàh Ia Ake, kơnhoàl Phú Thiện, do là cau neh sơrlèt 16 nam ơm tàm hìu jàm, rài kis pah ngai là dùl bơta pràn nàng lơh geh wơl nùs nhơm pin dờn. Nhai 6 nam 2022, ồng rê mờ tus pơrjum bal mờ mpồl jăt yàng Tin lành tàm thôn, gơwèt mpồl jăt yàng Tin lành Kơ đốk, do là dùl gah jăt yàng di mờ adăt boh lam dê. Ồng Siu Un tŭ do ờ gam ƀàs sìl tai, ờ gam gơtìp ală cau dră wơl bơh lơgar bơdìh bơchồt.

Ồng sùm yal bè jơnau neh geh tŭ gơtìp tìs mờ rê mờ nùs nhơm pin dờn ồng dê, dong kờl làng bol tàm ƀòn in git bơta di bơta tìs: “Añ pal rê wơl mờ nùs nhơm pin dờn añ dê, rê wơl mờ gah jăt yàng di mờ adăt boh lam. Tŭ rê wơl, Đảng, Dà lơgar, gơnoar atbồ geh nùs nhơm niam mờ añ. Añ kung kờñ làng bol ƀòn lơgar, ală tiah tàm càr Dăk Lăk, Gia Lai… ală cau lơi neh gơtìp tus mờ tin lành Đề Ga den rê wơl mờ nùs nhơm pin dờn, rê wơl mờ gah jăt yàng di mờ adăt boh lam neh geh Đảng mờ Dà lơgar ai jăt”.

Nàng gùng rê wơl mờ ƀòn lơgar, mờ nùs nhơm pin dờn di mờ adăt boh lam sùm dờng ơnàng, ală nam do, càr Gia Lai neh lơh jăt broă tơrlòng lơh “Rê mờ nùs nhơm pin dờn – gàr bơta lơngăp lơngai ƀòn lơgar”, mờ broă tus bal bơh 4 mpồl: Dảng viên, cau geh bơngă pin dờn, ală cau kơ đơng yàng, gah jăt yàng mờ ală cau neh geh tŭ gơtìp tìs tài dờn jăt mpồl Fulro.

Là cau lam bồ mpồl Tin lành Việt Nam (đah jum), kung là Kwang lam bồ broă mặt trận thôn Sô Ma Lơng, sàh Chrôn Pơnan, kơnhoàl Phú Thiện, càr Gia Lai, ồng Ksor Đuing pà git, ồng bal mờ ală kấp gơnoar atbồ lam geh uă cau sơrbì tin lành Đề Ga nàng lơh jăt nùs nhơm pin dờn gah jăt yàng di mờ adăt boh lam. “Gơnoar atbồ ƀòn lơgar sùm sền gròi tus mờ bol añ, ai tơl bơta niam nàng bol añ pơrjum jăt yàng bè ờs. Kung hòi jà ală oh mi gơtìp tìs gùng rê wơl. Lài ngan bol añ dờp geh 13 hìu mơ, mơya rơhời tus tŭ do là rơlao 300 nă cau. Ală cau neh geh tŭ gơtìp tìs bol añ pơgồp bal tàm broă pơlam gùng yàng mờ pơgồp bal mờ ồng Siu Un lòt tus tơl hìu nàng pơlam, lam sồr ală cau do lơh jăt gùng dà broă lơh bơh Đảng, Dà lơgar dê”.

Jăt ồng Rah Lan Chung, Phó Ƀí thư Tỉñ ủy, Củ tịc Anih duh broă Làng bol càr Gia Lai đơs, mờ ală tơngu me niam mờ di pal, broă tơrlòng lơh “rê mờ nùs nhơm pin dờn, gàr bơta lơngăp lơngai ƀòn lơgar” tàm càr gam lơh geh tiah kis đềt mềr nàng ală cau neh geh tŭ gơtìp tìs gùng, lơh broă, tơnguh is rài kis phan bơna, nùs nhơm bơh să tờm dê bal mờ pơgồp bal tàm broă bơtàu tơnguh mpồl bơtiàn: “Tơngai pa do den geh hòi jà geh bơta pràn bơh ală mpồl lơh broă cíñ trị tus bal bơsong ală broă kal ke mờ ală cau neh geh tŭ jăt mpồl Fulro tŭ rê mờ ƀòn lơgar, kơrian, bơto bơtê, pơn dờm nàng ală cau do bañ pơn jăt tai lơh ală broă tam dră mờ dà lơgar. Tàm ală kơnhoàl càr Gia Lai gam lơh jăt broă tơrlòng lơh “Rê mờ nùs nhơm pin dờn – gàr niam bơta lơngăp lơngai ƀòn lơgar” bol añ đơs niam ngan bè cồng nha, broă lơh mùl màl. Broă tơrlòng lơh do neh geh Ƀộ Kwang àng đơs niam mờ sền càr Gia Lai là dùl tàm ală tiah pơn jăt tai lơh jăt mờ lơh geh uă broă tơrlòng lơh do, ờ mìng càr Gia Lai mờ gam geh bal ală càr tàm Tây Nguyên dê”.

Sền jơnau cih dơ̆ sơnrờp tềng anih do: https://vov4.vov.vn/kho/jonau-tongit-mpol-botian-thoi-su-xa-hoi/rot-jonau-cih-gung-lot-boh-neh-rolau-loh-tis-re-wol-mo-bon-logar-jonau-cih-1-jonau-kah-wolala-ngai-nrah-gung-477972.vov4