Lam lơh dơ̆ tàm pơrlòng tàm jơh gùt Đoàn lơh geh cồng nha gờm chờ Pơrjum dờng Đảng ală kâp mờ Pơrjum dờng Đảng gùt lơgar dơ̆ XIV, Ƀí thư dơ̆ dùl Đoàn Ơruh pơnu Dà lơgar là bi Bùi Quang Huy đơs sùm: Ală kâp mpồl Đoàn mờ jơh gùt đoàn viên, ơruh pơnu jơh nùs lơh ngan lơh jăt geh cồng nha ală tơnggume tàm pơrlòng, geh: Mblàng yal bè bơhiàn kah yau pơnrơ ngan bơh Đảng Kộng sản Việt Nam dê; đơs nền gơnoar broă, bơngă, bơta khin cha, bồ tơngoh gĭt wă, pràn jak đơng lam, pràn jak ăt gơoar mờ pràn tam lơh bơh Đảng dê tàm sùm jơh gùt gơl gùng kăc màng 95 nam do, pơgồp bơnah lam dà lơgar cơnđòa lòt kơ̆ kơljăp mŭt tàm rài pa, rài brồ să jơi bơtiàn dê; đòm jăt nùs nhơm lam lài, lơh is bơh ơruh pơnu dê tàm lam lơh ală broă bơ̆t bơtàu, bơnah broă ơruh pơnu, Bơyai lơh lam lơh tàm pơrlòng, sơnđờm lơh, ai ngui ală broă bơ̆t bơtàu, bơnah broă mờ bơyai lơh Ngai Ơruh pơnu lơh broă bal gờm chờ Pơrjum dờng Đảng ală kâp, wèt tus Pơrjum dờng dơ̆ XIV Đảng dê; Bơ̆t bơtàu Đoàn pràn kơnhăp, ngan ngồn là mpồl rơcăng lài dòn kơnờm Đảng dê; Tus bal bơ̆t bơtàu mờ sền gàr Đảng; jơh nùs tă pơgồp jơnau đơs tàm jơnau rơcăng cih Sră nggal Pơrjum dờng dơ̆ XIV Đảng dê. Ƀí thư dơ̆ dùl Đoàn Ơruh pơnu Dà lơgar bi Bùi Quang Huy, đơs loh: “Mpồl Đơng lam Đảng hòi jà đoàn viên ơruh pơnu kơnòm pa tàu mờ kơnòm dềt tàm jơh gùt lơgar bơh jơh ală nùs nhơm dòn song bơh he dê sơnđờm lơh tĕ bơh ală broă bulah dềt rơhền mơya dipal mờ rài kis geh ngan mờ geh kwơ ngan geh kwơ ai mpồl bơtiàn in nàng pơgồp bơnah lơh gơs nùs nhơm rơcăng lài tàm pơrlòng duh hồl tàm ală kâp mpồl đoàn. Tàm nùs nhơm bơh Dơ̆ lam lơh tàm pơrlòng dê tàm jơh gùt Đoàn nàng gờm chờ cồng nha lơh geh bơh Pơrjum dờng Đảng ƀộ ală kâp dê, tàm bă ù “Càr lơgar tam dră mờ cau sò tơm”, bol he bal mờ gơ̆p lơh jăt dồ broă geh kwơ ngan hơ̆ là lam lơh Sa tềp tam chi sùm sùm kah ưn ngài Wa Hồ. Broă lơh do neh gơgơs là broă lơh ờs mờng pah nam, tơnggŏ nùs nhơm lam lài, kơnòl rơnàng kơnòm să Việt Nam dê, mpồl Đoàn Ơruh pơnu Kộng sản Hồ Chí Minh Dà lơgar dê tàm sền gàr tiah ơm kis, drơng mờ tam gơl nhơm trồ tiah”.

Đơs tàm dơ̆ bơyai lơh, ồng Đỗ Văn Chiến, Củ tịc Anih duh broă Mặt trận Dà lơgar Việt Nam jờng rơ, đơs niam ngan Đoàn Dà lơgar neh rơcăng lài mờ di tŭ bơyai lơh lam lơh tàm pơrlòng wèt tus Pơrjum dờng Đảng ală kâp mờ Pơrjum dờng Đảng gùt lơgar dơ̆ XIV. Nàng dơ̆ tàm pơrlòng lơh geh cồng nha dipal mờ rài kis geh ngan, lơh gơrề pràn kơldang nùs nhơm lam lài, jơh nùs jơh tồr bơh rơnàng kơnòm să dê, ồng Đỗ Văn Chiến, sồr: “Đoàn Dà lơgar pal sền gròi lơh pràn broă lơh mblàng yal, yờ tơngguh bơta gĭt wă, kơnòl tàm ală kâp mpồl Đoàn, đoàn viên, lơh bè lơi ai dơ̆ tàm pơrlòng in gơgơs là dơ̆ pơrjum cíñ trị jrô ơnàng làm uă tàm jơh gùt Đoàn, geh đau bơta tus bal jơh nùs bơh gal ngan đoàn viên, ơruh pơnu kơnòm pa tàu mờ kơnòm dềt tàm jơh gùt lơgar dê mờ lơh geh bơta gơdờp niam ngan bơh mpồl bơtiàn dê; Hơ̆ digơlan là ală rbàng, gơl gùng, hìu sền sră, cơldŭ bơsram, halà ală tơngume jơnau kơlôi sơnơng jak chài, ală rơndăp broă lơh sơnđờm mŭt lơh broă bơceh lơh, broă lơh tơrlòng lài lơh sa pa, geh cồng nha bơh ơruh pơnu dê lơh tờm.

Đơs sùm broă tam chi ờ mìng là broă lơh dipal mờ rài kis ngan dê nàng lơh niam wơl tiah ơm kis, mờ gam pơgồp bơnah tàm jơnau kờñ bơtàu tơngguh kơ̆ kơl jăp dà lơgar dê mờ lơh jăt ngan ngồn jơnau hơ Cíñ phủ lơgar Việt Nam dê tàm ală cribơyai ală lơgar, tàm hơ̆ geh jơnau kờñ tơrmù tơlik nhơm ƀơ̆ tus tiah ơm kis ờ gam tai tàm nam 2050, ồng Đỗ Văn Chiến sồr jơh ală kâp mpồl Đoàn, đoàn viên ơruh pơnu tàm jơh gùt lơgar đòm jăt tĕ nùs nhơm lam lài, bơceh lơh mờ kơnòl bơh he dê nàng lơh jăt ngan ngồn ală tơnggume tàm pơrlòng neh lam lơh.

Tàm dơ̆ bơyai lơh, ală cau ala măt neh còp, pà phan Mẹ Việt Nam khin cha jak chài in; jàu 40 bơnah phan pà ai ală hìu bơnhă dờp bơta dong kờl mpồl bơtiàn dê; 30 bơnah priă dong kờl bơsram ai kơnòm bơsram geh rài kis kal ke brồ guh tàm bơsram in; 10 bơnah phan pà ai kra ƀòn, lam bồ ƀòn in tàm ù tiah kơnhoàl Sơn Dương, càr Tuyên Quang mờ kờp jơh priă 100 tơlak đong.

Tàm dơ̆ bơyai lơh broă lơh do sơl, Đoàn Ơruh pơnu Kộng sản Hồ Chí Minh dà lơgar lam lơh broă lơh bơ̆t bơtàu ơruh pơnu gờm chờ Pơrjum dờng Đảng dơ̆ XIV, geh: 15 nơm hìu ai ơruh pơnu gơtìp gơrềng tài bơh mìu càl rbŭt dờng dà kŏ dà cò, 02 nơm hìu gơboh gơbài, ƀlàng tàp pràn să jan mpồl bơtiàn, hìu Chèo wan pơrhê, Sươn chi ơruh pơnu, gơl gùng lòt ƀòn lơgar, ƀlàng nhơl ai kơnòm dềt in, hìu 26/03, 36 gơl gùng pờ àng bơh năng lượng măt tơngai, 20 lồ brê chi ơruh pơnu, dong kờl 13 tơmàn đong bơh priă càn Kes priă Dà lơgar bè broă lơh rbòng dà Đoàn Dà lơgar, Kờp jơh priă jền lam lơh rlau 21 tơmàn đong.

Tơnơ̆ Dơ̆ lam lơh, ală oh mi là kwang đơng lam bồ Đảng, Dà lơgar bal mờ ală cau ala măt, đoàn viên, ơruh pơnu mờ làng bol tàm ù tiah do neh tus bal tam chi tàm Tiah kah kơlôi ală cau kăc màng lài do, Tiah tềl lời wơl dà lơgar is ồn Tân Trào, kơnhoàl Sơn Dương, càr Tuyên Quang.