Gơwèt mờ làng bol ală jơi bơtiàn, Satềp Krơi is ờ mìng là dơ̆ nàng kah wơl bơhiàn ờs mờng, ưn ngài ală rơnàng ồng pàng, mờ gam là bơta pràn nàng tam klăc bal, bơtàu tơnguh ƀòn lơgar. Tàm Tiah tềl kah yau rài lài do dà lơgar Dòr 722 – Dăk Sắk, càr Lâm Đồng, ală ngai nhai 8 kah wơl bè ală dơ̆ tam lơh cui rơcai bơh ling klàng bal mờ làng bol tàm do dê tàm ală nam 1965 -–975, tàm hơ̆ uă ngan là Tam lơh Đức Lập kàl hàm nam 1968.

Gơwèt mờ ồng Y Dơi, cau ling yau kòn cau Mnông, tàm ƀòn Dăk Sắk, kah wơl rài tam lơh kung gam bè ờs. “Añ lòt ling bơh nam 18 sơnam. Tàm ală nam tam lơh mờ Mỹ sò tơm, bol añ kis tàm brê tàm Dăk Prí, Nâm Nung, geh tŭ tus lơgar Campuchia. Tŭ do gam kis, geh wă rò ngan Sơn tờm Dà lơgar, sền ƀòn lơgar tam gơl, oh kòn geh rài kis niam rơlao, añ chờ hờp ngan. Añ geh Bộ Ling klàng lơh hìu do, pah nhai geh dong kờl bơh 6 tus 7 tơlăk đong tai, cau tàm mpồl ling bal ờ gam geh sền gŏ ngai dà lơgar krơi is. Kis tàm bơta ring lơngai, añ gŏ gơlơh kwơ màng ngan mờ sơlơ kah cau tàm mpồl ling bal neh phi să”.

Bơh nùs nhơm chờ hờp ngai Sơn tờm Dà lơgar, làng bol ală jơi bơtiàn tiah Tây Nguyên sơlơ gŏ loh làng ngan rơlao tai ală tam gơl tàm rài kis. Tàm sàh Ia Tul, càr Gia lai, uă broă lơh phan bơna gam geh lơh bè gùng tờm tơrbŏ mờ gùng dờng 25 mờ tiah tờm sàh dê, gùng ding dà tàm ƀòn Biah A, gùng dă mờ bê tông sơmăng tàm ƀlàng sre lòt tus tiah lơh sa ƀòn Tiah A, ƀòn Biah B kung geh bơcri priă lơh, pơgồp bal tàm broă sơndră mờ gơbam dà, drơng broă lơh sa. Ồng Nay Hao, cau geh bơngă pin dờn tàm ƀòn Jư̆, sàh Ia Tul đơs bè bơta kwơ bơh ngai Sơn tờm Dà lơgar: "Ngai Sơn tờm Dà lơgar ngai 02 nhai 9, ngai Wa Hồ sền jơnau Yal jơnau Dà lơgar Krơi is, mờ do sùm là ngai lơh chờ dờng bơh jơi bơtiàn he dê. Geh krơi is den hơ̆ sồng geh rài kis lơngăp lơngai, hờm ram mờ gơboh gơbài bè tŭ do. Añ gŏ dà lơgar he gam brồ guh pràn kơl dang, rề ơnàng broă lơh bal mờ dunia. Tàm ală nam pa do, kơnờm geh uă broă dong kờl di pal, nùs nhơm tam klăc bal tàm mpồl bơtiàn ngai sơlơ đềt mềr. Làng bol cau lơi kung ndrờm dùl nùs jăt Đảng, lơh sa bơtàu tơnguh bal nàng bơ̆t bơtàu ƀòn lơgar niam bơnĕ rơlao”.

Tàm thôn Kdăng, sàh Khin cha jăk chài Kdang, càr Gia Lai, do là thôn geh 256 hìu kòn cau Bơnhàr dê, nùs nhơm wă rò ngai Sơn tờm Dà lơgar geh lơh nggồr sùm. Ală bồng bi Dà lơgar geh yồng tềng đăp bơh tơl hìu. Làng bol gam bơyai lơh ală broă lơh tàp pràn să jan, lơh geh nùs nhơm chờ hờp, tam klăc bal tàm mpồl bơtiàn. Ồng Xuin, cau kis tàm ƀòn Kdăng pà git: “Dơ̆ lơh chờ gờm ngai 02 nhai 9, hìu nhă bal mờ ală cau tàm ƀòn yồng bồng bi Dà lơgar, bơyai lơh ñô sa chờ ngai Sơn tờm Dà lơgar. Lài mờ ngai chờ, tơl hìu tă ờ uă priă nàng blơi sur mờ rơcang geh drăp tơrnờm nàng ñô sa chờ bal tàm ngai chờ dờng do, chờ hờp ndang, lơngăp lơngai ndang mờ tam klăc bal nùs nhơm ƀòn lơgar. Nam do thôn bơyai lơh coh plai tơn tàm ƀòn, geh bal mpồl coh plai ală klao pơnu bal mờ kơnòm pa tào den tàng chờ hờp ngan, ai geh nùs nhơm chờ nàng bơsram sră ai ală oh kòn in tơnơ̆ mờ ală ngai chờ dờng”.