Ală ngai mờr satềp, mò H’ Chơ̆t Niê, kòn cau Rơđê, kis tàm ƀòn Tai, sàh Krông Jing, kơnhoàl Mdrăk bal mờ ală cau tàm hìu ờ ru ngan pơs wàs hìu đam. Mò yal, ờ hềt tŭ lơi nùs nhơm wă rò Satềp bơh hìu nhă dê chờ bè nam do. “Nhai 6 nam 2024, Mpồl đơng lam Ling klàng kơnhoàl Mdrăk neh pà hìu nhă in 50 tơlăk đong, Anih duh broă Mặt trận Dà lơgar Việt Nam kơnhoàl dong kờl tai 50 tơlăk đong. Hìu añ tơrgùm càn tai nàng lơh hìu pa dờng niam. Tŭ do, ală cau tàm hìu neh geh hìu pa kơ̆ kơl jăp nàng ơm. Satềp Ất Tỵ 2025 do, jơh ală cau tàm hìu iang nùs wă rò nam pa, do geh sền là satềp chờ mờ gơboh gơbài ngan bơh lài tus tŭ do”.

Kung ndrờm bè mò H’ Chơ̆t dê sơl, bi Y Sam Niê, kòn cau Rơđê, kis tàm ƀòn Tai, chờ hờp wă rò Satềp tàm hìu pa geh lơh sơl. Bi Y Sam ngoh rơngăc đơs: “Ờ hềt tŭ lơi añ kơlôi gơtùi lơh geh hìu dờng mờ niam bè do nàng ơm. Mpồl đơng lam ling klàng kơnhoàl mờ Anih duh broă Mặt trận Dà lơgar kơnhoàl tơl mpồl pà 50 tơlăk đong, hìu càn tai 50 tơlăk đong nàng lơh hìu dờng niam. Nam do geh hìu pa satềp, ùr bơklao añ bal mờ ală kòn mùl màl gơboh gơbài ngan, ờ gam ngòt ñhăt dà mìu, càl mŭt tai. Tŭ do añ mìng rơcang tàm broă lơh sa, ròng ală kòn lòt bơsram”.

Ồng Y Lương Êban, Củ tịc Anih duh broă Mặt trận Dà lơgar Việt Nam sàh Krông Jing pà git, tàm nam 2024, sàh geh 54 hìu rơƀah geh lơh hìu “tam klăc”. Bơdìh hơ̆ tai, rơlao 400 hìu pa lik klàs rơƀah, làng bol jơi bơtiàn ờ gal cau geh dong kờl priă mờ ngai lơh hìu bơh ală broă lơh bơh Cíñ phủ mờ càr Dăk Lăk dê. Ală hìu ndrờm neh mŭt ơm tàm hìu pa. Ồng Y Lương Êban yal: “Lồi nam 2024, Anih duh broă Làng bol sàh neh lòt sền wơl, sền nàng git tơl ală bơta hơ̆ sồng bơyai lơh jào hìu ai ală hìu nhă geh sră dong kờl in. Bơh broă lòt sền, bol añ gŏ jơh ală hìu ndrờm chờ lơm. Ală hìu ndrờm neh rơcang wă rò Satềp nam pa Ất Tỵ nam 2025 tàm nùs nhơm chờ hờp bơh làng bol dê”.

Mdrăk là dùl tàm ală kơnhoàl tiah ngài kal ke ngan càr Dăk Lăk dê. Lơh jăt dơ̆ lam sồr “Gùt lơgar tus bal tài cau rơƀah, bañ lời cau lơi gơtìp sơrbì is tơnơ̆”, jăt jơnau sồr bơh Cíñ phủ dê bè broă tơn jơh hìu sèt, nam 2024, kơnhoàl neh hòi jà ală mpồl lơh broă lơh pa 255 nơm hìu mờ lơh niam wơl 190 nơm hìu ơm dong kờl ală hìu rơƀah, hìu pa lik klàs rơƀah in. Kờp jơh priă lơh mờr 50 tơmàn đong. Bè broă rơndăp tơn jơh hìu sèt, hìu ñhăt dà mìu tàm nam 2025, ồng Y Khoan Niê Kdăm, Củ tịc Anih duh broă Mặt trận Dà lơgar Việt Nam kơnhoàl Mdrăk pà git, kơnhoàl kờp dŭ lơh pa rơlao 220 nơm hìu nàng dong kờl ală hìu kal ke in: “Bol añ kờñ geh 18 tơmàn đong nàng lơh jăt broă tơn jơh hìu sèt, hìu ñhăt dà mìu tàm gùt kơnhoàl in geh kơ̆ kơl jăp rài kis tàm nam 2025. Măt trận Dà lơgar kơnhoàl pơgồp bal ală broă lơh bè Jơnau lơh nền sồ 90 nam 2022 bơh Cíñ phủ dê, broă lơh 1718 bè tơn jơh hìu sèt mờ ală broă lơh ndai bè priă geh bơh broă hòi jà mpồl lơh sa kă bro nàng dong kờl làng bol. Broă rơndăp lơh do kờp dŭ geh lơh gơs tàm nhai 12 nam 2025”.

Chờ gờm tơnkah 120 nam Ngai crơng gơs càr Dăk Lăk lồi nhai 11 nam 2024 pa do, Anih duh broă Mặt trận Dà lơgar Việt Nam càr neh hòi jà, lam lơh hìu tam klăc dờng ai hìu rơƀah, hìu kal ke bè hìu ơm gơwèt thôn, ƀòn tàm ală sàh gơtìp kal ke, tiah nhàr lơgar, tiah gal làng bol jơi bơtiàn ờ gal cau. Dơ̆ lam sồr neh geh ală cau geh nùs nhơm niam, ală mpồl lơh broă, mpồl lơh sa kă bro, kwang bàng, cau lơh broă dong kờl tă geh rơlao 23 tơmàn đong, neh lơh gơs mờ jào rơlao 300 nơm hìu ai hìu rơƀah in lài mờ satềp nam pa Ất Tỵ. Tàm ală hìu pa geh jào, nùs nhơm wă rò satềp chờ bơh ală hìu làng bol dê. Ală hìu “tam klăc dờng” gam lơh geh bơta pràn nàng làng bol pơn jăt tai lơh broă sa, brồ guh lik klàs rơƀah, bơ̆t bơtàu rài kis hờm ram, gơboh gơbài rơlao.