Ƀòn kơnòm dềt SOS Dà Làc tŭ do gam sền gàr, ròng siam 46 nă kơnòm dềt kòn đời, kơnòm dềt gơtìp sơrbì is mờ kơnòm dềt gơtìp kal ke bơh 5 tus 18 sơnam. Bơdìh hơ̆ tai, 34 nă kơnòm gam bơsram tàm ală hìu bơsram đại học, cao đẳng kung pơn jăt tai dờp geh broă dong kờl bơh ƀòn do dê.

Neh ơm tàm ƀòn do 8 nam, oh Huỳnh Thị Như Ngọc, bơsram ơdŭ 8, sền gơlơh do bè hìu nhă tờm, do là anih mờ ală bi, ală lŏ kờñ gơboh bal, dong kờl bal tàm broă bơsram sră mờ rài kis: “Tàm ƀòn do ală bi, ală lŏ geh tàm gơboh bal mờ geh gal ngan bơyô nrơh nrang tàm ƀòn den bol kòn nhơl bal chờ hờp ngan, bơsram sră den tam lùp bal jơnau bơsram. Di tàm dơ̆ lơh chờ, ală mlŏ, ală kồñ sùm sền gròi, tam pà bal mờ bol kòn. Satềp Trung thu nam do bol kòn geh uă ngan mpồl cau năc tus còp mờ pà phan”.

Ală kàl Satềp Trung thu lài, ală kơnòm dềt geh sền tamya triă, nhơl gŭ đèng, nhơl chờ mờ tus bal ală broă lơh bal. Nam do, ală dơ̆ trồ mìu sùm tàm Dà Làc ờ lơh nùs nhơm chờ satềp Trung thu gơmù. Ală kơnòm dềt kung gam geh ală dơ̆ tìp măt, ală phan pà bal mờ ală tŭ geh nggui tàm boh bơr bal. Gơwèt mờ oh Hoàng Thị Thu Thủy, satềp Trung thu tàm ƀòn do là ală dơ̆ kah wơl mờ oh gơlơh chờ hờp ngan: “Tơl kàl satềp Trung thu tus, bol kòn geh ală bi, ală lŏ tus tàm do bơyai lơh broă lơh bal mờ ală phan pà, ală jơnau nhơl. Bol oh geh klơm mbar do, geh lơh gŭ đèng, geh đơs crih tamya mờ boh bơr bal chờ hờp ngan. Nam do trồ mìu uă ngan mờ ală mlŏ, ală wa kung tus pà phan bol kòn in sơl. Kòn ưn ngài uă ngan bè ală kàl satềp Trung thu bè do”.

Dùl nơm ƀan, dùl nơm gŭ đèng ha là phan pà tàm mang chờ geh sền là ờ dờng bè phan bơna, mơya gơwèt mờ ală kơnòm dềt gam dờng pràn tàm Ƀòn SOS Dà Làc, hơ̆ là broă sền gròi, là nùs nhơm geh kờñ gơboh mờ tam pà bal. Ồng Trần Bảo Long, Lam bồ Ƀòn kơnòm dềt SOS Dà Làc pà git, bơdìh mờ priă geh bơh mpồl lơh broă SOS dê, broă drơng gàr kơnòm dềt tàm ƀòn do gam dờp geh broă dong kờl bơh gơnoar atbồ ƀòn lơgar bal mờ ală cau geh nùs nhơm niam: “Gơwèt mờ kơnòm dềt tàm 1 nam geh 3 dơ̆ satềp: satềp nam pa, satềp Trung thu, mờ satềp kơnòm dềt ngai 01 nhai 6. Satềp Trung thu tàm ƀòn do nam do jơh ală kòn tàm ƀòn ndrờm geh dờp uă nùs nhơm kờñ gơboh bơh ală kấp, gơnoar atbồ ƀòn lơgar, bơh ală cau geh nùs nhơm niam kơ̆p kờñ cèng tus ală kòn in dùl kàl Trung thu geh tơl, hờm ram”.