Tàm ƀlàng Hìu bơsram kâp 2 Nguyễn Văn Cừ, ƀòn dờng Buôn Ma Thuột, càr Dăk Lăk, ală kơnòm bơsram chờ hờp ngan mờ ală bơta nhơl ñŏ bơh yau bè dŏ che, tam ya gai, lềt mat kup be. Oh Nguyễn Việt Hùng, kơnòm bơsram ơdŭ 8B pà git, do ờ mìng là ală bơta nhơl ñŏ mờ gam là broă lơh tàm gùng jòi git bè tơngu rơyas jơi bơtiàn bơh hìu bơsram bơyai lơh di dơ̆ Duh kah bơtau Hùng: “Bơh broă lơh, oh pơn yờ să ngan bè bơhiàn bơh yau jơi bơtiàn dê mờ kung dong oh geh tai uă jơnau git wă bè bơhiàn bơh yau. Oh gŏ git ưn ngài bè dà kơl hề bơt bơtàu dà lơgar bơh bơtau Hùng dê. Là dùl nă kơnòm bơsram den oh pal bơsram tryăng tryồng nàng ờ lơh moat jrùm tus pơgru, mè bèp mờ di mờ mat sơnđan là sau gơ lòng sồr Wa Hồ dê”.

Ai oh Trần Văn Bảo, bơsram bal dùl ơdŭ den gŏ gơ lơh niam ngan mờ jơnau bơsram geh kuơ ngan bơh jơnau lơh lèu “bơceh is lơh is” bơh ală bơyô tàm ơdŭ dê bè jơnau yal yau “mbar lơm pòng, mbar ƀŏ”: “Ală bơyô lơh niam ngan mờ duh hồl ngan, chờ hờp ngan mờ oh kờñ ngan rlau jơh là dơ̆ lơh lèu bè yal yau bơh lơi geh mbar lơm pòng, mbar ƀŏ. Jơnau lơh lèu hơ̆ geh kuơ ngan mờ gơ niam chài ngan cèng wơl uă jơnau git wă geh kuơ bè kah yau. Oh kung bơsram geh jơnau là bol he pal pơnđơl bơsram jak nàng lơh ngan bơt bơtàu mờ pơgồp bơnah gơ gơs cau geh kuơ ai mpồl bơtiàn in”.

Bơh bồ nhai 3 nam lơgar he dê, pơgru mờ kơnòm bơsram Hìu bơsram kâp 2 Nguyễn Văn Cừ neh lơh ngan tàp ală jơnau đơs crih tamya nàng tus bal broă lơh bơdìh tŭ jơ bơsram tàm ơdŭ jat tơngai pơrjum. Mờ tơngume “Mhàm Lạc Hồng”, broă lơh bơdìh tŭ jơ bơsram tàm ơdŭ dơ̆ do wèt tus ngai duh kah bơtau Hùng (ngai 10 nhai 3 nam lơgar he dê). Pơgru Vũ Thị Thu Hằng, lam bồ mpồl môn Jơnau Kah yau- Địa lý- Bơto bơtê làng bol bơh hìu bơsram dê yal: Ờ mìng là dùl broă lơh pơrjum, bol hi kờñ kơnòm bơsram git uă bè jơnau gơtha bơh ngai duh kah bơtau dà lơgar dê nàng ală oh in git là nùs nhơm kờñ gơboh dà lơgar ờ mìng geh ai tơnggŏ bơh jơnau đơs mờ gam pal bơh nùs nhơm mờ broă lơh ngan ngồn tai: “Tàm broă lơh Mhàm Lạc Hồng, mpồl neh pơlam ală oh jòi git, tơnơ̆ hơ̆ jòi ală jơnau đơs crih đơs bè rài mè Âu Cơ, Lạc Long Quân mờ ai ală bơyô in lơh lèu chờ hờp rlau tai là jơnau yal yau bơh lơi geh mbar lơm pòng, mbar ƀŏ bơh rài bơtau Hùng dê, yal wơl jơnau bơtau Hùng neh lời wơl gơnoar lơh bơtau ai Lang Liêu in, jơnau yal rhiang nai tap gơ lồ gơs dồ rhiăng nă kòn mờ dùl jơnau lơh lèu tamya ală oh dê. Bơh ală broă lơh do dong ală oh jòi wơl ală bơta nhơl ñŏ bơh yau bơh ală tiah dê nàng lơh ală broă lơh duh hồl rlau”.

Nàng dong kơnòm bơsram git kah yau dồ bă niam rlau, hìu bơsram kung neh lơh dơ̆ pơrlòng jòi git bè rài bơtau Hùng, gơ hòi gơ jà gal ngan kơnòm bơsram tus bal. Ală oh geh tam pà gơs mpồl nàng hơ ală jơnau lùp bè kah yau, niam chài mờ jơnau yal yau gơ rềng tus ală bơtau Hùng. Bal mờ hơ̆, ală ơdŭ gam rơcang ală jơnau bơyai lơh nàng kờñ lơh wơl ală jơnau yal yau tiơng pơn rơ bè: Sơn Tinh – Thủy Tinh; jơnau yal yau bơh lơi geh mbar lơm pòng, mbar ƀŏ… Bơh hơ̆ dong ală oh geh bơta sền sơ wì niam rlau bè kah yau jơi bơtiàn dê. Oh Nguyễn Hoàng Nam, kơnòm bơsram ơdŭ 8C, hìu bơsram kâp 2 Nguyễn Văn Cừ chờ hờp đơs: “Oh lơh pơgap kòn klau bơtau Đệ Nhị tàm jơnau lơh lèu bè jơnau yal yau bơh lơi geh mbar lơm pòng, mbar ƀŏ. Bơh broă lơh do, oh sền gŏ bơta kuơ là broă bơtau Hùng neh lời wơl gơnoar broă bơtau ai Lang Liêu in tài jak chài, geh nùs nhơm niam, gơ lòng sồr mờ bơceh lơh tàm broă lơh tai. Bơh hơ̆ kung tơnguh nùs nhơm bơceh lơh tàm lơh broă bơh làng bol Việt Nam dê. Oh kung pơn yờ să ngan bè bơhiàn jơi bơtiàn he dê”.

Jat ồng Nguyễn Văn Lợi, Lam bồ phó Hìu bơsram kâp 2 Nguyễn Văn Cừ đơs, broă bơto bơtê kah yau kung bè bơto bơtê bơhiàn bơh yau bơh ală hìu bơsram dê tŭ do li la ngan. Bơdìh mờ broă lơh ờs mờng là lòt lơh chờ, chu ñàng tàm hìu duh khoai kah kơlôi bơtau Hùng, tàm tŭ tơngai pa geh uă ngan broă dong kơnòm bơsram lam lơh ngan ngồn nàng git bè tơngu rơyas jơi bơtiàn dê. Ồng Nguyễn Văn Lợi đơs: “Bơto bơtê ală oh kah bè tơngu rơyá, git bè mhàm Lạc Hồng mờ bơto ală oh in git uă rlau tai bè nùs nhơm kah ưn ngài bèp ồng he dê neh geh dà kơl hề bơt bơtàu dà lơgar mờ sền gàr dà llơgar mờ nàng ală oh in gơtùi git kơnòl broă bơt bơtàu dà lơgar. Broă lơh bơto bơtê do geh lơh sùm, dong ală oh chờ hờp nhơl ñŏ, lơh gơlik nùs nhơm niam tŭ ală oh lòt bơsram”.

Bơh ală broă lơh bơdìh tŭ jơ bơsram tàm ơdŭ, mờ ală broă lam lơh li la, ờ mìng dong kơnòm bơsram Dăk Lăk git tai bè kah yau mờ gam pơlam tàp bơta chài lơh broă mpồl, nùs nhơm tam klac bal mờ nùs nhơm kah ưn ngài gơ wèt mờ tơgu rơyas jơi bơtiàn. Do là ală bơta kuơ dờng màng dong ală oh gàr nùs nhơm kờñ gơboh dà lơgar, đòm jat bơhiàn “Hùc dà kah tô dà” bơh jơi bơtiàn Việt Nam dê.