Tàm Anih ơhò ơm ling dà lềng Cam Ranh, ală cau măi Ơhò ñơ̆p mur 189 Ling dà lềng gam tơryang tơryồng pơlam tàp ală broă lơh crăp rcang tam lơh. Gơwèt mờ kwang bàng, cau măi ơhò, lơh tờm ơhò ñơ̆p mur Kilo 636 pa ngan ờ mìng là bơta chờ hờp lơm mờ gam là kơnòl is ồn ngan. Mờ mat sơnđan là “Bơtô jù dà lềng dờng” ơhò ñơ̆p mur Kilo 636 ngui bơta pràn tam lơh pa ngan, sồr kwang bàng, cau măi ơhò pal gĭt loh, lơh tờm mờ ngui geh cồng nha nàng pơgồp dùl nùs nhơm kơ̆ ngan mờ ală mpồl ling, sền gàr kơ̆ kơnhăp gơnoar tờm dà lềng, bồt bơlào Dà lơgar tờm dê. Thượng tá Hàn Văn Hiếu, Cau đơng lam măi Ơhò ñơ̆p mur 182- Hà Nội, pà gĭt:

"Bol añ sùm sền broă pơlam tàp là kơnòl broă tờm, ai lơh jat ală jơnau neh bơsram là tờm, bơsram tàp tàm bơta rềp mờ bơta geh ngan tam lơh nàng tơnguh uă bơta pràn crăp rcang tam lơh, lơh tờm jơh ơhò ñơ̆p mur pa ngan, crăp rcang dờp mờ lơh sir niam ngan tơl kơnòl broă, sền gàr kơ̆ kơnhăp gơnoar tờm dà lềng, bồt bơlào bơh Dà lơgar tờm dê”.

Mờ krơi is bơh dùl mpồl ling is ồn, gùng lòt bơh dơ̆ lòt tàm dà lềng là dùl bơta lòng. Ală kwang bàng, cau măi ơhò ñơ̆p mur uă ngai sùm ờ sền gŏ bơta àng mat tơngai dê. Tiah ơm hat hal, ờ tơl nhơm tă. Mìng dồ ết tìs dềt lơm kung gơrềng tus lơngăp lơngai bơh jơh ơhò dê. Jat Thượng tá Nguyễn Văn Thuân, Chính trị viên Ơhò ñơ̆p mur 183 – ƀòn dờng Hồ Chí Minh pà gĭt: bơdìh mờ bơta chài ờs mờng, cau ling ơhò ñơ̆p mur gam pal geh nùs nhơm khin cha chính trị kơ̆ ngan mờ nùs nhơm pràn kơl dang kơ̆ ngan nàng lơh jat kơnòl broă tàm dơlam dà lềng jrô dê:

“Kơnòl broă bơh bol añ dê là kơnòl broă krơi is, tàm ơhò den tơl nă cau bè dùl, jơh ală kwang bàng, cau ling ndrờm đềt mềr gơ gơs dùl mpồl ring bal. Mìng geh dùl tiah halà dùl nă cau geh bồ tơngoh kwi kwơ, ờ tơl bơta kơ̆ nùs rơ̆p gơrềng tus jơh mpồl ling tàm ơhò mờ gơrềng tơn tus broă lơh sir kơnòl broă bal bơh mpồl ling dê. Den tàng, lài mờ dơ̆ lòt tàm dà lềng, jơh gùt mpồl ling geh griăt tàm ơhò ndrờm pal geh nùs nhơm bal, jơnau kờñ bal, bơt bơtàu nùs nhơm khin cha chính trị kơ̆ kơl jăp, gàr kơ̆ nùs nhơm tam klăc bal, đềt mềr, ring bal nùs nhơm mờ jơh nùs lơh ngan uă ngan rlau jơh nàng lơh sir jak ngan tơl kơnòl broă geh jàu”.

Ết ngan cau gĭt là, nàng geh ală dơ̆ lòt gùng dà lềng lơngăp lơngai tŭ do, ală rơnàng kwang bàng, cau măi ơhò bơh Lữ đoàn 189 Ling dà lềng neh pal lòt gan gĭt nđờ rơbô bơta kal ke. Bơh broă bơsram dà đơs lơgar ndai, lơh kwèng mờ ală jơnau  măi mok kal ke ngan tus gĭt mờ măi mok pa ngan lam lài dunia dê... jơh ală bơta hơ̆ là ală bơta lòng ờ dồ ết. Trung tá Nguyễn Đình Danh, Ơhò ñơ̆p mur 186 – Đà Nẵng, pà gĭt:

“Bơh tàm tŭ geh dờp sră nggal mìng gah broă, bol añ neh lơh ngan kơlôi sơnơng is, tàm bơyai bal, cribơyai bal mờ gơ̆p jat tơl mpồl, tơl gah broă, tơnơ̆ hơ̆ ngui ală jơnau bơsram geh bơsram tàm lơgar pơgồp bal mờ ală jơnau bơsram geh bơto bơtê tàm lơgar ndai nàng mhar ngan gĭt kơ̆ jơnau bơsram dê. Tŭ geh bơsram bơta geh ngan mờ bơsram tàp tơn tàm măi mok, bol añ ngui uă ngan rlau jơh tŭ tơngai nàng tàp tàm măi mok, gĭt loh ală broă kờñ jòi gĭt, ngui, mut ngui mờ prap gàr sền gàr bơh ală măi mok rcang hơ̆ dê. Kơnờm hơ̆, kwang bàng, cau măi ơhò mờ mhar ngan lơh tờm ală phan tam lơh, rcang lài măi mok pa ngan tŭ do dê”.

Bơh ală ơdŭ bơsram sơn rờp gam bềng bơta kwi kwơ bơh ală cau măi ơhò ñơ̆p mur dê tàm lơgar Ală ƀang Nga, bơh ală ngai tơryang tơryồng tàm tiah pơlam tàp, cơldŭ tàp măi tus Anih tờm pơlam tàp ơhò ñơ̆p mur tàm Cam Ranh mờ tềng hơđơm dơlam dà lềng jrô, tus tŭ do kwang bàng, cau măi ơhò Lữ đoàn 189 neh ngan ngồn lơh tờm ală ơhò ñơ̆p mur Kilo 636 pa ngan. Thượng tá Phan Thanh Quang, Phó Lam bồ Lữ đoàn, Lam bồ mpồl dong broă, Lữ đoàn Ơhò ñơ̆p mur 189 Ling dà lềng pà gĭt:

“Ală nam do, Lữ đoàn neh sùm lơh pràn broă lơh bơto bơtê chính trị, bồ tơngoh, lơh bơnàng jă tơnguh uă nùs nhơm lơh ngan mờ nùs nhơm geh kơnòl tàm lơh jat kơnòl broă, tơrgùm bơto bơtê bơhiàn ờs mờng, bơta chờ hờp, pơn yờ să geh drơng broă, tă pơgồp dà kơl hề tàm mpồl ling; lơh kah wơl bơta kờñ, jơh nùs jơh tồr; bơta gĭt wă, kơnòl bơh kwang bàng, cau măi ơhò ñơ̆p mur dê tàm tŭ bơsram mờ lơh broă. Ngui niam bơhiàn ờs mờng “Tam klăc, duh rơngòt kơrnoăt boh lam, ndơ̆p ndơr, lơh tus geh” bơh mpồl ling Cau khin cha mpồl ling phàu crong làng bol dê, kwang bàng, cau ling Lữ đoàn Ơhò ñơ̆p mur 189 rơ̆p pơn jat tai tam klăc bal, lơh tờm bơsong kal ke, jơh nùs lơh ngan lơh sir jak ngan tơl kơnòl broă geh jàu, pơgồp bơnah sền gàr kơ̆ kơnhăp gơnoar tờm dà lềng, bồt bơlào dờng màng bơh Dà lơgar tờm dê”.

Tàm tơngai pa tŭ do, kơnòl broă sền gàr gơnoar tờm dà lơgar bơh tàm dơlam dà lềng bơh Lữ đoàn Ơhò ñơ̆p mur 189 Ling dà lềng dê ngai sơlơ kơn jơ̆ kơn jŭt ngan. 15 nam- dùl gùng lòt ờ hềt jòng mơya tơl nàng đơs nền gơnoar bơh dùl mpồl ling is ồn nhăp nhar bơh Ling dà lềng Làng bol Việt Nam dê. Tàm gùl dơlam dà lềng jrô, ală cau ling ơhò ñơ̆p mur kung gam ngềt  ngơ̆t pơgồp bal dà kơl hề, ngềt ngơ̆t sền gàr tơl nhàr dà lềng bơh Dà lơgar tờm dê. Ală cau ling is ồn tàm mpồl ling is ồn dê- gam cih tai “Jơnau đơs crih gàr dà lềng” bơh tàm dơlam dà lềng dờng, sền gàr kơ̆ kơnhăp gơnoar tờm dà lềng, bồt bơlào, tơr è dà lềng dờng màng bơh Dà lơgar tờm dê.