Tơnơ̆ tŭ iat jơnau yal mờ ală jơnau đơs, đơs pơn dut dơ̆ lơh broă, ồng Tô Lâm, Tổng Bí thư, Chủ tịch lơgar đơs loh, broă lơh rơcang lài drơng mờ trồ tiah lơh aniai bơh tŭ do tus jơh nam 2026 ờ mìng là kơnòl broă drơng wơl mờ broă gơlik geh, mờ là bơta lòng pràn jak đơng lam, sồr lơh, đơng lam lơh jat bơh jơh gùt anih lơh broă chính trị dê; là bơta pal geh kuơmàng nàng gàr kơ̆ rài kis làng bol, sền gàr cồng nha lơh geh tàm bơtàu tơnguh mờ lơh jat jơnau kờñ gơguh tai jơnhua bơh ală càr, ƀòn dờng dê.

Ồng Tô Lâm, Tổng Bí thư, Chủ tịch lơgar đơs sùm 5 jơnau sồr lơh dờng, tàm hơ̆ jơnau sồr pal lơh sùm là sền gàr màng kis làng bol là jơnau sồr dờng ngan rlau jơh, là jơnau sồr pal jat dờng ngan rlau jơh. Tài phan bơna gơtùi lơh geh wơl, broă lơh gơtùi lơh niam wơl, kàl lơh sa gơtùi lơh wơl, mơya màng kis kòn bơnus dê den ờ geh bơta lơi gơtùi bơ tơl wơl. Tơl broă rơndap lơh, tơl jơnau lơh nền đơng lam, sồr lơh, tơl bơta priă jền hòi jà tă pơgồp pal wèt lài ngan tàm broă sền gàr làng bol, ngan là cau kra, kơnòm dềt, cau ùr geh bun, cau kuet kơlte, làng bol tàm tiah ngòt rơngơt; bơdìh hơ̆ tai, broă lơh rơcang lài drơng wơl pal cuă bồ, lòt lài dùl cơnđuà. Ồng Tô Lâm, Tổng Bí thư, Chủ tịch lơgar sồr, ală ƀộ, gah broă lơh dà lơgar, kâp hơ đơm pal yal mơ jơnau rơcang drơng mờ bơta El Nilno, trồ prang dờng soat dà, dà hang mut, ờ tơl dà, ồs sa brê; mờ kung là ală broă rơndap lơh drơng mờ mìu càl rbut dờng, dà kŏ dà cò, tơrlah ù, gơbam dà tiah drà, bơta ờ niam gơ rềng tus tơnau dơng dà, bơtơt kìng dà. Jơnau rơcang lài pal lơh jat di tơl tiah, tơl ƀòn lơgar, tơl tiah dà, tơl mpồl broă lơh, tơl mpồl làng bol ơm kis ƀuơn gơtìp gơ rềng. Di dơ̆ do, ồng Tô Lâm, Tổng Bí thư, Chủ tịch lơgar kung sồr, tơnguh bơta niam tơngkah lài, kờp dŭ lài mờ yal jơnau tơnggit tus làng bol, is ồn là lơh kràñ bơta duh rơngòt adat boh lam bè rơndap ù tiah, bơt bơtàu, phan kuơ geh is mờ tiah ơm kis.