Geh bơyai lơh tàm 3 ngai, tàm Dơ̆ pơrjum do, Anih duh broă Lơh kơnòl broă sùm Quốk hội sền wơl, pơgồp jơnau đơs tàm uă tơngu me nàng drơng broă rơndăp tăp sèng anih lơh broă, mpồl kwang bàng lơh broă. Bè broă bơ̆t bơtàu Adăt boh lam, tàm pơrjum do, Anih duh broă Lơh kơnòl broă sùm pơgồp jơnau đơs bè broă rơcang cih adăt boh lam Lơh broă Cíñ phủ (tam gơl); broă rơcang cih Jơnau lơh nền bơh Quốk hội bè broă lơh niam wơl Cíñ phủ tơngai lơh broă Quốk hội khoă 15; broă rơcang cih Adăt tơlik sră nggal adăt boh lam (tam gơl); broă rơcang cih Jơnau lơh nền bơh Quốk hội bơsong ală bơta gơlik geh tàm ală jơnau pal jăt tàm adăt boh lam gơrềng tus broă rơndăp tăp sèng wơl mpồl lơh broă di pal; broă rơcang cih adăt tam gơl, bơtơl ờ uă bơta tàm Adăt Rơndăp broă Quốk hội…

Anih duh broă Lơh kơnòl broă sùm Quốk hội kung sền wơl, ring bal jơnau lơh nền kĭ sồr bơh Anih atbồ Anih sền gròi ai ngui adăt boh lam dờng rơlao jơh bè broă rơndăp mpồl lơh broă tàm Anih sền gròi ai ngui adăt boh lam dờng rơlao jơh; Jơnau lơh nền bè ală jơnau pal jăt, jơnau kờñ mờ khà tam pà priă bơcri bơh kes priă dà lơgar tơngai bơh nam 2026 tus 2030. Tàm pơrjum, Anih duh broă Lơh kơnòl broă sùm Quốk hội kung rơ̆p pơgồp jơnau đơs bè broă kwang bàng jăt gơnoar geh ai.