Tàm hơ̆, Mpồl Ơruh pơnu kwĕt kơlte Việt Nam neh pơgồp bal mờ ală mpồl lơh sa kă bro AI mờ ală cau gĭt wă jrô bè măy mŏk nàng kờñ bơto pơlam phan ngui bồ tơngoh jak kòn bơnus dê lơh is, dong cau kwĕt kơlte lơh niam ngan rlau jơh broă lơh mờ rài kis; tơngguh uă gĭt wă, bơta chài ngui măy mŏk bơh ơruh pơnu kwĕt kơlte dê. Do kung là broă lơh nàng kờñ lơh jăt Jơnau lơh nền tàm pơrjum 57 bơh Ƀộ Cíñ trị dê bè tam gơl pràn bơtàu tơngguh jak chài măy mŏk, tam gơl pa bơceh lơh mờ tam gơl sồ dà lơgar.

Tàm ală ngai nhai 03 do, uă ơdŭ bơsram tơn mờ geh bal bơsram bơh tàm internet bè AI, tam gơl sồ gam geh lam lơh ai ală ơruh pơnu tàm jơh gùt lơgar in, tàm hơ̆ geh ơruh pơnu kwĕt kơlte. Ală cau gĭt wă jrô bè AI, cau bơceh lơh tơngume sồ tiơng pơnrơ neh yal ală bơta tờm ngan, rềp mềl ngan mờ rài kis mờ ƀươn ngui ngan rlau jơh tàm broă lơh pah ngai bơh cau kwĕt kơlte dê.

Bulah kwĕt kơlte kơn jơh tềng jơng mờ pal ntrờn mờ rơndeh chồl, mơya bi Đoàn Ngọc Chiến, ƀòn tờm tàm Hà Tĩnh ờ gŏ lời siơ̆u dùl dơ̆ pơlam tàp lơi bơh ală cau gĭt wă jrô dê. Iăt tơryăng ngan mờ cih wơl tàm sră pơ àr nền nòn ngan ală jơnau gĭt wă pa kờñ ngan ai broă lơh in pah dơ̆ tus bal ơdŭ bơsram jơh gùt làng bol bơsram jơh rài kis (bơsram sồ) bơh Mpồl Ơruh pơnu kwĕt kơlte Việt Nam dê bơyai lơh, bi Chiến yal: “Broă lơh tờm là kă bro hìu ràng tăc phan Petshop. Añ gŏ kă bro sồ tŭ do gam bơtàu tơngguh ngan, is ồn tàm ală phan ngui tiktok, kơ̆p kờñ bơh añ dê là gơtùi ngui geh măy mŏk AI tàm broă bơtàu tơngguh ală tơngume, broă lơh ală tơnggume, video viral…Tŭ gĭt Mpồl Ơruh pơnu kwĕt kơlte Việt Nam bơyai lơh broă lơh jơh gùt làng bol bơsram jơh rài kis (gam geh hòi là bơsram sồ) ai cau kwĕt kơlte in, añ neh cih mat dan lòt bơsram, cau kwĕt kơlte geh dong kờl gĭt uă rlau tus măy mŏk AI, nàng gơtùi jòi broă lơh dipal mờ dong geh să tờm. Añ kơ̆p kờñ tơnơ̆ tŭ bơsram gơtùi lơh gơlik geh is ală bơta tơngume, video viral hơ̆ mờ ờ duh pal kơnòm dồ mpồl cau lơi ndai”.

Bal mờ broă kă bro hìu ràng tăc phan bơka ai phan ròng in tàm Hà Nội, bi Đoàn Ngọc Chiến gam lơh yal tơnggĭt mblàng yal jơnau tàm Anih tờm Bơto bơtê broă lơh mờ Bơtàu tơngguh pràn jak cau kwĕt kơlte Việt Nam. Tài bè hơ̆, tŭ tus bal ơdŭ bơsram, bi Chiến neh geh ală cau gĭt wă jrô ndai yal bè ală phan ngui AI bè Copilot mờ ală jơnau tơl pràn mờ broă gơ dong kờl broă lơh pah ngai: bè mblàng sền jơnau yal tơnggĭt, bơceh lơh tơngume; bơto pơlam bơta chài bơsram mờ ngui nàng rơcăng cih sră nggal mhar, lơh geh jơnau yal, lơh geh jơnau kơlôi…

“Broă lơh là pơnđàng jơnau cih yal tơnggĭt mblàng yal bơh Anih tờm dê, lơh ală rơndăp broă loh nàng hòi jà dong kờl priă jền; lơh ală broă rơndăp lơh bơtàu tơngguh ai anih tờm in…den tàng tŭ tus bal broă lơh do mờ geh ală cau geh bơta gĭt jrô broă AI bơto pơlam, dong kờl, añ ngui uă rlau tus măy mŏk sồ nàng gơtùi jòi sền mờ jòi bàn jơnau tơl pràn să tờm dê nàng ngui tàm broă lơh he dê, bè copilot, añ gơtùi ngui tàm lơh ală broă rơndăp lơh broă lơh, lơh gơlik tơngume yal tơnggĭt uă, ală jơnau kơlôi nàng bơtàu tơngguh broă lơh”.

Jăt ală cau geh bơta gĭt jrô, tàm bàr pe nam tus, geh 65% broă lơh tŭ do rơ̆p gơtìp ala tài bơh măy mŏk. Do kung ngan là tŭ niam ai rơnàng ơruh pơnu kwĕt kơlte Việt Nam in gĭt mờ bơto bơtê sồ, pơlam broă lơh, sơnđờm mŭt lơh broă, kă bro online, tus bal tàm ală broă lơh mpồl bơtiàn. Tềng đăp bơta geh ngan do, Mpồl Ơruh pơnu kwĕt kơlte Việt Nam neh lơh mpồl “Jơh gùt làng bol bơsram tus jơh rài kis gam geh hòi là bơsram sồ hòi tơrgùm mpồl ală cau geh bơta gĭt wă jrô khà dùl tàm uă broă krơi is, bè: AI, Blockchain, Niam lơngăp lơngai mờ Ndơ̆p ndơl yal tơnggĭt jơnau, Cau bơceh lơh tơngume sồ, Cau bơyai đơs, Rơndăp lơh wăc rùp, Rơndăp lơh broă lơh…tus bal bơto bơtê ală bơta tờm ngan rlau jơh, ngui ƀươn ngan rlau jơh tàm lơh broă mờ rài kis ai ơruh pơnu kwĕt kơlte geh bơta pràn jak in. Bi Phạm Văn Thành, Củ tịc Mpồl Ơruh pơnu Kwĕt kơlte Việt Nam pà gĭt: “Bol hi pờ ală ơdŭ bơto tơn mờ bơto tàm internet tàm 03 nhai tus. Ngai do, ƀùi sơnrờp yal tơnggĭt bè copilot bơh Microsoft dê. Bal mờ hơ̆, bol hi kung pơgồp bal mờ ală mpồl lơh broă geh ală bơta pràn jak ală bơyô gơtùi lơm mŭt tàm hơ̆ bơsram broă ngui bè AI…mờ bơta pràn jak dră wơl pơrlồm sùm yal tơnggĭt ală jơnau yal bè niam lơngăp lơngai yal tơnggĭt jơnau, sền gàr ndơ̆p ndơr yal tơnggĭt jơnau kung bè mờ ală dơ̆ bơto bơtê tơn rơ̆p dong srơh jơh gùt làng bol bơsram sồ lời ai ơruh pơnu kwĕt kơlte Việt Nam in geh cồng nha”.

Tus bal is bơh mpồl “Jơh gùt làng bol bơsram sồ”, tơl nă dùl broă bơto bơtê, tam pà jơnau gĭt wă bè AI, dong cau kwĕt kơlte pin dờn kis gơrờm bal mờ mpồl bơtiàn mờ gơtùi sơnđờm mŭt lơh broă. Bơh hơ̆, khi gơtùi dong ală cau ờ hềt gĭt bè tam gơl sồ gĭt bè broă lơh pa do. Bi Lê Công Thành, cau tờm lơh rơndăp broă lơh “Jơh gùt làng bol bơsram AI” yal: “Tơl nă cau lơh broă tàm mpồl bơtiàn ndrờm kờñ pal ngui bồ tơngoh jak kòn bơnus lơh geh is, tàm uă khà krơi is, bè: ngui tàm broă lơh halà bơsram sră, geh khà ngui tàm ơm kis pah ngai. Pơnyơu bè dùl phan sa bol he gơtùi gĭt geh bơnah tơl pràn kàr lơi. Den tàng bè hơ̆, bơta chài ngui phan ngui bồ tơngoh jak kòn bơnus dê lơh geh is pa là bơta chài kwơmàng. Bulah bè hơ̆, gơ pa ir ngan wơl, ờ hềt geh uă cau mùl màl gam ngui gơ. Broă añ dê là broă bồ tơngoh jak kòn bơnus dê lơh geh is. Añ gơn kơnờm gơtùi lơh gơrề geh bơta gĭt wă bồ tơngoh jak kòn bơnus lơh geh is ai ờ mìng uă cau kwĕt kơlte tàm Việt Nam in lơm mờ gơtùi tam pà bal bơta gĭt wă ai ală cau ờ hềt gĭt bè măy mŏk sồ in tai".

Tam gơl sồ gam sùm lơh gơrề tàm tơl broă, pờ tơlik uă tŭ niam nàng cau kwĕt kơlte in rơcăng lài rlau tài broă tus bal, gơdờp mờ kis gơrờm bal mờ rài kis, lơh geh bơta ring bal tàm mpồl bơtiàn. Ală ơdŭ “Jơh gùt làng bol bơsram sồ” gam ngai pah ngai, pah tŭ lơh gơrề bồ tơngoh ngăc ngar sồ tàm ơruh pơnu kwĕt kơlte đơs is kung bè tàm jơh gùt làng bol, dong Việt Nam bơ̆t bơtàu dùl mpồl bơtiàn sồ pa, crăp rơcăng mŭt gơrờm bal mờ bơtàu tơngguh.