Càr Dăk Lăk tŭ do geh rlau 41 rbô lồ sầu riêng, tàm hơ̆ mờr 30 rbô lồ gam pik tơnhàu, khà lơh geh kàl do kờp dŭ mờr 50 rbô tấn. Bulah bè hơ̆, gùt càr Dăk Lăk mìng rơp pa geh 280 mã sồ tiah tam mờ mờr 7 rbô 500 lồ mờ 42 mã sồ anih tàm kơldung geh đah lơgar Lo kĭ ring bal. Tŭ do, gam 165 mã sồ tiah tam mờ 66 mã anih ơn tàm kơldung neh lơh sir sră pơ àr mơya kung gam kơp Tổng cục sền swì dia phan lik mờ mut tàm lơgar lơgar Lo (GACC) sền swì.

Jat Anih duh broă Làng bol càr Dăk Lăk, bal mờ tŭ jơh ală sră pơ àr do geh kĭ ring bal den bă ù geh lơh mã sồ tiah tam kung mìng drơng mờr 40% bă ù gam pik tơnhàu. Bơta hơ̆ ndrờm mờ broă, mờr 295 rbô tấn sầu riêng kung rơp kong bơta kơn jơ̆ dờng ngan bè drà tac phan.

Bal mờ càr Dăk Lăk, ală càr Gia Lai, Lâm Đồng, Quảng Ngãi kung yal uă kal ke tŭ lơh jat Jơnau lơh nền Chính phủ sồ 38 bè mã sồ tiah tam sầu riêng mờ anih ơn tàm kơldung. Ală ƀòn lơgar dan gờñ geh jơnau pơlam ring bal bè gùng dà jàu gơnoar tac hờ lơgar ndai, mờ kung lơh sir mpồl atbồ jơnau yal tơnggit tơnơ̆ tŭ Jơnau lơh nền Chính phủ dê geh lơh jat ngan ngồn.

Ồng Nguyễn Hoàng Hiệp - Thứ trưởng Ƀộ Broă lơh sa suơn sre mờ Tiah ơm kis rơp pơgồp bal mờ ală ƀộ, gah broă lơh dà lơgar lơh broă mờ đah lơgar Lo nàng chồl tơnguh tơngai hơ pơrgon lơh mã sồ tiah tam, anih ơn tàm kơldung; mờ kung hòi jà bơtàu tơnguh tac hờ lơgar ndai sầu riêng lơh mrềt. Bulah bè hơ̆, broă lơh kuơmàng nàng gah lơh sầu riêng bơtàu tơnguh kơ̆ kơljap jŏ jòng sùm kung gam là bơt bơtàu bơta pin dờn bơh drà kă bro dê mờ lơh gơlik phan geh kơnòl. Ồng Nguyễn Hoàng Hiệp đơs loh:

“Kờñ bơt bơtàu bơta pin dờn drà kă bro dê den tơl phan lơh gơs ndrờm pal yal anih lơh gơlik, git phan bơna bơh cau lơi dê lơh, broă rơndap lơh bè lơi mờ tŭ geh broă lơh tìs den pal gơtùi git kơnòl. Tŭ măi mok jòi git anih lơh gơlik geh ngui tơl làm, bol hi rơp bal mờ ală ƀòn lơgar lam lơh ndrờm bal broă do”.