Tàm 2 dơ̆ tam lơh tam dră mờ bòl sò tơm lơgar Tây mờ lơgar Mỹ, hìu Yàng Phờk Ô chumaram Prếk Chếk, sàh Vĩnh Quới, ƀòn drà dờng Ngã Năm là tiah ròng mpồn uă cau lơh broă kăc màng. Hìu Yàng Phờk uă dơ̆ gơtìp bol sò tơm ai rơndeh par tơndùh ƀồm, rah phàu. Tŭ do, hìu Yàng Phờk Ô chumaram Prếk Chếk gơ gơs cơng tàng ai kah yau dờng màng bơh ling klàng mờ làng bol Sóc Trăng dê. Tơngai pa do, càr Sóc Trăng neh geh uă broă lơh bơcri priă lơh, lơh niam wơl, pơgồp bơnah prap gàr, ngui niam gơwèt mờ bơta kwơ kah yau do dê.

Hìu Yàng Phờk kung geh săp tàm khà là Tiah tềl lời wơl niam chài kấp càr tàm nam 2008. Đại đức Sơn Phước Lợi, đơng lam Hìu Yàng Phờk Ô Chumaram Pkếk Chếk pà gĭt: “Gơnoar atbồ tiah do, kấp ƀòn drà dờng mờ kấp càr sền gròi bơt bơtàu wơl hìu Yàng Phờk. Càr dong kờl rlau 1 tơmàn đong tàm hơ̆ geh cau kơđơng Yàng Phờk kung hòi jà cau jat Yàng Phờk tàm tiah rềp ngài tă pơgồp bal tai”.

Rê tàm sàh Vĩnh Quới tàm ală ngai do, niam ngan bè bơta tam gơl pa muh mat bơh dùl ƀòn lơgar bơh jŏ rƀah kal ke, tŭ do neh lơh sir broă lơh ƀòn lơgar pa bơtàu tơnguh uă. Rơndăp tăp sèng phan bơna bơt bơtàu ƀòn lơgar geh bơcri priă lơh dồ ròt bal, ală gùng lòt rê tàm tơrbŏ bơh sàh tus ală ƀòn mờ ală ƀòn lơgar ndai. Ală gơl gùng gam geh crăp ƀong đèng sòl àng, tam bơkào, tờm chi bơka niam; hìu bơsam, hìu sơnơm, hìu niam chài geh lơh kơnhăp dờng niam. Bơh hơ̆, ai rài kis phan bơna, nùs nhơm bơh làng bol dê sùm geh bơtàu tơnguh, priă lơh geh kờp bal tơl nă cau lơh geh 73 tơlak đong dùl nă cau dùl nam, khà hìu bơnhă rƀah uă bơta gơmù gam 2,39%.

Ồng Lâm Ở, làng bol ơm tàm sàh Vĩnh Quới pà gĭt, mờ ală bơtơ̆t rbòng dà, anih ƀồm dà lơh kơ̆ dong lơh sa lơh geh cồng nha uă: “Tŭ do, broă lơh kòi ƀuơn uă ngan, tài bơh sàh Vĩnh Quới do geh àr bơtơ̆t kơnhăp, geh anih ƀồm dà, kòi geh giă, tăc bro phan ƀuơn ngan, sơntìl phan tam kung niam ngan sơl. Tŭ do lơh sa uă ngan mờ măi mok lơm den tàng làng bol lơngai ngan, ờ duh pal lơh broă kơn jơ̆ kơn jŭt bè lài do tai”.

Tàm ală nam pa do, càr Sóc Trăng sùm sền gròi đơng lam ală gah broă, ală kấp, lam lơh di tŭ ală broă lơh jơi bơtiàn, tơrgùm lơh jat kràñ cê jơh nùs ală broă lơh, rơndăp broă lơh sơlơ tơnguh tai bơtàu tơnguh lơh sa- mpồl bơtiàn tiah làng bol jơi bơtiàn kòn cau Khmer. Kơnờm bơh hơ̆, bơta lơh sa- mpồl bơtiàn tiah làng bol jơi bơtiàn dồ ết nă cau pơn jat tai geh broă lơh bơtàu tơnguh, rài kis phan bơna, nùs nhơm geh sền gròi, ală gah lơh sơnơm, bơto bơtê, niam chài, mpồl bơtiàn geh uă bơta tam gơl niam ngan.

Châu Thành là kơnhoàl geh mờr nggùl khà kờp làng bol là kòn cau Khmer. Tŭ do rài kis bơh làng bol dê sùm bơtàu tơnguh. Là kơnhoàl geh bơta ƀuơn, bơta pràn bè broă lơh sa suơn sre, nàng bơtàu tơnguh priă lơh geh ai làng bol in, Châu Thành tơrgùm lơh pràn lơh sa jat gùng dà bơtàu tơnguh bơta kwơ gơguh tai mờ bơtàu tơnguh kơ̆ kơl jăp jŏ jòng. Uă broă lơh geh cồng nha geh lơh, bè tam rơpung jàl , tam plai táo, tam biăp tàm hìu jàl... ală broă lơh ròng phan suơn dờng jat măi mok pa... Kơnờm bơh hơ̆, bơta kwơ phan lơh geh kờp bal lơh geh 152 tơlak đông dùl nam nam 2023, priă lơh geh kờp bal tơl nă cau tàm tiah ƀòn lơgar lơh geh mờr 61 tơlak đông.

Ồng Nguyễn Văn Mỹ, Phó Củ tịc Anih duh broă Làng bol kơnhoàl Châu Thành, pà gĭt, tơnơ̆ uă nam pơnđơl pràn lơh ngan, lồi nam lài, kơnhoàl neh geh dờp lơh sir broă lơh ƀòn lơgar pa. Is ồn, khà hìu bơnhă rƀah mờ hìu bơnhă pa lik klàs rƀah gơmù mìng gam 3%: “Kơnhoàl neh tơrgùm hòi jà tă pơgồp ală priă jền, lài ngan là bơh ală broă lơh rơndăp broă lơh, ală broă lơh bè ƀòn lơgar pa, broă lơh bè jơi bơtiàn dồ ết nă cau, bơh 2 broă lơh do neh dong kờl bè bơt bơtàu phan bơna ƀòn lơgar, dong kờl làng bol lơh sơntìl, phan bơna, lơh ală broă lơh lơh sa, den dong kờl làng bol bè ală broă lơh tơrmù rƀah, dong làng bol mờ sră kham sơm kòp ờ sa priă, bơto bơtê, broă lơh dong kờl neh lơh geh cồng nha neh pơgồp bơnah dờng ngan ai làng bol in pơn đơl pràn brồ guh lik klàs rƀah, bơdìh hơ̆ den nùs nhơm bơh làng bol mờ bồ tơngoh kơlôi sơnơng pơn đơl pràn brồ guh is pơn đơl pràn lik klàs rƀah kung là dùl tàm ală bơta niam ngan bơh kơnhoàl dê”.

Mờ bơta lơh ngan uă bơh tiah do dê mờ nùs nhơm brồ guh bơh làng bol, muh mat càr Sóc Trăng, ngan là tiah làng bol kòn cau Khmer gam hời rơ hời tam gơl să, bơnĕ bơnài bal tàm broă lơh tam gơl pa bơh ƀòn lơgar, Dà lơgar tŭ do dê.