Đơs tàm pơrjum, Duh broă sùm Mpồl Đơng lam Đảng Dà lơgar ồng Trần Cẩm Tú đơs loh, nam 2025 là nam geh gơtha is ồn kwơmàng mờ là nam jơh gùt Đảng, gùt làng bol, gùt ling klàng he jơh nùs lơh ngan tơngguh mhar, tam gơl pràn lơh gơs cồng nha ală jơnau kờñ bơh Pơrjum dờng dơ̆ XIII dê neh sồr lơh; nam bơyai lơh Pơrjum dờng Đảng ƀộ ală kâp wèt tus Pơrjum dờng 14 Đảng dê; nam sơnrờp lơh jăt rơndăp tăp sèng rơndăp mpồl lơh broă ală anih lơh broă cíñ trị tơrmù dipal, lơh broă jak, gơtùi mờ geh cồng nha, lơh gơlik bơnàng jă nàng dà lơgar in mŭt tàm rài bơtàu tơngguh pa bơh jơi bơtiàn dê. Den tàng bè hơ̆, Duh broă sùm Mpồl Đơng lam Đảng Dà lơgar ai tơnggĭt tàm nam 2025 do, gah Hòi jà làng bol kờñ pal pơn jăt tai bơsram mờ kơlôi sơnơng jrô bồ tơngoh Củ tịc Hồ Chí Minh dê, nùs nhơm Đảng dê mờ jơnau sồr lơh bơh Tổng Ƀí thư ồng Tô Lâm dê tàm dơ̆ lơh broă pa do bè broă lơh hòi jà làng bol; gah do kờñ pal gĭt wă loh gơnoar broă kwơmàng is ồn mờ jơnau sồr tam gơl pa pràn kơldang broă lơh hòi jà làng bol ndrờm pal mờ kơnòl broă tàm tŭ tơngai pa tam gơl bơta yau gơgơs bơta pa dê nàng kờñ ngui niam bơta pràn làng bol, bơta pràn tam klăc dờng jơi bơtiàn, ai dà lơgar kơnhăp cơnđoà guh mŭt tàm rài pa.

Duh broă sùm Mpồl Đơng lam Đảng Dà lơgar sồr, tơngguh uă rlau tai cồng nha lơh jăt Jơnau sồr pal lơh jăt broă lơh hòi jà làng bol bơh ală anih lơh broă cíñ trị dê. Bal mờ hơ̆, pơn jăt tai tam gơl pa broă lơh hòi jà làng bol, ơm rềp mờ tiah he lơh broă, ƀòn lơgar, gĭt nền broă gơlik geh; lơh gơlik uă gah, mpồl gĭt geh jơnau yal, jơnau kơlôi sơnơng, bơta kơ̆p kờñ mờ jơnau đơs tă pơgồp đơs wơl bal mờ jơnau đơs “sền dờng màng làng bol, rềp làng bol, wờng làng bol, bơsram làng bol, geh kơnòl mờ làng bol”. Đơng lam bồ, cau ala bồ ală kâp pal sùm tìp măt, boh bơr, iăt kơno, bơsong di tŭ bơta ờ suk tàm làng bol, ngan là dơ̆ broă yal yă, pơhì pơhà, ờ niam, sa kwề sa kwà…Pơn jăt tai lơh niam broă lơh hòi jà làng bol tàm tiah làng bol jơi bơtiàn ờ gal cau, làng bol dòn yàng, ală tiah tờm bè lơngăp lơngai- sền gàr dà lơgar, tiah sar lơgar ngài, tiah kal ke, gĭt nền broă gơlik geh tàm làng bol he tàm lơgar ndai.

Duh broă sùm Mpồl Đơng lam Đảng Dà lơgar ồng Trần Cẩm Tú sồr, gah Hòi jà làng bol jơh nùs lam lơh ală kơnòl broă bơyai lơh nàng drơng Pơrjum dơ̆ XIV Đảng dê, lam lơh ală dơ̆ pơrjum cíñ trị jrô ơnàng làm uă, lài, tàm mờ tơnơ̆ Pơrjum dờng, lơh geh nùs nhơm rơcăng lài chờ hờp chờ hờn, tam klăc, pràn bơceh lơh tàm làng bol. Duh broă sùm Mpồl Đơng lam Đảng Dà lơgar ai gĭt loh, jơnau sồr tơmŭt bal Mpồl Hòi jà làng bol Dà lơgar mờ Mpồl Mblàng yal bơto bơtê Dà lơgar pơn jăt tai lam lơh sơrbăc mhar, kràñ cê jơh nùs; sồr geh gùng dà broă lơh rơndăp tăp sèng, tơrmù dipal jak chài, lơh jăt di tơngai; lơh, lam lơh jăt broă lơh lơh broă nam 2025 tơnơ̆ tŭ tơrgùm dùl, tơmŭt bal tơn: “Bol he pal tơrmù dipal rơndăp mpồl lơh broă gơlòt jăt bal mờ rơndăp wơl mpồl kwang bàng tơl nùs nhơm niam, pràn jak bơngă pin dờn lơh geh jơnau sồr kơnòl broă tàm tơngai tus. Tài bè hơ̆, gah Hòi jà làng bol lơh gơ in niam ngan broă lơh hòi jà làng bol tàm Đảng, tàm Mặt trận mờ ală mpồl cíñ trị mpồl bơtiàn, tàm ală anih lơh broă Dà lơgar mờ gơnoar ătbồ ală kâp dê tàm gah hòi jà làng bol bol he dê tơn, pal lơh geh bơta ring bal, kờñ bal, kơnòl nàng jơh nùs lơh ngan uă ngan rlau jơh, pơgồp bơnah lơh gơs niam broă rơndăp tăp sèng tơrmù dipal rơndăp mpồl lơh broă”.

Iăt kơno ală jơnau đơs tă pơgồp đơs sồr lơh bơh Duh broă sùm Mpồl Đơng lam Đảng Dà lơgar dê, Lam bồ Mpồl Hòi jà làng bol Dà lơgar ồng Mai Văn Chính pà gĭt, nam 2025 mờ tŭ tơngai pơn jăt tai, jơh gùt gah rơ̆p tam gơl pa tơl làm tơngume, gùng dà lơh broă hòi jà làng bol lơh geh jơnau sồr tàm tơngai pa. Broă tờm là tam gơl pa gùng dà mblàng yal, hòi jà làng bol, lơh pràn ngui jak chài măy mŏk, tam gơl sồ tàm lam lơh ală broă lơh broă hòi jà làng bol: “Bè bơnah broă lơh bơh tŭ do tus Pơrjum dờng 14 Đảng dê gam uă ngan, tàm hơ̆ geh ală broă ờ ƀươn soh dồ êt lơi, gơ sồr Mpồl Hòi jà làng bol Dà lơgar mờ ală anih hòi jà làng bol ală kâp pal lơh ngan uă rlau tai nàng rơcăng di tŭ iăt kơno kơlôi sơnơng, tă pơgồp jơnau đơs dan sồr mờ Ƀộ Cíñ trị, Mpồl Đơng lam Đảng Dà lơgar, ală kâp ủy ală broă lơh geh cồng nha tàm đơng lam, sồr lơh broă lơh hòi jà làng bol, broă lơh jơi bơtiàn, pin dờn jăt yàng mờ sơlơ lùp mờ làng bol mờ Đảng. Tàm nam 2025, Mpồl Hòi jà làng bol Dà lơgar mờ ală anih hòi jà làng bol ală kâp rơ̆p jơh nùs lơh ngan lơh sir niam broă lơh lơh broă".