Jat jơnau yal, tơngai lài, mpồl cảnh sát neh lơh ngan atbồ niam, tơnguh cồng nha broă lơh krơ̆ jàm, lơh jat kơrnuat lơh glài kup jàm, gàr niam lơngăp lơngai, ờdo ờdă tàm 54 hìu jàm mờ 178 sơnĕ hìu jàm dềt. Bơdìh hơ̆ tai, ală mpồl gam lơh niam broă lơh tă pơgồp jơnau đơs, lam lơh broă lơh toh glài jàm lài mờ tơngai hơ pơrgon geh bơta pal geh. Tàm 2 nam do, mờ rlau 32 rbô nă cau geh toh glài jàm, mơya khà cau lơh tìs wơl là dùl êt ngan, mìng 0,06%, ai tơnggŏ bơta niam chài kòn bơnus, bơta niam bơh rài atbồ mpồl bơtiàn he dê, mờ kung ai tơnggŏ loh cồng nha tàm broă tam gơl lơh niam wơl, bơto bơtê cau tìs dê.

Nting bơr gờm chờ ală cồng nha pơn rơ ngan mờ mpồl cảnh sát, atbồ hìu jàm neh lơh geh tàm tơngai lài; bulah bè hơ̆ ồng Tô Lâm, Tổng Bí thư, Chủ tịch lơgar kung đơs là, bol he kung pal song dơpă sền swì broă lơh atbồ, krơ̆ jàm, kis gơ rờm bal wơl mờ mpồl bơtiàn kung gam là ală bơta ờ hềt lơh thàn pơn drờm mờ jơnau sồr mùl màl. Ồng Tô Lâm, Tổng Bí thư, Chủ tịch lơgar sồr, tơrgùm lam lơh 6 gùng dà, broă lơh dờng, tàm hơ̆ pal tam gơl pa kuơmàng bồ tơngoh kơlôi sơnơng bè lơh jat kơrnuat lơh glài kup màng mờ broă lơh atbồ bơto bơtê, tam gơl pràn bơh bồ tơngoh kơlôi sơnơng atbồ cau jàm gơ gơs đơng lam broă tŭ tơngai tam gơl wơl. Ồng kung sồr, pơgồp bal nền nòn broă lơh jat kơrnuat lơh glài mờ rơcang lài, git gŏ, kơryan mờ cau tìs mờ bơt bơtàu mpồl bơtiàn lơngăp lơngai bơh chờm tơn.