Tàm ƀòn Kép, ală kir sơnrai bè dùl rài tam lơh kung geh ồng Rơ Châm Kóp đơs wơl mờ bơta pơn yờ să ngan. Nam 1965, ồng tus bal mpồl ling gàr ƀòn; 2 nam tơnơ̆, ồng geh mŭt Đảng mờ geh jàu lơh lam bồ thôn ƀòn Kép dê. Tŭ hơ̆, kơnòl broă bơh ồng dê là hòi jà ơruh pơnu tus bal tàm mpồl ling phàu crong, hòi jà làng bol tă pơgồp phan sa nàng ròng ling gàr ƀòn, ròng kwang bàng lơh broă tàm brê.  “Añ mut Đảng nam 1967, den geh jàu lơh kwang lam bồ thôn, atbồ ƀòn Kép. Tŭ hơ̆, kơnòl broă bơh añ dê là hòi jà ơruh pơnu tus bal mpồl ling klàng ƀòn lơgar, mpồl ling klàng tờm; mơkung hòi jà làng bol tă pơgồp phe, kòi, den hơ̆ sồng lam tơrgùm kòi ròng ling gàr ƀòn ròng kwang bàng tàm brê, bơt bơtàu mpồl ling gàr ƀòn tàm tŭ hơ̆”.

Tam lơh neh lòt ngài, mơya ală cau neh tă pơgồp bơta pràn sền gàr ƀòn lơgar nam lài do dê sền gŏ ƀòn lơgar tam gơl. Gơwèt mờ làng bol Ia Ly, nùs nhơm hơ̆ geh tàm pơrdờn mờ bơta rcang lài lơh broă sa, tam phan, khin cha tam gơl bồ tơngoh kơlôi sơnơng, broă lơh nàng tơnguh uă priă lơh geh.

Tàm thôn Ia Ping, cau ling yau ồng Bùi Quang Trung rơwah broă lơh tam uă phan tam, tam tàm bơrlŭ bal uă tờm chi, bơh tờm sầu riêng, kơphê tus uă bơta tờm chi sa plai. Broă lơh do mơlà ngui jơh ù tiah mờ phan điơm gơs ù dê mơlà dong hìu bơnhă geh phan bơna tơnhào gùt nam, tơrmù ƀà hoàc huơr tŭ giă dùl phan lơh geh bơh broă lơh sa suơn sre tam gơl. Ồng Trung pà gĭt, broă lơh tam uă phan tam tŭ do cèng wơl priă lơh geh pơgăp 500 tơlak đong pah nam. Ờ mìng tơnguh uă cồng nha ngui ù, broă lơh do gam dong hìu bơnhă rcang lài rlau tai tềng đap ală tam gơl bơh drà kă bro phan lơh geh bơh broă lơh sa suơn sre dê. “Añ tam tàm bơrlŭ bal phan tam mờ jơnau kờñ phan tam dong kờl bal mờ gơ̆p, kàl lơi phan hơ̆, tờm do jơh kàl den geh tơhào bơh tờm ne den tàng lơh sa hìu bơnhă geh bơnah lơi kơ̆ kơl jăp”.

Tơnơ̆ tŭ rơndăp tăp sèng mpồl lơh broă sră pơ àr gơnoar atbồ, sàh Ia Ly geh tai ù tiah nàng ngui ală bơta pràn bè ù tiah niam mờ bơta niam chài. Lòt nhơl mpồl bơtiàn geh tiah do sền gĭt là dùl gùng lòt nàng lơh geh tai broă lơh sa. Ù tiah niam chài kòn cau Jrai, ù tiah niam geh is bal mờ ală tiah tus bè liang dà Công Chúa, liang dà Đá Cổ mờ broă lơh Hìu măi đèng dà Ia Ly gam geh tàm tơrnŏ bal nàng lơh geh ală phan bơna lòt nhơl. Hìu rông ƀòn Kép lơh sir tàm qúy I nam do kung pờ tai ù tiah pơrjum mpồl bơtiàn, mơkung lơh geh bơta tờm nàng năc lòt nhơl in jòi gĭt niam chài ù tiah dê. Ồng Nguyễn Văn Ánh, Bí thư Đảng ủy sàh Ia Ly pà gĭt, sàh sền gĭt bơtàu tơnguh lơh sa pal pơgồp bal mờ prap gàr mờ ngui niam ală bơta kwơ niam chài ờs mờng dê: “Đòm jat bơhiàn sàh khin cha jak chài, sàh sền gròi ngan tus bơta niam chài kòn cau Jarai dê, tàm do bol hi geh lòt nhơl mpồl bơtiàn nàng ngui niam bơhiàn niam chài is kòn cau Jarai dê. Tŭ do geh càr dong kờl ală broă lơh jơnau kờñ dà lơgar den tàng ƀòn Kép geh lơh hìu rông ờs mờng, tàm tơrbŏ lòt nhơl brê bơnơm tàm liang dà Công Chúa, liang dà Đá Cổ, Hìu măi đèng dà Ia Ly, geh ală broă lơh hìu măi đèng dà dờng bơh dà lơgar dê”.

Bơh ală nam nhai tam lơh sền gàr ƀòn tờm tus broă lơh bơt bơtàu rài kis pa tŭ do, nùs nhơm kac màng tàm Ia Ly gam geh tàm pơn jat tai mờ ală broă lơh mùl màl. Hơ̆ là sền gàr bơta niam chài, tam gơl pa lơh sa, tềm pềr priă tă lơh, sền gàr tiah ơm kis mờ ngui geh cồng nha bơta pràn ƀòn lơgar dê. Ală broă lơh hơ̆ gam pơgồp bơnah lơh bơhiàn ờs mờng gơ gơs bơta gơn kơnờm, lơh gơlik bơta tờm nàng Ia Ly in bơtàu tơnguh kơ̆ kơljap jŏ jòng sùm, cơnđuà kơ̆ tàm gơl gùng pa.