Tàm pơrjum bơyai mìng dùl tơngume bè gùng dà tam gơl lơh sa tơlir mờ lơh jat ală broă jàu  ESG (Tiah ơm kis- Mpồl bơtiàn - Atbồ” bơh Anih duh broă Làng bol càr Gia Lai dê bơyai lơh, rlau 120 nă cau ala mat là ală cau jak chài, cau atbồ mờ mpồl lơh sa kă bro neh cribơyai bal ală gùng dà broă lơh dong mpồl lơh sa kă bro in gơ dờp mờ jơnau sồr pa bơh drà kă bro dê. Uă jơnau đơs đơs là, tam gơl tơlir là jơnau sồr gơtùi pleh klàs nàng mpồl lơh sa kă bro in lơh geh sùm sră blơi phan, pờ ơnàng drà kă bro mờ tơnguh bơta pràn jak tàm pơrlòng. Ală cau gĭt wă jrô broă lơh kung pơn jờng mpồl lơh sa kă bro pal sền tam gơl tơlir là bơnah bơcri priă ai gơguh tai kơnhăp kơ̆ in ala tài bơh priă tă lơh gơlik geh.

Đơs tàm pơrjum bơyai, ồng Phạm Anh Tuấn, Chủ tịch Anih duh broă Làng bol càr Gia Lai đơs nền, tơngai bơh nam 2026-2030, càr rơ̆p lơh pràn tam gơl sồ, tam gơl tơlir, bơtàu tơnguh lơh sa mờ măi mok lơh gơlik phan, năng lượng lơh gơlik wơl mờ broă lơh sa suơn sre ngui măi mok pa. Càr kung hơ pơr gon tam gơl pràn bơh kơlôi sơnơng atbồ tus drơng broă, lòt bal mờ mpồl lơh sa kă bro tàm tŭ lam lơh ală rơndăp broă lơh. “Càr Gia Lai rơ̆p geh broă lơh lòt bal mờ mpồl lơh sa kă bro tàm tam gơl tơlir. Dà lơgar rơ̆p dong kờl ală broă geh ngan bơh bàr pe broă lơh dong kờl. Mơya kwơ màng ngan rlau jơh là bơta gĭt wă bơh cau lam bồ gơnoar atbồ, mpồl lơh sa kă bro dê pal gŏ do là sồr pal lơh tam gơl nàng kis gơs. Càr rơ̆p pơn jat tai đơng lam, kơ̆ nùs lam lơh tam gơl tơlir tàm càr mờ nùs nhơm mhar rlau, kràñ cê jơh nùs rlau mờ geh cồng nha rlau”.

Ờ mìng tàm gah broă lơh sa suơn sre lơm, tam gơl tơlir kung gam geh càr Dăk Lăk sền gĭt là gùng lòt kwơ màng nàng bơtàu tơnguh broă lơh sa suơn sre tàm tơngai pa mờ kơnhăp kơ̆. Pa do, tàm pơrjum bơyai “Bơtàu tơnguh broă lơh sa suơn sre ngui măi mok pa: Tŭ tơngai niam mờ broă lơh kwơ màng ai mpồl lơh sa kă bro in”, ală cau gĭt wă jrô broă lơh dờp là, bulah geh rlau 824 rơbô lồ ù lơh broă sa suơn sre bal mờ uă phan bơna tăc mờ lơgar nhai tờm, mơya broă gơ hòi gơ jà bơcri priă tàm broă lơh sa suơn sre ngui măi mok pa kung gam ờ hềt ndrờm pal mờ bơta pràn dê. Ală kơryan dờng ngan tŭ do là ờ tơl mpồl cau lơh broă jak, phan bơna bơt bơtàu ờ hềt ring bal, ù niam gam ờ hoan geh mờ sră pơ àr gơnoar atbồ gam tơn jŏ.

Tiến sìh Bùi Thị Ngọc Dung, Hìu bơsram kơlôi sơnơng Rơndăp ù tiah mờ Mòn lơh broă lơh sa suơn sre pà git: “Pal geh ù tiah niam nàng yal tơngĭt ai cau bơcri priă in. Dơ̆ 2 là nùs nhơm lơh ngan bơh đơng lam bồ càr bal mờ ală sờh, gah, ală tiah dê, lơh ngan tơrmù ală sră pơ àr gơnoar atbồ kal ke jat jơnau pal jat “4 tơrmù” nàng lơh bè lơi ai mpồl lơh sa kă bro in gĭt mhar ngan rlau jơh mờ cau in mhar geh rơndăp broă lơh ngan rlau jơh. Broă lơh dơ̆ 3 là ală broă lơh mpồl cau lơh broă mờ lơh sồ jơh ală jơnau yal gah broă lơh sa suơn sre. Tŭ mờ mpồl lơh sa kă bro mut khi gŏ ală jơnau yal tơngĭt song dơ pă mờ loh làng ngan”.

Jat Tiến sìh Phan Việt Hà, Phó Hìu bơsram kơlôi sơnơng Jak chài Măi mok Broă lơh sa suơn sre- phan brê Tây Nguyên, bơtàu tơnguh broă lơh sa suơn sre ngui măi mok pa mìng lơh geh cồng nha tŭ geh bơta lơh bal niam đah Dà lơgar, cau jak chài, mpồl lơh sa kă bro mờ cau lơh broă sa, bơh hơ̆ rơwah mờ tam jàu măi mok di pal mờ ală bơta tơl tiah in, lơh geh ală bơta kwơ kơnhăp kơ̆: “Kwơ màng là gơtùi tàm tơrbŏ mpồl lơh sa kă bro mờ cau jak chài mờ cau atbồ. Nàng gơtùi là rơwah ală măi mok di pal ngan rlau jơh, bơh hơ̆ ngui măi mok di pal mờ ală bơta bơh ală tiah dê nàng gơtùi ngui măi mok hơ̆ tàm tơngai tŭ do dê”.