“Pran jak ngan ngồn là dồ nơm cing mờ cribơyai broă mờ lơgar ndai là săp ntas. Cing geh dờng, săp ntas hơ̆ sồng dờng”. Do là jơnau đơs ngan bơh Củ tịc Hồ Chí Minh dê tàm nam 1945 bè anih ơm mờ gơnoar broă bơh broă lơh cribơyai broă mờ lơgar ndai dê. Tam lơh jai pha Điện Biên Phủ nam 1954 ngan là săp ntas cing mpong ntas gùt plai ù, nggồr dờng tàm Pơrjum Geneve, lơh gơprah gơpring jơh nùs nhơm iơh bơsak sò tơm thàm phà bol sò Tây dê, lồi dŭt khi pal nggu tềng kơƀàng tàm bơyai mờ Cíñ phủ Việt Nam Zân củ Kộng hoà. Phó Thủ tướng ồng Bùi Thanh Sơn đơs ngan, Jơnau kĭ hơ Geneve 1954 là dùl tŭ tơngai gơklŏ gơcrà tàm jơnau kah yau cribơyai broă mờ lơgar ndai kăc màng Việt Nam dê, cèng bềng tềl lời wơl bồ tơngoh, nùs nhơm mờ bơta chài cribơyai broă mờ lơgar ndai Hồ Chí Minh: “Ală tŭ tàm bơyai, kĭ hơ mờ lơh jăt Jơnau kĭ hơ Geneve là pang sră bơto pơlam ơn prăp uă jơnau bơsram jrô ơnàng tơnggŏ bơhiàn niam chài krơi is bơh gah mpồl lơh broă mờ lơgar ndai mờ cribơyai broă mờ lơgar ndai lơgar Việt Nam dê, neh geh tàm pơn jăt tàm pơdờn, đòm jăt bơceh lơh mờ bơtàu tơngguh tàm tàm bơyai, kĭ hơ mờ lơh jăt Jơnau kĭ hơ Paris nam 1973 tơnơ̆ do kung bè tàm bơ̆t bơtàu, bơtàu tơngguh dà lơgar mờ sền gàr Dà lơgar ngai do”.

Ală rơnàng tơnơ̆ sùm pơñiờ să bè tam lơh jai pha Điện Biên Phủ đơs is mờ ală dơ̆ ntàu tam lơh dră wơl cau sò tơm lơgar ndai mŭt thàm phà dà lơgar he đơs bal nàng lơh ngan bal rlau tai, jơh nùs lơh ngan rlau tai tàm broă lơh bơ̆t mòn dà lơgar ring lơngai, pas pràn, gam sùm. Phó Pơgru dờng. Tiến sìh ồng Nguyễn Đức Hoà, Hìu bơsram Đại họk Sài Gòn, đơs: “Jăt añ den jơnau gơtha, bơta gơrềng bơh broă do dê kung gam jrô ơnàng làm uă ngan sơl mờ bol he pal gĭt đòm jăt. Dunia neh gĭt tus rùp să khin cha jak chài dùl jơi bơtiàn tam lơh jai pha tàm Điện Biên Phủ den dunia kung kờñ pal sền gŏ dùl dà lơgar Việt Nam pas pràn, gam sùm. Bè hơ̆ jơnau kah kir bè bơta khin cha jak chài bơh Điện Biên Phủ dê ờ hŭi roh tàm nùs nhơm làng bol Việt Nam mờ làng bol dunia”.

Tềng đăp ală tam gơl ờ ƀươn soh tàm dunia tŭ do, đòm jăt bơceh lơh ală jơnau bơsram mờng chài bơh rài tam lơh, Việt Nam neh bơsong di ngan ală bơta gĭt gơ̆p jăt tàm bơta kơ̆ dơn bơta pal jăt, rơcăng lài tàm gùng dà broă lơh mờ boh bơr lơh lòt, yờ tơnggu nùs nhơm kờñ gơboh ring lơngai mờ lơh bơyô bal, kơ̆ dơn lơh broă mờ lơgar ndai mờ lơh broă bal. Kơnờm bè hơ̆, gàr kơ̆ tiah ơm kis ring lơngai, kơ̆ kơl jăp, sền gàr kơnhăp lơngăp lơngai is, gơnoar tờm mờ tơl làm ù tiah dà lơgar, mơkung sơlơ tơngguh tai lơh broă bal drơng bơtàu tơngguh lơh sa- mpồl bơtiàn.