Ngai 26-4-1975, tơnơ̆ dùl tơngai tam lơh sơrbăc mhar, lòt ling jài mờ tam lơh mờ bol sò tơm jài tơngklàs ù tiah, mơkung bơtơl tai mpồl ling, 5 ling mpồl tam lơh tờm bơh Mpồl ling tơngklàs dê tam pà gơs 5 gah dùl dơ̆ bal sò tơm tàm anih tờm ƀòn dờng Sài Gòn- Gia Định. Cau ling yau Đoàn Đình Điểu, kah wơl: Sư đoàn ling tam lơh hơđang ù gờl 968, Ling tiah 4, dờp kơnòl broă lơh nrah jơh tiah rcang gàr lài bơh bol sò tơm dê tàm Đồng Dù (Củ Chi), lơh geh nùs nhơm geh kwơ nàng ling he in ntào tam lơh dờng mut tàm Sài Gòn. Ngai 29/04, bulah ƀồm tơdùh uă bè mìu, gar phàu gơ par bè càl rơbŭt bơh bol sò tơm dê, mờ nùs nhơm jơh nùs lơh ngan tus phi să ai Dà lơgar in, ồng mờ cau ling bal neh lam lài pờ gùng: “Jơh Sư đoàn 968 bol añ geh jơnau sồr pờ 4 gùng sò tơm: tiah đah mat tơngai mut, tiah đah Jum mat tơngai mut, tiah đah Jum mat tơngai lik, tiah đah Tô. Bol añ mut ur ar, mpồl ling dờng bơh bol añ dê tus bal tờ gùng brong, tờ bơtô, tài bơh tiah hơ̆ ờ geh chi che, bơh ngkời là brê kao su, ai đah hơ đap mìng là ƀlàng sre lơm... Bol añ pal mut 3 dơ̆ hơ̆ sồng pờ geh gùng sò tơm”.

Kah wơl tŭ jiơ kah yau bơh dơ̆ ntàu tam lơh mờ bol sò tơm tŭ rơndeh sơtăng 390 tơm tơrlah mpồng Gơlăng Độc Lập, cau ling yau ồng Ngô Sỹ Nguyên, cau ià phàu rơndeh sơtăng 390 pà gĭt: “Dơ̆ tam lơh Hồ Chí Minh sơrbac mhar sơrbac mhar, lòt tus cồng nha uă ngan. Tàm đah rê hờ đah măt tơngai lik, ling mpồl 2 bơh bol hi dê geh 2 nơm rơndeh sơtăng tus gờñ ngan rlau jơh là 843 mờ 390, là 2 nơm rơndeh bơh lam bồ mpồl ling dờng ồng Bùi Quang Thận dê mờ cau đơng lam cíñ trị ồng Vũ Đăng Toàn dê. Rơndeh sơtăng 390 bol hi dê rồn ga pràn ntoăt tơm tơrlah mpồng mŭt tàm Gơlăng Độc Lập, ala măt ai bơta pràn bơh mpồl ling klàng làng bol Việt Nam dê tơm tơrlah dùl rài ătbồ, ala măt ai bơta kơ̆p gơn ngan ring lơngai bơh jơi bơtiàn Việt Nam dê. 21 nam bềng bòl glar kal ke phi să hơ̆ sồng geh tŭ jiơ do”.

Tàm tơngai tơngkah kir sơnrai “Ù tiah dà ia brê bơnơm Dà lơgar dùl sèng” ồng Hồ Việt Hà, ơm tàm quận Long Biên, Hà Nội ngoh rơngăc kah wơl:“Añ tus tàm do tàm bơta ngoh rơngăc bơh ngai 30/04, tơngkah kir sơnrai 50 nam tam lơh pha lin tơngklàs Sài Gòn. Să tờm añ tào dờng lòt gan bơh ală dơ̆ tam lơh tam dră mờ bol sò tơm lơgar Mỹ, tơnơ̆ hơ̆ là dơ̆ tam lơh sền gàr tiah nhàr lơgar tiah đah Tô, tiah đah Jum. Tŭ do kah wơl añ ngoh rơngăc gơ dañ ñìm. Añ kờñ sền wơl ală bơta kwơ nàng hơ dùl jơnau: Mbè là Đảng mờ Wa Hồ đơng lam Dà lơgar he dê lòt gan rài tam lơh tam dră mờ bol sò tơm lơgar Tây, bol sò tơm lơgar Mỹ mờ làng bol bơh tiah đah Tô tus tiah đah Jum Dà lơgar neh wèt tus dùl broă lơh tơngklàs Dà lơgar bè lơi taih”.

Bè ală tŭ guh ntàu tam lơh bơh ală Ling mpồl dê tàm dơ̆ tam lơh Hồ Chí Minh kah yau, Đại tướng ồng Phạm Văn Trà, lài do Ƀộ trưởng Ƀộ Ling klàng pà gĭt, Dà lơgar neh rơcăng ngan, kràñ cê jơh nùs tàm sồr lơh 5 đah guh ntàu lòt tam lơh. Mờ bal mờ bơta pràn ling klàng, cíñ trị, broă lơh hòi jà làng bol, hòi jà cau sò tơm geh uă bơta niam, lơh ai cau sò tơm in gơprah gơpring jơh: “Bol he tơngklàs jơh tơn tiah đah Jum, kơnờm tàm bơta pràn jơh gùt làng bol, kơnờm tàm bơta pràn bơh pe đah tam lơh tơn mờ bol sò tơm mờ ling klàng là tờm. Do là bơta đơng lam, sồr lơh Đảng he dê, bơh Ƀộ Cíñ trị dê jak chài ngăc ngar ngan. Sồr lơh àng sơrdah ngan tai là lài hơ̆ tŭ Ling mpồl 4 ờ gơtùi mŭt tàm Gơlăng Độc Lập tài bơh gam kal ke tàm Xuân Lộc den sồr Ling mpồl 2 lòt gan dà dờng Đồng Nai mŭt tơn tàm dơlam. Tơnơ̆ tŭ Dương Văn Minh yal bơr pờ tê ờ jai tam lơh tai, làng bol jơh gùt tiah đah Jum ñă ntàu is bal mờ mpồl phàu crong ƀòn lơgar tơngklàs ală ƀòn lơgar. Bơta đơng lam Đảng dê tàm 3 đah tam lơh tơn tàm hơ̆ geh ling klàng- cíñ trị- hòi jà làng bol, hòi jà cau sò tơm, tơl làm bè hơ̆ mờ bol he neh tơngklàs jơh tiah đah Jum, tơrgùm dùl dà lơgar”.