Rơndăp broă lơh Hìu măi Đèng hạt ñân Ninh Thuận 1 tàm sàh Phước Dinh tus ngai 14/6 pa mìng ai wơl geh rlau 110 lồ ù, khà ai priă lơh geh pơgăp 44%. Broă lơh ai mat ù gơtìp uă ngan kal ke tài bơh sră nggal rơndăp ù tiah, sră ngal điện tử mờ sră nggal rơndăp broă lơh bơnah gam geh uă bơta tàm gơ lin bè bơta ơnàng, bă ù lơh jat.

Tàm Rơndăp broă lơh Hìu măi Đèng hạt ñân Ninh Thuận 2 tàm sàh Vĩnh Hải, bă ù ơnàng ù ai wơl lơh geh rlau 300 lồ, priă tă rlau 1 rơbô 200 tơmàn đong, lơh geh rlau 74%. Bulah bè hơ̆, kung gam rlau 40 nă cau pal tìp mat sền gĭt sră nggal adat boh lam nàng lơh sir sră nggal jat jơnau sồr. Tềng đap bơta kơn jơ̆ tŭ tơngai lam lơh, càr Khánh Hoà sồr ală tiah tơrgùm uă ngan rlau jơh mpồl cau, kờp sền tơl nă cau ngan ngồn nàng tă bơsong kal ke, ai lơh lài lơh sir ală bơnah broă gơtùi bơsong mơ. Bal mờ hơ̆, broă lơh tiah ơm kis pa pal geh lam lơh ring bal, gàr niam phan bơna bơt bơtàu di pal mờ ală bơta broă lơh sa mờ bơhiàn ơm kis bơh làng bol dê.