Khà năc lòt nhơl tus càr Dăk Lăk tàm dơ̆ ơm rlô Sa tềp bơhiàn jơi bơtiàn dê nam Ất Tỵ nam do gơguh 1,3 dơ̆ pơndrờm bal dồ tŭ mờ nam lài, cèng wơl priă jền lơh geh kờp jơh pơgăp 60 tơmàn đong. Jơh gùt càr neh wă rlau 180 rbô nă năc lòt nhơl, gơguh 24% pơndrờm bal dồ tŭ mờ nam lài, tàm hơ̆ 98% khà năc tàm lơgar. Ală anih lòt nhơl niam chài, kah yau gơhòi gơ jà gal năc lòt còp sền. Bè tàm Hìu prăp gàr phan kwơ yau càr Dăk Lăk dê, neh wă rlau 280 mpồl bal mờ gĭt nđờ rbô nă năc.

Ală tiah anih lòt nhơl ƀòn brê bơnơm, niam chài, nhơl chờ, lơh rài bồ tơngoh geh dà dờng, tơnau, ñrùh liang dà kung geh uă năc lòt nhơl săc rwah sơl, geh còp sền ù tiah brê bơnơm geh is lơngơm niam, ală broă lơh niam chài; tus bal ală broă lơh lòt nhơl khin cha ngòt rơngơ̆t, was plung, hàu liang dà. Gàr niam lơngăp lơngai ai năc lòt nhơl in, ală mpồl lơh broă kă bro lòt nhơl neh rơcăng niam bè phan bơna, mpồl cau dong kờl cau dong kờl phan bơna; ai cau lơh broă sùm ngai mang tàm ală ngai lài, tàm mờ tơnơ̆ dơ̆ Sa tềp bơhiàn jơi bơtiàn dê. Lơh jăt niam ală jơnau sồr bè cih măt, lir sră cih giă vĕ mờ giă ală drơng broă; tăc di giă neh lir, gàr niam sàng goh tiah ơm kis.

Mho ngai 2/02, Anih duh broă Làng bol càr Lâm Đồng yal, Sa tềp bơhiàn Dà lơgar nam Ất Tỵ do, mpồl năc tus mờ càr Lâm Đồng lòt sền, ơm rlô să gơguh mờr 36% pơndrờm dùl tŭ bal mờ nam lài. Jơh gùt càr wă pơgăp 380 rơbô dơ̆ năc tus sền, ơm rlô, gơguh mờr 36% pơndrờm mờ dơ̆ Sa tềp nam lài. Tàm hơ̆, năc Ală lơgar pơgăp 27 rơbô dơ̆, gơguh 35%;  lòt nhơl ơm ing geh 270 rơbô dơ̆ năc, gơguh mờr 70% pơndrờm dùl tŭ bal mờ nam lài. Mpồl năc lòt nhơl tơrgùm uă ngan bơh ngai 2 tus ngai 4 Sa tềp.

Pal sền gròi ngan là, tàm tŭ năc tus mờ càr Lâm Đông gơguh pơndrờm dùl tŭ bal mờ nam lài mơya năc tus tàm ƀòn dờng Dà Làc den gơmù. Ƀòn dờng mìng wă rlau 100 rơbô dơ̆ năc lòt nhơl, gơmù rlau 33 rơbô dơ̆ năc pơndrờm mờ dơ̆ Sa tềp bơhiàn Dà lơgar nam lài. Tàm tŭ Sa tềp bơhiàn Dà lơgar nam 2025, mpồl lơh broă geh gơnoar càr Lâm Đông lơh sră nggal lơh glài rlau 1 rơbô nă cau lơh tìs rơndăp tăp sèng lơngăp lơngai lòt rê tàm gùng.