Bulah neh tơrgùm bơsong jơh rŭ rơm, rcang niam ngan ală broă lơh rcang lài kơryan ồs sa brê bơh bồ kàl prang, mơya tài bơh pal gơn cau tờm lơh den tàng bơnah brê bơh Kông ty TNHH Một thành viên Lâm nghiệp Tam Hiệp Di Linh, càr Lâm Đồng kung gam sơl 70 lồ brê ờ hềt bơsong jơh phan ƀuơn ồs sa. Jat ồng Trần Tuấn Anh, nàng sền gàr brê ờ duh gơbàn ồs sa, ală mpồl lơh broă geh tàm jàu ơm gak ngai mang, ơm gak kơryan ồs sa brê: “Mpồl cau tờm ngan là mpồl mìng lơh dùl kơnòl broă sền gàr brê bơh Kông ty mờ mpồl cau jàu apah sền gàr brê là ală hìu bơnhă làng bol jơi bơtiàn dồ ết nă cau tàm ƀòn lơgar dê. Mờ ală bơta sră pơrgon jàu apah sền gàr brê den bol añ neh lơh di gùng dà broă lơh 3 bal là sa bal, ơm bal mờ lơh bal mờ ală hìu bơnhă geh jàu apah sền gàr brê do tàm ală tiah sền gàr, ală tiah tờm nàng sơlơ tơnguh tai broă lòt sền mờ sền gàr brê, gĭt gŏ mờ kơryan ồs di tŭ tàm ală tiah ồs sa, kung bè ală broă lơh lơh tìs, sơgràm brê tàm ù tiah do dê”.

Trồ tiah tàm càr Lâm Đồng gam ro kơnrañ, trồ tơngai duh, tơngkah lài ồs sa brê tàm kấp 5, kấp sơbơng roh ngan, ngan là tàm ală bă brê ờ hềt geh bơsong rŭ rơm. Ồng Nguyễn Hữu Hà, Phó Kwang lam bồ Kông ty TNHH Một thành viên Lâm nghiệp Đơn Dương, càr Lâm Đồng pà gĭt, tiah uă ngan bă brê bơh mpồl lơh broă dê drờm ơm tàm bơta do lơm, mờ tàm bơrlŭ bal mờ tiah làng bol ơm kis tai den mpồl lơh broă rcang lài kơryan ồs sa brê sùm yờ tơnguh uă bơta rcang ngăc lài:“Kông ty neh lơh uă tiah sền gàr brê ing nàng ƀuơn ai broă sền gĭt. Ai cau ơm gak jơh ngai mang mờ geh broă lơh ai tài mpồl cau ơm rcang tàm ală tiah ơm gak. Dilah tàm ală tiah ơm gak gĭt gŏ ồs sa den yal mơ mờ Anih lơh broă in nàng ai tai mpồl cau tus bal mơ”.

Nàng gàr niam lơh niam broă lơh rcang lài kơryan ồs sa brê, pa do, Anih duh broă Làng bol càr Lâm Đồng neh lơh nền tam pà jơnau kờp dŭ lài priă jền rcang lài kơryan ồs sa mờ crùh ồs sa brê kàl prang nam 2025 mờ khà priă 12 tơmàn đong. Jat ồng Lê Đình Việt, Kwang lam bồ Phó Ci kụk Sền gàr brê càr Lâm Đồng, kơnờm priă jền do, ală anih lơh broă mờ mpồl lơh broă sền gàr brê blơi di tŭ ală rơndeh rơndồ măi mok, phan bơna rcang lài kơryan ồs sa mờ crùh ồs sa brê. Tŭ do, broă lơh rcang lài ồs sa brê gam geh càr Lâm Đồng jơh nùs ngan lam lơh.

Tàm trồ tơngai duh ngan bơh kàl prang dê, ală cau lơh broă Mpồl Atbồ sền gàr brê rcang gàr bồ tô dà Ialy (kơnhoàl Chư Păh, càr Gia Lai) sùh dà kơl hề tàm dơ̆ koh wàs gùng kềng nàng kơryan ồs ai tiểu khu 239. Tàm ală tiah do rềp mờ mìr, is ồn là tiah geh uă tờm chi brê dềt, sùm geh mpồl lòt sền, sŏk sền cau lik mut tàm brê, crăp kƀàng rcang lài kơryan ồs sa brê. Ồng Lê Công Huấn, Phó Lam bồ Mpồl Atbồ sền gàr brê rcang gàr lài bồ tô dà Ialy pà gĭt:“Mpồl lơh broă bơh mpồl dê ai lơh broă jơh 100%. Ù mìr bơh làng bol dê rềp brê den bol añ kung neh tus hòi jà làng bol là tŭ chu tơdau mìr pal yal mờ mpồl cau bơh Mpồl dê. Mpồl cau bơh mpồl dê kung pal tus bal mờ làng bol nàng chu sơl. Tài bơh tŭ do là tŭ sơbơng roh ngan. Bơdìh hơ̆, mpồl kung lơh sră pơrgon jàu apah sền gàr brê gơwèt mờ mpồl bơtiàn ală làng bol tàm sàh rềp brê nàng sơlơ tơnguh rlau tai broă lơh lòt sền, sŏk sền mờ bơsong”.

Tŭ do, gĭt nđờ rơhiang rơbô lồ brê tàm jơh ală kơnhoàl bơh càr Gia Lai dê gam kong mờ bơta pơhìn ồs sa brê tàm nggùl kàl prang dê. Tàm hơ̆, kơnhoàl Chư Păh geh rlau 7 rơbô 169 lồ, tơrgùm tàm ală sàh Hòa Phú, Nghĩa Hưng, Chư Đang Ya, Đăk Tơ Ver, Ia Khươl mờ ƀòn drà dềt Phú Hòa gơwèt mpồl pơhìn ồs sa uă. Is ồn, brê nho 3 nha mờ ală rŭ rơm uă ngan là tiah ƀuơn ngan gơtìp ồs sa.

Nàng kờñ tơrmù ƀà pơhìn ồs sa brê, bơh bồ kàl prang, ală tiah neh pồ tơl Mpồl đơng lam rcang lài kơryan ồs sa mờ crùh ồs sa brê, lơh broă rơndăp lơh drơng lài. Mpồl lơh broă geh gơnoar sơlơ tơnguh tai mblàng yal, bơto pơlam làng bol ngui ồs lơngăp lơngai, jat sền niam tàm ală nhai trồ prang uă. Ală mpồl atbồ mờ sền gàr brê pơgồp bal mờ gơnoar atbồ ƀòn lơgar mờ mpồl sền gàr brê lam mblàng yal tàm ală thôn, ƀòn; tơngkah làng bol geh mìr rềp nhàr mờ brê ờ gŏ di ngui ồs khat gơboh, mơkung crăp kƀàng tơngkah lài tàm ală tiah tờm. Ồng Nguyễn Ngọc Ny, Phó Lam bồ Gah sền gàr brê kơnhoàl Chư Pah, pà gĭt, bơh kờp sền, jơh gùt kơnhoàl geh 18 tiah tờm pơhìn ồs sa mờ rlau 14 rơbô lồ brê. Ală tiah do ơm rềp mờ tiah làng bol ơm kis, gơl gùng lòt tàm ală thôn, ală sàh mờ mìr, pơhìn gơbàn ồs sa uă ngan:“Jơnau tờm gơlik ồs sa brê là tài bơh ngui ồs ờ kơrhia. Pơhìn ngan rlau jơh là gơwèt mờ bă brê pa tam, ờ hềt gơ gơs brê, rŭ rơm uă, sơbơng roh ngan. Broă lơh sền gàr brê rcang lài kơryan ồs sa brê den pal rcang lài lam lơh ală broă lơh nàng kờñ tơrmù ƀà ồs sa brê là pal ơn lài ngan rlau jơh. Gùng dà broă lơh tờm rcang gàr lài là tờm ngan, tŭ gơlik geh ồs sa den pal crùh ồs sa  gơ̆ sơ̆t ồs jơh tơn”.

Mờ bơta rcang lài bơh ală mpồl sền gàr brê, broă lơh rcang lài kơryan ồs sa brê tàm ală càr tàm tiah Tây Nguyên dê gam geh lam lơh kràñ nàng sền gàr brê, tơrmù uă ngan rlau jơh hoàc huơr tài bơh ồs sa brê.