Broă ai mẫu ADN geh lơh gơ wèt jơh bal cau pròc mhàm cau ling chơ̆t màng ờ hềt jòi bàn bơtô ƀồc halà bơtô ƀồc ờ geh ƀồc ntìng mờ geh lơh jăt jơnau pal jăt ai lài ai mẫu jăt cau đah mè. Gơ wèt mờ cau ling chơ̆t màng là cau klau, rơndăp tăp sèng ai lài là mè deh, mò deh mè, oh mi tờm dồ mè, tơnơ̆ hơ̆ tus ală wa, kồn, mơi tờm mờ ală cau pròc mhàm ndai jăt đah mè. Gơ wèt mờ cau ling chơ̆t màng là cau ùr, ai lài dơ̆ dồ dơ̆ là mè deh, kòn deh, kòn kòn ùr tờm dê hơ̆ sồng tus oh mi dồ mè mă bal mờ ală cau pròc mhàm ndai jăt jơnau sồr.

Mò Nguyễn Thị Thanh Lịch, Phó Chủ tịch Anih duh broă Làng bol càr, Lam bồ Mpồl Sồr lơh lòt jòi, rờ tơrgùm mờ đal gĭt muh măt ƀồc ntìng cau ling chơ̆t màng càr Gia Lai pà gĭt, broă tơrgùm dờp mẫu ADN là kơnòl broă chính trị geh kwơ is ồn ngan, tơnggŏ nùs nhơm “Hùc dà kah tô dà”, nàng kah rơngal ală cau khin cha jak chài chơ̆t màng neh phi să sền gàr Dà lơgar tờm.

“Gờñ geh gĭt măt cau ling chơ̆t màng, jun ală cau ling chơ̆t màng rê mờ hìu bơnhă he dê là dùl tàm ală kơnòl broă gơchồl ngan bol hi pal sơrlèt jơh uă kal ke nàng lơh. Is ồn tơngkah kir sơnrai 80 nam ngai cau ling sồt să- cau ling chơ̆t màng là dơ̆ nàng ală rơnàng kah rơngal wơl gơ wèt mờ bơta tă pơgồp bơnah ală cau ling chơ̆t màng dê ai rài lơngăp lơngai is khăt gơboh is bơh dà lơgar tờm dê in. Lơh ngan ngồn geh cồng nha uă ngan rlau jơh đal gĭt geh ADN cau ling chơ̆t màng, jòi bàn geh cau pròc mhàm cau ling chơ̆t màng”.

Tàm bàr ngai 01 mờ 02/7, bơh jơnau yal bơh làng bol dê yal, Mpồl K51, Gah Đơng lam Ling klàng càr Dăk Lăk neh đơng lam, pơgồp bal mờ Mpồl Đơng lam Ling klàng mờ Anih duh broă Làng bol sàh Krông Bông lam lòt jòi, rờ tàm kơnhoàl ù tiah sươn kơphê hìu bơnhă ồng bèp Ô Mi dê, thôn 6, sàh Krông Bông, tềng hơđơng jơng bơnơm Chư Yang Sin. Lồi dŭt, mpồl lơh kơnòl broă neh rờ tơrgùm geh 2 ƀồc ntìng cau ling chơ̆t màng. Ală tŭ rờ, Mpồl K51 gŏ uă phan lời wơl gơ jăt bal mờ cau ling bè toal tăng, àu kaki, bàr pe bơnah bơh măy yal tơnggĭt hòi lùp bal mờ phan ling klàng, phan ngui ling klàng mờ phan ngui rài kis să tờm neh gơtìp lề jăt tŭ tơngai. Nàng drơng lơh broă lùp gĭt nền wơl muh măt, mpồl lơh broă geh gơnoar neh dờp tơrgùm mẫu sề, mẫu ntìng drơng sền swì jăt nền ADN.

Tàm sơnah ƀòn Nha Trang, Gah Đơng lam Ling klàng càr Khánh Hoà bơyai lơh Dơ̆ yal jơnau lơh nền bơh Ƀộ Ling klàng dê bè tơnggơs Mpồl lòt jòi, rờ tơrgùm ƀồc ntìng cau ling chơ̆t màng “ing tŭ do”. Mpồl do geh kơnòl broă să tờm tơn lòt lùp sền ù tiah ngan ngồn, tơrgùm dờp jơnau yal, lùp gĭt nền wơl bơtô ƀồc cau ling chơ̆t màng, lam lòt jòi, rờ mờ tơrgùm jun rê ƀồc ntìng cau ling chơ̆t màng, pơgồp bơnah lơh jăt geh cồng nha gùng dà broă lơh “Kis gĭt jơnau gĭt adăt”.

Đơs jàu kơnòl broă, Thiếu tướng ồng Lương Đình Chung, Đơng lam broă Đảng mờ broă Chính trị Ling tiah 5 đơs wih đơs wơl, broă lơh lòt jòi, rờ tơrgùm ƀồc ntìng cau ling chơ̆t màng ờ mìng là kơnòl broă ờs mờng lơm mờ gam tơnggŏ nùs nhơm “Hùc dà kah tô dà”, kah rơngal ală cau neh phi să tài lơngăp lơngai is, khăt gơboh is bơh Dà lơgar tờm dê. Đơng lam broă Đảng mờ broă Chính trị Ling tiah 5 sồr kwang bàng, cau ling mŭt bal tàm mpồl mìng lơh dùl kơnòl broă gĭt loh bơta chờ hờp mờ kơnòl; sền do là ‘jơnau sồr bơh plai nùs dê’, bơh bơhiàn ờs mờng jơi bơtiàn dê.